ភូមា៖ អង្គការជាច្រើននៅក្នុងប្រទេសភូមា បានបញ្ជូនញត្តិទៅថ្វាយព្រះមហាក្សត្រ និងនាយករដ្ឋមន្ដ្រីថៃ ដោយទទូចឱ្យដោះលែង និងលើកលែងទោសពលរដ្ឋរបស់ពួកគេពីរនាក់ ដែលកំពុងប្រឈមមុខនឹងការកាត់ទោសប្រហារជីវិត ចំពោះករណីឃាតកម្មលើជនបរទេស។
ជនជាតិភូមា ០២ នាក់នោះ ម្នាក់ឈ្មោះ វីន សាវទុន និងម្នាក់ទៀតឈ្មោះ សាវ លីន ត្រូវបានចោទពីបទមនុស្សឃាតទៅលើអ្នកទេសចរណ៍អង់គ្លេស ០២ នាក់នៅក្នុងប្រទេសថៃ កាលពីថ្ងៃទី ១៥ កញ្ញា ឆ្នាំ ២០១៤ ។ ពលរដ្ឋភូមាទាំងពីរនាក់នេះពួកគេ គឺជាជនចំណាកស្រុកភូមា ត្រូវបានរកកំហុសឃើញដោយតុលាការមួយនៃប្រទេសថៃកាលពីថ្ងៃទី១៥ ខែធ្នូ ឆ្នាំ២០១៥។
តាមប្រភព័ត៌មាន Mizzima ដែលស្រង់ប្រសាសន៍លោក កូទីនអ៊ូ អ្នករៀបចំដាក់ញត្តិដោយមានស្នាមមេដៃមនុស្ស ១០ ម៉ឺននាក់ បាននិយាយថាគេបានបញ្ជូនញត្តិទៅព្រះមហាក្សត្រថៃ និងនាយករដ្ឋមន្ដ្រីថៃតាមរយៈស្ថានទូតថៃនៅទីក្រុងរ៉ង់ហ្គូន។
កាលពីមួយខែមុននេះក្រសួងការបរទេស ភូមា ក៏បានដាក់លិខិតតវាជាផ្លូវការទៅរដ្ឋាភិបាល និង តុលាការថៃឱ្យលើកលែងការចោទប្រកាន់លើជនជាប់ចោទ ០២ រូបនេះដោយចាត់ទុកថា មិនមានភស្តុតាងគ្រប់គ្រាន់ដើម្បីប្រឆាំងពួកគេនោះទេ៕
ប្រភព៖ Mizzima
