រឿងរ៉ាវស្នេហាតាមខ្សែអាត់សំឡេង ដែលអ្នកខ្លះថាជារឿងប្រឌិតនយោបាយគ្មានយុទ្ធសាស្ត្រ ច្បាស់លាស់ គ្មានសារៈសំខាន់សម្រាប់ជាតិ បានបោះជំហានមួយថ្មីទៀត។ កាលពីថ្ងៃម្សិលមិញ ស្ត្រីម្នាក់អះអាងថានាងជា ស្រីមុំ ដែលត្រូវបានគេបង្ហោះសំឡេងតាមទំព័រហ្វេស ប៊ុក បានបញ្ចេញសំឡេង ប្រកាសបដិសេធរាល់ការចោទថានាងបានសន្ទនាគ្នាអំពីរឿងស្នេហាជាមួយលោក កឹម សុខា មេដឹកនាំបក្សប្រឆាំង ហើយ បានបង្ហោះសំឡេងជាសាធារណៈនេះ។ ការបដិសេធនេះ គឺពេលនាងផ្ដល់បទសម្ភាសឱ្យវិទ្យុអាស៊ីសេរី។
កញ្ញាម្នាក់នេះ គឺនាង ខុម ចាន់ដារាទី ហៅ ស្រីមុំ។ នៅថ្ងៃស្អែកនេះនាងនឹងទៅបំភ្លឺរឿងរ៉ាវនេះ នៅក្រសួងមមហាផ្ទៃ។ តែនៅពេលថ្លែងបដិសេធដូចនេះ កញ្ញា ខុម ចាន់ដារាទី ក៏បានបង្ហាញពីការព្រួយបារម្ភពីសុវត្តិភាពផ្ទាល់ខ្លួនរបស់កញ្ញា។ ជុំវិញការព្រួយបារម្ភនេះអ្នកវិភាគថា ក្រសួងមហាផ្ទៃត្រូវតែធានាសុវត្តិភាពកញ្ញា ស្រីមុំ ឱ្យបាន។
ជូនសេចក្ដីរាយការណ៍លម្អិតដោយកញ្ញា ច្រឹក ស្រីអូន ៖
កញ្ញា ស្រីមុំ បានបញ្ជាក់ថាការចេញមកបដិសេធនេះ គឺដើម្បីទាមទារកិតិ្តយសរបស់នាងមកវិញ ដោយអះអាងថានាងនឹងទៅក្រសួងមហាផ្ទៃ នៅថ្ងៃ១១ ខែមីនា ស្អែកនេះ ដើម្បីបំភ្លឺពីរឿងអាស្រូវដែលគេយកប្រឌិតសំឡេងរបស់កញ្ញា មកចាក់ផ្សាយ តែអ្វីធ្វើឱ្យនាងបារម្ភគឺសុវត្ថិភាពរបស់នាង។
ខុម ចាន់ដារាទី ហៅ ស្រីមុំ ប្រាប់វិទ្យុអាស៊ីសេរីថា នាងត្រូវស្នើឱ្យស្ថាប័នមួយនេះ ជួយការពារសន្តិសុខរបស់នាង ហើយនាងនឹងបំភ្លឺអ្វីដែលនាងគេប្រឌិតរឿង៖ «សម្រាប់ខ្ញុំ ត្រូវលាក់ខ្លួនជារហូតតាំងពីថ្ងៃទី២៩ គឺខ្ញុំគ្មានសិទ្ធិសេរីភាពសូម្បីតែការងារខ្ញុំ ខ្ញុំមិនបានទៅធ្វើផងខ្ញុំបានអារម្មណ៍ថាខ្ញុំត្រូវការភាពយុត្តិធម៌…»។
ចំពោះលិខិតអញ្ជើញរបស់ក្រសួងមហាផ្ទៃ ដើម្បីឱ្យកញ្ញា ស្រីមុំ ចូលទៅបំភ្លឺនេះ លោក សូ ចន្ថា សាស្ត្រាចារ្យផ្នែកវិទ្យាសាស្ត្រនយោបាយ ថា នេះគឺជានិតិវិធីល្អរបស់ក្រសួងមហាផ្ទៃដែលបានស្រាវជ្រាវបង្ហាញនូវការពិតកុំឱ្យមានមន្ទិលតទៅទៀត។ តែលោកចំពោះការស្រាវជ្រាវនេះសូមកុំឱ្យក្លាយជាការដាក់បន្ទុកទៅលើកញ្ញ ស្រីមុំ និងលោក កឹម សុខា ទៅវិញ។ លោកបន្តថា ក្រសួងមហាផ្ទៃ និង ក្រសួងពាក់ពន្ធ័ត្រូវតែធានានូវសុវត្ថិភាពកញ្ញា ស្រីមុំ ឱ្យបាន ព្រោះវាជាកាតព្វកិច្ចរបស់ក្រសួង។
