សម្តេចនាយករដ្ឋមន្ត្រីបានបញ្ជាឱ្យប្រធានគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ប្រើអាវុធបំពាក់លើឧទ្ធម្ភាគចក្រ បង្ក្រាបអ្នកប្រព្រឹត្តបទល្មើសព្រៃឈើ ប្រសិនបើពួកគេនៅតែរឹងទទឹងមិនព្រមបញ្ឈប់សកម្មភាពនោះ។ មិនត្រឹមតែប៉ុណ្ណោះ លោកនាយករដ្ឋមន្ត្រីបានរិះគន់ដល់មន្ត្រីអសកម្មរបស់ខ្លួនមួយចំនួន ដែលមិនអាចបង្ក្រាបបទល្មើសព្រៃឈើផងដែរ។ ការថ្លែងសម្តេចនាយករដ្ឋមន្ត្រីនេះ ធ្វើឡើងនៅក្នុងពិធីសម្ពោធអាគារក្រសួងបរិស្ថានថ្មី នាព្រឹកថ្ងៃទី២៥ ខែកុម្ភៈ ឆ្នាំ២០១៦ នេះ។
លោក ធូ វិរៈ រាយការណ៍ព័ត៌មាននេះ ៖
លោកនាយករដ្ឋមន្ត្រី ហ៊ុន សែនបានថ្លែងនៅថ្ងៃព្រហស្បតិ៍នេះថា លោកមានការឈឺចាប់ និងទទួលស្គាល់ថា បទល្មើសព្រៃឈើនៅតែកើតមាន។ ជាងនេះទៀត លោកនាយករដ្ឋមន្ត្រី ហ៊ុន សែន បានរិះគន់ដល់មន្ត្រីខ្លួនមួយចំនួន ដែលបណ្តែតបណ្តោយឱ្យមានការដឹកជញ្ជូនឈើដោយគ្មានការបង្ក្រាបផងដែ។
នៅក្នុងពិធីសម្ពោធអាគារក្រសួងបរិស្ថានថ្មី នាព្រឹកមិញនេះ លោកនាយករដ្ឋមមន្ត្រី ហ៊ុន សែនបានរំឭកថា លោកបានបញ្ជាឱ្យលោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ដែលត្រូវបានតែងតាំងជាប្រធានគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ កាលពីថ្ងៃទី១៥ មករា ឆ្នាំ២០១៦ កន្លងទៅ ឱ្យប្រើប្រាស់អាវុធដែលបំពាក់លើឧទ្ធម្ភាគចក្រចំនួនពីរគ្រឿងពីរដ្ឋាភិបាល ប្រសិនបើអ្នកប្រព្រឹត្តបទល្មើសព្រៃឈើ ឬអ្នកកាប់បំផ្លាញព្រៃឈើ រឹងទទឹង នៅពេលអាជ្ញាធរចុះបង្ក្រាបបទល្មើសព្រៃឈើ។
លោកនាយករដ្ឋមន្ត្រី ហ៊ុន សែន ថ្លែងថា៖ «យើងទទួលនៅការឈឺចាប់ណាស់ នៅពេលគេស្រែកអំពីបញ្ហាការកាប់បំផ្លាញព្រៃឈើ ប៉ុន្តែយើងទទួលស្គាល់ការកាប់បំផ្លាញព្រៃឈើ។ បញ្ហាហ្នឹង គឺត្រូវតែបង្ក្រាប និងដាក់ទោសទណ្ឌ។ ខ្ញុំឱ្យឧទ្ធម្ភាគចក្រចំនួនពីរគ្រឿង សៅ សុខា ដូចជាមិនទាន់បាញ់មួយគ្រាប់ផងទេ ខ្ញុំឱ្យបាញ់បើសិនវាព្រហើនរ៉ូកែតដាក់ពីលើមកតែម្តង អត់មានរញ៉េញ៉ៃទេ»។
ជុំវិញបញ្ហានេះ លោក កែម ឡី អ្នកសិក្សាស្រាវជ្រាវពីការអភិវឌ្ឍសង្គម ដែលធ្លាប់បានដឹកនាំយុវជន រួមសកម្មជនការពារឈើទៅសិក្សាអំពីស្ថានភាពព្រៃឡង់នាពេលកន្លងមក បានលើកឡើងថា ការបញ្ជាឱ្យលោក សៅ សុខា ជាប្រធានគណៈកម្មការជាតិ ទប់ស្កាត់ និងបង្ក្រាបបទល្មើសព្រៃ ឱ្យប្រើប្រាស់អាវុធដែលបំពាក់លើឧទ្ធម្ភាគចក្រចំនួនពីរគ្រឿង ដើម្បីបង្ក្រាបអ្នកប្រព្រឹត្តបទល្មើសព្រៃឈើ ឬអ្នកកាប់បំផ្លាញព្រៃឈើ គឺជាយន្តការចាប់ត្រីចង្វារក្សាត្រីធំ និងគ្មានប្រសិទ្ធិភាពឡើយ។
លោក កែម ឡីបន្តថា ប្រសិនបើរាជរដ្ឋាភិបាលបាញ់គ្រាប់រ៉ូកែត ក្នុងការបង្ក្រាបបទល្មើសព្រៃឈើមែននោះ អ្នកដែលរងគ្រោះខ្លាំងគឺប្រជាពលរដ្ឋ ដែលប្រកបរបរកាប់ឈើតូចតាច ដើម្បីរស់ប៉ុណ្ណោះ។ លោកបន្តថា ដើម្បីបង្ក្រាបឈ្មួញឈើខុសច្បាប់ឱ្យមានប្រសិទ្ធភាព ទាល់តែរដ្ឋាភិបាលបង្កើតក្រុមការងារស៊ើបអង្កេតជាសម្ងាត់។
លោក កែម ឡី និយាយថា៖ «ឈ្មួញឈើធំៗមិនមែនទៅកាប់ឈើដោយខ្លួនឯងទេ ភាគច្រើនពួកគេមានកម្មករ ហើយប្រើកម្លាំងអ្នកស្រុក បើប្រើរ៉ូកែតបាញ់ទៅលើអ្នកកាប់ឈើមានន័យថា បាញ់លើពលរដ្ឋសាមញ្ញដែលរកតែដើម្បីហូប យើងមិនបានចាប់អ្នកធំ អ្នកមានអំណាច ហើយកន្លងមក ភាគច្រើនគ្រាន់តែជាវិធានការចាប់ត្រីចង្វា រក្សាត្រីធំផ្តុំក្បាលគ្នាស៊ីប៉ុណ្ណោះ។ អញ្ចឹងខ្ញុំគិតថាមិនជោគជ័យទេ»។
ទាក់ទងបញ្ហានេះ លោកនាយករដ្ឋមន្ត្រី ហ៊ុន សែន ក៏បានលើកឡើងអំពីការផ្ទេរមុខងាររវាងក្រសួងបរិស្ថាន និងក្រសួងរុក្ខប្រម៉ាញ់ និងនេសាទ ឱ្យបានឆាប់រហ័ស និងទាន់ពេលវេលា ដើម្បីទប់ស្កាតការកើនឡើងនៃបទល្មើសព្រៃឈើ និងការគ្រប់គ្រងដីសម្បទានសេដ្ឋកិច្ចផងដែរ៕
