ភ្នំពេញ៖ តុលាការកំពូល បើកសវនាការជំនុំជម្រះក្ដី លោក ចែម សង្វារ អតីតអគ្គាធិការ នៃក្រសួងប្រៃសណីយ៍ និងទូរគមនាគមន៍ ដោយជាប់ចោទពីបទប្រព្រឹត្តអំពើពុករលួយនូវទឹកប្រាក់៧០ ម៉ឺនដុល្លារ។
លោក ចែម សង្វារ ត្រូវបានសាលាដំបូងរាជធានីភ្នំពេញ និងសាលាឧទ្ធរណ៍ផ្តន្ទាទោសដាក់ពន្ធនាគាររយៈពេល ៧ឆ្នាំ និងពិន័យ ២០ ម៉ឺនដុល្លារ ព្រមទាំងរឹបអូសទ្រព្យសម្បត្តិចំនួន៥០ម៉ឺនដុល្លារអាមេរិក ថែមទៀតផង។
តាមសេចក្ដីរាយការណ៍ព័ត៌មាន សវនាការនេះដឹកនាំដោយលោក ឃឹម ប៉ុណ្ណ អនុប្រធានតុលាការកំពូល និងលោក នៅ មុនីជោត ជាតំណាងមហាអយ្យការ។
លោក ចែម សង្វារ ត្រូវបានសមត្ថកិច្ចអង្គភាពប្រឆាំងអំពើពុករលួយ ឃាត់ខ្លួនកាលពីថ្ងៃទី២ ខែឧសភា ឆ្នាំ២០១៤ ដែលរហូតដល់ទល់ពេលនេះ លោក ចែម សង្វារ បានជាប់ពន្ធនាគារជិត ២ឆ្នាំ មកហើយ។
អង្គភាពប្រឆាំងអំពើពុករលួយ បានរកឃើញអតីតអគ្គាធិការនៃក្រសួងប្រៃសណីយ៍ និងទូរគមនាគមន៍ប្រព្រឹត្តអំពើពុករលួយនូវទឹកប្រាក់ ៧០ ម៉ឺនដុល្លារ។
កាលពីថ្ងៃទី១៨ ខែកុម្ភៈ ក្រសួងប្រៃសណីយ៍ និងទូរគមនាគមន៍ បានដកតំណែងមន្ត្រីរបស់ខ្លួនចំនួន ២រូប ពាក់ព័ន្ធនឹងការករណីកឹបកេងប្រាក់ចំនួន ២៣ ម៉ឺនដុល្លារអាមេរិកគឺបន្ទាប់ពីអង្គភាពប្រឆាំងអំពើពុករលួយកំហុសពួកគេឃើញ។ មន្ត្រីទាំង២ រូបនេះ ម្នាក់ ឈ្មោះ មាស ប៉ូ ប្រធានក្រុមប្រឹក្សាភិបាល និងលោក ឡាយ ម៉ារីវ៉ូ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃទូរគមនាគមន៍កម្ពុជា៕
