ភ្នំពេញ៖ គណៈកម្មាធិការលើកស្ទួយស្ដ្រីក្នុងវិស័យនយោបាយ បានចេញសេចក្តីប្រកាសព័ត៌មាន នៅថ្ងៃទី០១ ខែមីនា ឆ្នាំ២០១៦ នេះថា គណៈកម្មាធិការលើកស្ទួយស្ដ្រីក្នុងវិស័យនយោបាយ (គ.ស.ន) អង្គការសីលការ សហការជាមួយអង្គការដៃគូជាតិ អន្ដរជាតិ រួមទាំងក្រុមបណ្ដាញយុវជនស្ម័គ្រចិត្ត និងប្រារព្ធទិវានារីអន្ដរជាតិលើកទី ១០៦ ក្រោមប្រធានបទ”ខ្ញុំបោះឆ្នោតឱ្យស្ដ្រីក្នុងការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០១៧ ដើម្បីការអភិវឌ្ឍ ប្រកបដោយចីរភាព” នៅឯភោជនីយដ្ឋានទន្លេបាសាក់ ២ ព្រឹកថ្ងៃទី០២ ខែមីនា ឆ្នាំ២០១៦ ស្អែកនេះ។
យោងតាមសេចក្ដីប្រកាសព័ត៌មានដដែល គណៈកម្មាធិការលើកស្ទួយស្ដ្រីក្នុងវិស័យនយោបាយនឹង ប្រារព្ធទិវានារីអន្ដរជាតិលើកទី ១០៦ នេះ គឺដើម្បីជុំរុញឱ្យគណបក្សនយោបាយទាំងអស់ដាក់ចេញនូវយន្ដការច្បាស់លាស់ក្នុងការបង្កើនចំនួនស្ដ្រីឈរឈ្មោះជាបេក្ខជនក្រុមប្រឹក្សាឃុំ-សង្កាត់ ឆ្នាំ២០១៧ និងអំពីតួនាទីរបស់ប្រជាពលរដ្ឋគ្រប់រួប ត្រូវត្រៀមខ្លួនក្នុងការលើកកម្ពស់ និងជំរុញឱ្យស្ត្រីចូលរួមក្នុងបោះឆ្នោតក្រុមប្រឹក្សាឃុំ-សង្កាត់ ឆ្នាំ២០១៧ ខាងមុខនេះ។
ម្យ៉ាងវិញទៀត វេទិកានេះ នឹងបង្ហាញឱ្យឃើញពីការគាំទ្ររបស់យុវជនទៅលើសមត្ថភាពរបស់ស្ដ្រី ក្នុងសតវត្សទី ២១ តាមរយៈការប្រកួតប្រជែងទៅលើប្រធានបទផ្សេងៗគ្នាជាច្រើនផងដែរ។
សម្រាប់ព័ត៌មានបន្ថែម ក្នុងការចូលរួម អាចទាក់ទងទៅកាន់ លោក រី ប្ស៉ូម មន្ដ្រីផ្នែក ទំនាក់ទំនងរបស់អង្គការសីលការ តាមរយៈលេខទូរស័ព្ទ ០១០ ៨៣ ៦៣ ៧៦ ឬ តាមរយៈ អ៊ីម៉ែល [email protected] ឬចូលទៅកាន់គេហទំព័រ www.silaka.org/ www.cpwp.net៕
