ភ្នំពេញ៖ រដ្ឋមន្ត្រីក្រសួងការបរទេស បានដាក់លិខិតមួយច្បាប់ជូន លោក ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដោយស្នើឱ្យដកលិខិតឆ្លងដែនផ្លូវការពីមន្ត្រីក្រសួងនានាបន្ទាប់ពីបញ្ចប់បេសកកម្មនៅបរទេសហើយវិលមកកម្ពុជាវិញ។
ក្នុងលិខិតចុះថ្ងៃទី០៤ ខែមីនា លោក ហោ ណាំហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានលើកឡើងថា ការស្នើដកលិខិតឆ្លង ដែនផ្លូវការនេះ យោងតាមចំណារចុះថ្ងៃទី០២ ខែមីនា របស់សម្តេច ហ៊ុន សែន នាយករដ្ឋមន្ត្រីកម្ពុជា ដោយឱ្យមន្ត្រីអន្តោប្រវេសន៍កម្ពុជានៅគ្រប់ច្រកព្រំដែន ដកលិខិតឆ្លងដែនផ្លូវការរបស់មន្ត្រីដែលចប់បេសកកម្មពីបរទេស។
ឧបនាយករដ្ឋមន្ត្រី រដ្ឋមន្ត្រីក្រសួងការបរទេស លោក ហោ ណាំហុង ក៏បានស្នើឱ្យរដ្ឋមន្ត្រីក្រសួងមហាផ្ទៃណែនាំដល់មន្ត្រីក្រោមឱវាទឱ្យចាត់វិធានការប្រមូលលិខិតឆ្លងដែនទាំងនោះ ចាប់ពីថ្ងៃទី ២១ ខែមីនា តទៅ ដើម្បីយកមករក្សាទុកនៅក្រសួងការបរទេស។ ទន្ទឹមគ្នានេះ ក្រសួងនឹងប្រគល់លិខិតឆ្លងដែនផ្លូវការទាំងនោះទៅមន្ត្រីរដ្ឋាភិបាលវិញ ខណៈមន្ត្រីនោះត្រូវមានបេសកកម្មនៅបរទេសជាថ្មី៕
