ក្រសួងការបរទេសកម្ពុជាបានប្រកាសព័ត៌មានមួយជាថ្មីទៀតឱ្យដឹងថា រហូតពេលនេះ អាជ្ញាធរថៃ ពុំទាន់មានវិធានការបិទតូបលក់ទំនិញដំបូលខៀវរបស់អាជីរករខ្មែរ នៅផ្សាររ៉ុងក្លឿ ប្រទេសថៃនោះទេ។
សេចក្តីប្រកាសព័ត៌មានក្រសួងការបរទេសកម្ពុជា នៅព្រឹកថ្ងៃទី២ ខែមីនា ដែលបាន ស្រង់សម្ដី លោក ជុំ សន្ទរី អ្នកនាំពាក្យក្រសួងការបរទេសកម្ពុជា បានបញ្ជាក់ថា បន្ទាប់ពីមានការផ្សាយព័ត៌មានកាលពីរសៀលថ្ងៃទី០១ មិនា ម្សិលមិញ ថា អាជ្ញាធរថៃបានបិទតូបលក់ទំនិញដំបូងខៀវរបស់អាជីវករខ្មែរ គឺលោករដ្ឋមន្ត្រីហោ ណាំហុង បានណែនាំឱ្យស្ថានអគ្គកុងស៊ុលកម្ពុជាពិនិត្យលើករណីនេះឡើងវិញ។
តាមសេចក្ដីប្រកាសព័ត៌មានគឺអ្នកនាំពាក្យរូបនេះ បានបញ្ជាក់ទៀតថា នៅយប់ថ្ងៃទី០១ ស្ថានអគ្គកុងស៊ុលកម្ពុជា ប្រចាំខេត្តសាកែវ បានរាយការណ៍ថា រហូតពេលនេះ ពុំទាន់មានវិធានការ របស់អាជ្ញាធរថៃ បិទតូបលក់ទំនិញដំបូលខៀវរបស់អាជីរករខ្មែរ នៅផ្សាររ៉ុងក្លឿនោះឡើយ។
ផ្សាររ៉ុងក្លឿ មានតូបលក់ដូរប្រមាណ ៣៥០០ តូប ក្នុងនោះតូបប្រមាណ ៩០% ជារបស់អាជីវករខ្មែរ និង ១០% ទៀតរបស់អាជីវករថៃ។ កាលពីថ្ងៃទី៣ កុម្ភៈ អាជ្ញាធរថៃបានចុះចាប់ទំនិញក្នុងផ្សារនេះ ដោយអាជ្ញាធរថៃបានចោទប្រកាន់ថា ទំនិញម៉ាកយីហោល្បីៗដែលក្រុមអាជីវករខ្មែរដាក់លក់នៅផ្សាររ៉ុងក្លឿ រួមមានសម្លៀកបំពាក់ ស្បែកជើង មួក និងគ្រឿងអេឡិចត្រូនិកជាដើម ប្រមាណ ៩០% គឺជាប្រភេទទំនិញចម្លងម៉ាកយីហោ ឬ ទំនិញក្លែងក្លាយ។
ក្នុងពេលចុះពិនិត្យកម្មសិទ្ធិបញ្ញាលើទំនិញរបស់អាជីវករខ្មែរនោះដែរ បានធ្វើឱ្យមានការប៉ះទង្គិចគ្នាមួយរវាងអាជីវករខ្មែរ និងសមត្ថកិច្ចថៃ ដែលឈានដល់ការចាប់ខ្លួនអាជីវករខ្មែរចំនួន ២នាក់។ ប៉ុន្តែ អាជីវករខ្មែរចំនួន ២នាក់នោះ ត្រូវបានតុលាការថៃ កាត់ទោសឱ្យជាប់ពន្ធនាគារម្នាក់ៗរយៈ៣ខែ៕
