ក្រសួងអប់រំ យុវជន និងកីឡា បានចេញអំពាវនាវដល់សាធារណជនទាំងអស់ដែលមានសន្ដានចិត្តចង់ចូលរួមជំរុញវប្បធម៌នៃការអាននៅកម្ពុជា សូមផ្ដល់ឯកសារផ្សេងៗ ដែលបាន ប្រើហើយ ទៅដាក់នៅតាមបណ្ណាល័យ ជាតិ ឬ បណ្ណាល័យតាមខេត្ត។
ការអំពាវនាវនេះបានធ្វើឡើងតាមអនុក្រឹត្យរបស់រាជរដ្ឋាភិបាលស្ដីពីទិវាអំណានជាតិដែលបានប្រកាសកាល ពីថ្ងៃទី១៤ ខែ កញ្ញា ឆ្នាំ២០១៥កន្លងមកនេះ។ តាមរយៈនេះ ក្រសួងអប់រំ បានសេចក្ដីជូនដំណឹងដោយបានអះអាងថា គឺជាជោគជ័យ និងជាគុណប្រយោជន៍ដល់មនុស្សជំនាន់ក្រោយ។
សេចក្ដីជូនដំណឹងបានបញ្ជាក់ថាសប្បុរសជនអាចជួយផ្ដល់ជាឯកសារ សៀវភៅអានផ្សេងៗដែលបានប្រើរួចដល់បណ្ណាល័យតាមការស្ម័គ្រចិត្ត តាមរយៈប្រធានមន្ទីរអប់រំ យុវជន និងកីឡា រាជធានី និងខេត្ត ឬលោកនាយកសាលារៀងៗខ្លួន ដោយផ្ទាល់តែម្ដង។
យោងតាមសេចក្ដីជូនដំណឹងផ្សព្វផ្សាយនៅថ្ងៃទី០៣ ខែមីនា ឆ្នាំ២០១៦បានឱ្យដឹងថាមកដល់ពេលបច្ចុប្បន្ននេះ បណ្ណាល័យគ្រប់ភូមិសិក្សាមានចំនូន ៨៤៧០ នៅតាមសាលារៀនទូទាំងប្រទេស ហើយបណ្ណាល័យទាំងនោះមានតែសៀវភៅគោលតែប៉ុណ្ណោះ គឺពុំទាន់មានសៀវភៅគ្រប់គ្រាន់តាមតម្រូវការរបស់សិស្សានុសិស្សដើម្បីសិក្សា ស្រាវជ្រាវ អានបន្ថែមនៅឡើយ៕