បណ្តាញជនជាតិដើមភាគតិច និងព្រៃឈើចំនួន ២៧ អង្គការ បានសេចក្តីថ្លែងការណ៍ ដោយសម្តែងនូវអំណរសាទរចំពោះ ចំណាត់ការរបស់រាជរដ្ឋាភិបាលកម្ពុជា ដែលបានបង្កើតគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ នៅពេលដែលស្ថានភាពនៃការកាប់បំផ្លាញ និងការដឹកជញ្ជូនឈើ កំពុងតែមានសកម្មភាពយ៉ាងខ្លាំងក្លា។
សេចក្តីថ្លែងការណ៍ដដែលបានលើកឡើងថា ចំណាត់ការដ៏ក្តៅគគុករបស់រាជរដ្ឋាភិបាលកម្ពុជានាពេលបច្ចុប្បន្ននេះ បានបង្ហាញយ៉ាងច្បាស់អំពីឆន្ទៈ និងវិធានការម៉ឺងម៉ាត់របស់រាជរដ្ឋាភិបាលកម្ពុជាក្នុងការទប់ស្កាត់ និងបង្ក្រាបបទល្មើសព្រៃឈើនាំចេញទៅប្រទេសវៀតណាម។
«ទោះជាយ៉ាងណាក៏ដោយ យើងមានការសោកស្តាយ ចំពោះយន្តការផ្លូវច្បាប់ដែលមានស្រាប់ ដែលអាចឱ្យយើងធ្វើការឆ្លុះបញ្ចាំងពីការងារកន្លងមកចំពោះបទល្មើសព្រៃឈើនៅទូទាំងប្រទេសកម្ពុជា»។
ទន្ទឹមនឹងនេះ បណ្តាញជនជាតិដើមភាគតិច និងព្រៃឈើ៖ «មានការព្រួយបារម្ភយ៉ាងខ្លាំង ចំពោះខ្សែសង្វាក់នៃការផ្គត់ផ្តង់ឈើ ដែលមិនមានទិន្នន័យច្បាស់លាស់បញ្ជាក់ពីបរិមាណឈើនាំចេញមកពីប្រភពផ្សេងៗរួមមានពី សហគមន៍ព្រៃឈើចម្ការឈើ និងដីឯកជន គម្រោងអាជីវកម្មរ៉ែ ទំនប់វារីអគ្កិសនី ជាពិសេសពីសម្បទានដីសេដ្ឋកិច្ច ដែលពាក់ព័ន្ធក្នុងការប្រមូលទិញឈើពីសំណាក់ឈ្មួញឈើខុសច្បាប់នៅជុំវិញតំបន់សម្បទាន»។
បណ្តាញជនជាតិដើមភាគតិច និងព្រៃឈើចំនួន ២៧ អង្គការ បានបញ្ជាក់ថា កត្តាទាំងអស់នេះនឹងបណ្តាលឱ្យព្រៃឈើនៅកម្ពុជាបាត់បង់ក្នុងរយៈពេលដ៏ខ្លី ប្រសិនបើពុំមានអន្តរាគមន៍ដោះស្រាយទាន់ពេលវេលាទេ នឹងធ្វើឱ្យប៉ះពាល់ដល់កម្មវិធីស្តារគម្របព្រៃឈើ កម្មវិធីឥណទានកាបូន ប៉ះពាល់ដល់ការជួយរក្សាលំនឹងទឹកក្រោមដី ជាពិសេសប៉ះពាល់យ៉ាងខ្លាំងដល់ជីវភាពប្រជាសហគមន៍មូលដ្ឋានដែលពឹងអាស្រ័យផល អនុផលព្រៃឈើ ដើម្បីផ្គត់ផ្គង់ជីវភាពរស់នៅប្រចាំថ្ងៃ។
គួររំឭកថា នៅថ្ងៃទី២៥ ខែកុម្ភៈ ក្នុងពិពិធីសម្ពោធអគារក្រសួងបរិស្ថាន លោកនាយករដ្ឋមន្ត្រី ហ៊ុន សែន មានប្រសាសន៍ថា លោកទទួលស្គាល់ថានៅតែមានការកាប់បំផ្លាញព្រៃឈើ ហើយលោកប្តេជ្ញាត្រូវតែបង្ក្រាបករណីនេះឱ្យបាន ដោយលោកបញ្ជាឱ្យនាយឧត្តមនីយ៍ សៅ សុខា ប្រើគ្រាប់រ៉ុកកែតបាញ់កម្ទេចក្រុមឈ្មួញរកស៊ីឈើដែលព្រហើនជាដើម៕