«កញ្ញាមានការព្រួយបារម្ភ ពីព្រោះកន្លងមកយើងច្រើនតែឃើញក្រសួងធ្វើការស្រាវជ្រាវ បញ្ហាទាំងអស់នេះច្រើនតែពាក់ព័ន្ធតែបញ្ហានយោបាយ ច្រើនជាងការផ្តល់យុត្តិធម៌ បុគ្គលពិតប្រាកដ។ ក្រសួងមហាផ្ទៃ ឬ តួនាទីរបស់រដ្ឋត្រូវតែផ្តល់សុវត្ថិភាពដល់សាមីខ្លួនទាំសងខាងជាចាំបាច់»។
ដូចគ្នានេះដែរ លោក ហេង ស្រៀង អ្នកស្រាវជ្រាវសង្គម និងនយោបាយបានលើកឡើងថា អាជ្ញាធរ ក៏ដូចជាសមត្ថកិច្ចត្រូវតែការពារសុវត្តិភាពជួនប្រជាពរដ្ឋ ជាពិសេសត្រូវចាប់ជនល្មើស ដែលបន្លំសំឡេង ឬថតសំឡេងគេគ្មានការអនុញ្ញាមកដាក់ទោសឱ្យបាន៖ «ក្នុងមានអាជ្ញាធរ ត្រូវតែស្វែងរកប្រភពព័ត៌មាន ហើយជាការធ្វើឱ្យអ្នករងគ្រោះ ឬ អ្នកគេលេងមានការភ័យខ្លាចនោះទេ…»។
វិទ្យុស្ត្រី FM 102 មិនអាចសុំបំភ្លឺបាននោះទេពីអ្នកនាំពាក្យក្រសួងមហាផ្ទៃ លោក ខៀវ សុភ័ក្រ និងអ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ។
តែបែបនេះក្ដីតំណាងយុវជន និស្សិត ដែលចេញមុខជំទាស់ការបដិសេធរបស់កញ្ញា ខុម ចាន់ដារាទី ហៅ ស្រីមុំ គឺលោកស្រី ចំរើន ថាពួកគេនឹងធ្វើសន្និសីទសារព័ត៌មាននៅថ្ងៃស្អែកនេះបង្ហាញពីភស្តុតាងបញ្ជាក់ថា ការបដិសេធខ្សែអាត់សម្លេងរបស់កញ្ញា ស្រីមុំ ខ្សែ គឺជាការកុហកមហាជនដែរ។
«ពួកគាត់ជំនាញ IT ពួកគាត់មិនមែនកាត់តទេ គាត់ឱ្យសំឡេងដើមទី១ និងសំឡេងទី២ ដែលបានចុះផ្សាយកាលពីម្សិលមិញមកប្រៀបធៀបគ្នា តាមរយៈសំឡេងប្រេកង់ ដែលយើងអាចកំណាត់បានថា តាមរយៈកម្មវិធី អាដប់ … មើលទៅគឺសំឡេងហ្នឹងគឺដូចគ្នាពិត ១០០% តាមរយៈសំឡេងដែលគាត់ឆ្លើយឆ្លងជាមួយឯកឧត្តម កឹម សុខា បានហៅទូរសព្ទទៅស្តីបន្ទោសថាហេតុអ្វីបានជាកើតរឿងនេះឡើង…»។
សម្ដេចនាយករដ្ឋមន្ត្រី ហ៊ុន សែន កាលពីថ្មីៗនេះ បានសរសេរលើទំព័រហ្វេសប៊ុករបស់ សម្ដេច ថា លោកសុខចិត្តលេងអ៊ុកដើម្បីប្រើបញ្ញា ហើយគិតរឿងជាតិ គឺមិនគិតពីល្បែងស៊ីសង ស្រីញីអូនបង ឱ្យមានរឿងអាស្រូវឡើយ។ តែបែបនេះក្ដីគេមិនដឹងថា សម្ដេចចង់សំដៅលើជនណាមួយ ឬលោក កឹម សុខា នោះឡើយ។
អ្នកសង្កេតការណ៍ មើលឃើញថា ជាការបោះជំហានថ្មីមួយនៃការប្រឌិតរឿងរ៉ាវស្នេហា ប្រែទៅជារឿងនយោបាយ ដើម្បីបំបាក់គូប្រកួតមុនការបោះឆ្នោតឃុំ-សង្កាត់ ឆ្នាំ២០១៧ និង ការបោះឆ្នោតសភា ឆ្នាំ២០១៨ ហើយថាការចេញមុខបដិសេធរបស់កញ្ញា ខុម ចាន់ដារាទី ហៅ ស្រីមុំ អាចធ្វើឱ្យស្ងប់ស្ងាត់នយោបាយលាបព៌ណគ្នានៅកម្ពុជា៕
