តុលាការកំពូលនៅព្រឹកថ្ងៃសុក្រ ទី២៦ ខែកុម្ភៈ នេះ បានប្រកាសសម្រេចលើកពេលសវនាការ សំណុំរឿងសុំនៅក្រៅឃុំ របស់អតីតសមាជិកព្រឹទ្ធសភាមកពីគណបក្សសម រង្ស៊ី លោក ហុង សុខហួរ ទៅថ្ងៃទី ៤ ខែ មិនាវិញ។
លម្អិតព័ត៌មានដោយ កញ្ញា ប៉ូ សាគុន ៖
បន្ទាប់ពីតុលាការកំពូលបានបើកសវនាការ សំណុំរឿងលោក ហុង សុខហួរ សុំនៅក្រៅឃុំ អស់រយៈពេលមួយម៉ោង នៅព្រឹកថ្ងៃសុក្រទី២៦ ខែកុម្ភៈ រួចមក ជាលទ្ធផលតុលាការបានសម្រេចពន្យាពេលប្រកាសសាលក្រម ទៅថ្ងៃទី៤ ខែមីនាវិញ។ នេះបើតាមការឱ្យពី លោក ជួង ជូងី មេធាវីការពារក្តីឱ្យ លោក ហុង សុខហួរ។
មេធាវីការពារក្តី លោក ហុង សុខហួរ លោក ជួង ជូងី មិនធ្វើអត្ថាធិប្បាយអ្វីច្រើននោះទេ ដោយលោកថា រង់ចាំសេចក្តីសម្រេចរបស់តុលាការកំពូលនៅថ្ងៃទី៤ខែមីនាសិន។ ជុំវិញបញ្ហានេះ WMC មិនអាចសុំការបកស្រាយពីអនុប្រធានតុលាការកំពូល លោក ឃឹម ប៉ុណ្ណ និងលោក នៅ មុនី តំណាងអយ្យការតុលាការកំពូលបាននោះទេ។
មន្ត្រីជាន់ខ្ពស់ផ្នែកសិទ្ធិមនុស្សនៃអង្គការ លីកាដូ លោក អំ សំអាត បានលើកឡើងថា បើគិតតាមផ្លូវច្បាប់តុលាការគួរតែអនុញ្ញាតឱ្យ លោក ហុង សុខហួរ នៅក្រៅឃុំ ព្រោះលោកបានបំពេញតាមនីតិវិធីគ្រប់លក្ខខណ្ឌដែលតុលាការតម្រូវរួចរាល់ហើយ។
លោកបន្តថា លោកនៅតែមិនមានសង្ឃឹមថា លោក ហុង សុខហួរ អាចនៅក្រៅឃុំបានឡើយ ដោយសារតែ បញ្ហានេះ គឺពាក់ព័ន្ធនឹងរឿងនយោបាយ។ លោក ហុង សុខហួរ បានស្នើតម្កល់ប្រាក់ ២០ លានរៀល ដើម្បីបាននៅក្រៅឃុំ ។
សូមរំឭកថា លោក ហុង សុខហួរ ត្រូវបានតុលាការចោទពីបទ ក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម៕
