នៅព្រឹកថ្ងៃទី៤ មិនានេះ តុលាការកំពូល បានសម្រេចតំកល់សាលដីកាសាលាឧទ្ធរណ៍ ចំពោះបណ្ដឹងសុំនៅក្រៅឃុំរបស់លោកហុងសុខហួរ អតីតសមាជិកព្រឹទ្ធសភា គណបក្សសមរង្ស៊ី ដែលមិនឱ្យជនជាប់ចោទករណីក្លែងសន្ធិសញ្ញាព្រំដែនកម្ពុជា-វៀតណាម បាននៅក្រៅឃុំដោយសំអាងពីហេតុផលសន្តិសុខ។ លោក ហុង សុខហួរ មិនបាននាំខ្លួនមកស្ដាប់ការអានសេចក្ដីសម្រេចនេះទេ។
ទាំងមេធាវីការពារក្ដី ជនជាប់ចោទ និងភរិយារបស់ហុងសុខហួរ ព្រមទាំង អ្នកសង្កេតការណ៍ផ្នែកសិទ្ធិមនុស្សសម្ដែងការខកចិត្តចំពោះសេចក្ដីសម្រេចនេះ។
កញ្ញា ប៉ូ សាគុន មានសេចក្ដីពិស្ដារ៖
តុលាការកំពូល បានប្រកាសបន្តឃុំខ្លួនលោក ហុង សុខហួរ ព្រោះយល់ឃើញថា ការសម្រេចរបស់សភាស៊ើបសួរសាលាឧទ្ធរណ៍ត្រឹមត្រូវដោយលើកការសំអាងថា ករណីលោកហុងសុខហួរជារឿងធ្ងន់ធ្ងរហើយ បើនៅក្រៅឃុំជនជាប់ចោទអាចបង្កអសន្តិសុខ។ លោក ហុង សុខហួរ ពុំត្រូវបានបញ្ជូនមកកាន់តុលាការកំពូល ដើម្បីឱ្យមកស្ដាប់ការប្រកាសសាលដីកានៅព្រឹកមិញនេះទេ។
មេធាវីការពារក្ដីលោក ហុង សុខហួរ លោក ជួង ជូងី មានប្រសាសន៍ថា លោកមិនយល់ស្របចំពោះការអះអាងរបស់តុលាការនោះទេ។ លោកបញ្ជាក់ថា កូនក្ដី លោក សមនឹងទទួលបានយុត្តិធម៌ចំពោះការសុំនៅក្រៅ។
លោក ជួង ជូងី ៖ «រហូតពេលណឹង គឺអត់ទាន់មានសាលក្រមស្ថាពរ ថាលោក ហុង សុខ ហួរ មានទោសនៅឡើយ ហើយព្រឹទ្ធសភាក៏អត់ទាន់មានដកអភ័យឯកសិទ្ធិគាត់ដែរ គឺគាត់នៅតែជាសមាជិកព្រឹទ្ធសភា គាត់នៅមានអភ័យឯកសិទ្ធិសភានៅឡើយ ប៉ុន្តែតុលាការនៅតែបន្តឃុំខ្លួនគាត់ទៀត ខ្ញុំមានការសោកស្តាយថាធ្វើយ៉ាងនេះប៉ះពាល់ទៅលើការគោរពសិទ្ធិមនុស្ស ជាពិសេសគាត់ជាសមាជិកព្រិត្តសភាផង»។
លោក ហុង សុខហួរ អតីតសមាជិកព្រឹទ្ធសភាគណបក្សសម រង្ស៊ី រងបទចោទទាំង ៣នោះ រួមមាន បទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែងក្លាយ និង បទញុះញង់បង្កឱ្យមាន ភាពវឹកវរធ្ងន់ធ្ងរដល់សន្តិសុខសង្គម។ បទចោទប្រកាន់ទាំងនោះ នឹងត្រូវផ្តន្ទាទោសដាក់ពន្ធនាគារ ចន្លោះពី៥ ទៅ ១០ឆ្នាំ ផងដែរ។
លោក ហុង សុខហួរ បានដាក់ពាក្យសុំនៅក្រៅឃុំ ដោយលោកអះអាងថា លោកមានជំងឺច្រើនប្រភេទ ដូចជាជំងឺក្រពះ និងជំងឺលើសឈាម។ លោក ហុងសុខហួរ ប្រកាសថា លោកតំកល់ប្រាក់ ២០ លានរៀល និងលិខិតឆ្លងដែនចំនួន២ គឺលិខិតឆ្លងដែនបារាំង និង កម្ពុជា។ ប៉ុន្តែទាំងសាលាដំបូងរាជធានីភ្នំពេញ និងសាលាឧទ្ធរណ៍បដិសេធមិនឱ្យលោកនៅក្រៅឃុំ។
លោក អំ សំអាត អ្នកស៊ើបអង្កេតជាន់ខ្ពស់នៃអង្គការសិទ្ធមនុស្ស លីកាដូ បានប្រាប់វិទ្យុស្ត្រី FM 102 ថា សេចក្ដីសម្រេចរបស់តុលាការកំពូល គឺជាទម្រង់តែមួយដែលលោកមិនចាប់អារម្មណ៍ឡើយ។
លោក អំ សំអាត ៖ «យើងដូចជាអត់មានអីភ្ញាក់ផ្អើលទេ ពីព្រោះបញ្ហានេះយើងដឹងជាមុនហើយ ពីព្រោះករណីឯកឧត្តម ហុង សុខហួរ នេះ ជារឿងនយោបាយ អីចឹងជាវប្បធម៌កន្លងមក នៅកម្ពុជាយើង រឿងទាក់ទងទៅនឹងរឿងនយោបាយ បើសិនជាគណបក្សទាំងពីហ្នឹង គាត់ចរចាត្រូវរ៉ូវគ្នា ពីបញ្ហាអ្វីស្រុះស្រួលគ្នាហើយ ចឹងអ្នកដែលជាប់ឃុំដោយសារបញ្ហានយោបាយហ្នឹង គេច្រើនតែអនុញ្ញាតឱ្យនៅក្រៅឃុំ»។
ចំណែកអ្នកស្រី គុន្ធ លំអង ជាភរិយារបស់លោក ហុង សុខហួរ និយាយថា លោកស្រីមានការសោកស្ដាយយ៉ាងពន់ពេកដែលសេចក្ដីសម្រេចរបស់តុលាការកំពូល មានការមិនយគយល់ និងអនុគ្រោះ។
អ្នកស្រី គុន្ធ លំអង ៖ «ចំពោះខ្ញុំមានការខកចិត្តយ៉ាងខ្លាំង ខ្ញុំបានរម្មណ៍អំពីសុខភាពស្វាមីខ្ញុំ ពីព្រោះអីសុខភាពគាត់ គាត់មានជំងឺលើសឈាម គាត់ត្រូវការវេជ្ជបណ្ឌឹតតាមដានជំងឺគាត់ ឈាមគាត់ យ៉ាងញឹកញាប់ យ៉ាងទៀងទាត់ ជាពិសេសយើងត្រូវការពិសាថ្នាំយ៉ាងទៀងទាត់…»។
លោក ហុង សុខហួរ ត្រូវបានសមត្ថកិច្ចចាប់ខ្លួន កាលពីព្រឹកថ្ងៃទី១៥ ខែសីហា ឆ្នាំ២០១៥ បន្ទាប់ពីលោកបានបង្ហោះ លិខិតសន្ធិសញ្ញាព្រំដែនកម្ពុជា-វៀយណាម លើ Facebook របស់លោក សម រង្ស៊ី ហើយនៅថ្ងៃទី១៦ ខែសីហា ឆ្នាំ២០១៥ តុលាការបានសម្រេចឃុំខ្លួន លោក ហុង សុខហួរ ដាក់ពន្ធនាគារព្រៃស ដោយតុលាការបាន ចោទប្រកាន់ចំនួន ៣ បទល្មើសនេះ។ តែការចាប់ខ្លួន លោកហុងសុខហួរ ធ្វើឡើង មួយសប្ដាហ៍ បន្ទាប់ពីសម្ដេច ហ៊ុន សែន បានប្រកាសឱ្យចាប់ខ្លួន បន្ទាប់ពីលោកចោទ អតីតសមាជិកព្រឹទ្ធសភា បក្សប្រឆាំងរូបនេះ ថា ក្បត់ជាតិ ទាក់ទិនការបង្ហោះសន្ធិសញ្ញាព្រំដែន កម្ពុជា-វៀតណាម ឆ្នាំ ១៩៧៩៕
