ស្ត្រីរងគ្រោះដោយសារប្តីរបស់ខ្លួនជះទឹកអាស៊ីត អ្នកស្រី ស៊ុំ សុខនី បានប្រាប់វិទ្យុស្រី្តនៅថ្ងៃទី២៤ ខែកុម្ភៈនេះថា ជនដៃដល់ដែលត្រូវជាប្តីរបស់អ្នកស្រី បានព្យាយាមទាក់ទងតាមទូរស័ព្ទរកអ្នកស្រី ដោយលួម លោមសុំរួមរស់ជានាគ្នាវិញ នឹងបានសន្យាធានាផ្គត់ផ្គង់ផ្នែកជីវភាពដល់អ្នកស្រីផងដែរ។
ជាងនេះទៅទៀតអ្នកស្រីថា ជនដៃដល់ជាស្វាមីនោះ ក៏បានសន្យាថានឹងធានាចិញ្ចឹមអ្នកស្រីក្រោយចេញពីមន្ទីរពេទ្យផងដែរ។ អ្នកស្រីបន្ថែមថា ជនដៃដល់ថែមទាំងបានប្រលយពាក្យសម្ដីដាក់អ្នកស្រីថា សមត្ថកិច្ច គឺគ្មានថ្ងៃចាប់ខ្លួនគាត់បាននោះបានឡើយ។ អ្នកស្រី ស៊ុំ សុខនី៖ «គាត់គ្រាន់តែនិយាយថា សុំទោសដែលគាត់បានធ្វើអញ្ចឹង ហើយសួរខ្ញុំថាខ្ញុំខឹងអត់។ មួយទៀតគាត់ថា បើខ្ញុំគតិល្អជាមួយគេ គេអាចចិញ្ចឹម»។
ទាក់ទងនឹងបញ្ហាជនល្មើស សុំក្តីអនុគ្រោះពីជនរងគ្រោះនេះ លោក អំ សំអាត ប្រធានផ្នែកបច្ចេកទេសឃ្លាំមើលការរំលោភសិទ្ធិមនុស្សរបស់អង្គការលីកាដូលើកឡើងថា ក្នុងករណីជះទឹកអាស៊ីតនេះ គឺជាបទល្មើសព្រហ្មទណ្ឌ ដូច្នេះជនរងគ្រោះមិនអាចដកបណ្ដឹងអាជ្ញាហើយរួមរស់ជាមួយជាប្តីដែលជាជនដៃដល់បានទេ ព្រោះព្រះរាជអាជ្ញានៅតែបន្តតាមនីតិវិធីច្បាប់។
លោក អំ សំអាត បន្តថា អាជ្ញាធរត្រូវពន្លឿនសកម្មភាពតាមចាប់ខ្លួនជនដៃដល់ឱ្យបាន ព្រោះតាមរយៈរូបភាពលួមលោមផង និងគំរាមកំហែងផងពីសំណាក់ជនដៃដល់មកលើស្ត្រីរងគ្រោះបែបនេះ គឺរឹតតែធ្វើឱ្យជនរងគ្រោះកាន់តែភ័យខ្លាចពី សុខសុវត្ថិភាពផ្ទាល់ខ្លួន៖ «មិនអាចដកបណ្ដឹងហើយរួមរស់បានទេ ពីព្រោះបទល្មើសត្រូវតែអនុវត្តតាមផ្លូវច្បាប់ បើចង់រួមរស់ត្រូវតែអនុវត្តមានច្បាប់សិន»។
ស្ត្រីរងគ្រោះអ្នកស្រី ស៊ុំ សុខនី បានឱ្យដឹងទៀតថា អ្នកស្រីបានផ្តល់លេខទូរស័ព្ទរបស់ជនដៃដល់ឱ្យសមត្ថកិច្ចរួមហើយ តែរហូតមកដល់ពេលនេះ សមត្ថកិច្ចនៅតែមិនទាន់អាចស្វែងរកចាប់ខ្លួនជនបង្កបាននៅឡើយ។ អ្នកស្រី សុខនី បន្តថា អ្នកស្រីមានការព្រួយបារម្ភពីសុវត្ថិភាពផ្ទាល់ខ្លួនយ៉ាងខ្លាំង ដោយខ្លាចប្តីរបស់ខ្លួនតាមយាយីអាយុជីវិតតទៅទៀត ព្រោះអ្នកស្រីជិតដល់ថ្ងៃចាកចេញពីមន្ទីរពេទ្យហើយ។
អ្នកស្រី ស៊ុំ សុខនី៖ «គាត់ថាខ្ញុំហ្នឹងរាល់ថ្ងៃកំពុងតាមចាប់គេ គឺចាប់មិនបានទេ ឥឡូវខ្ញុំនៅតែមានការព្រួយបារម្មណ៍អញ្ចឹង ព្រោះពេលវេលាវាកាន់តែយូរទៅៗ ឥឡូវជិតកន្លះខែទៅហើយតែនៅតែមិនទាន់ដឹងដំណឹង»។
ជុំវិញបញ្ហានេះ លោក ម៉ៅ សាវឿន នាយប៉ុស្ដិ៍សង្កាត់ស្ទឹងមានជ័យ ក៏បានបញ្ជាក់ប្រាប់វិទ្យុស្ត្រីថា រហូតមកដល់ពេលនេះសមត្ថកិច្ចមិនទាន់មានពន្លឺអ្វីពីជនដៃដល់នោះទេ។ តែយ៉ាងណាលោក ម៉ៅ សាវឿន បញ្ជាក់ថា លោកនឹងព្យាយាមស្វែងរកចាប់ខ្លួនជនដៃដល់ឱ្យបាន ខណៈដែលទទួលបានតម្រុយថា ជនល្មើសបានទាក់ទងតាមទូរស័ព្ទមកជនរងគ្រោះ។
លោក ម៉ៅ សាវឿន៖ «យើងស្រាវជ្រាវលុះត្រាតែលេខហ្នឹងវាដាក់អត្តសញ្ញាណបណ្ណ បើសិនវាមិនដាក់អត្តសញ្ញាណបណ្ណទេ យើងគ្រាន់តែដឹងថាហៅចេញតំបន់ណា បើថាឱ្យដឹងចំណុចណាដែលទៅចាប់វាហ្មង គឺមិនទាន់មានទេ ហើយអាហ្នឹងជាកិច្ចការផ្ទៃក្នុងរបស់ជំនាញហ្នឹងទាល់ទេស្នើសូមទៅថ្នាក់លើទីពិនិត្យលេខហ្នឹង»។
គួររំឭកថា កាលពីយប់ថ្ងៃចន្ទ ទី៨ ខែកុម្ភៈ លោក ង៉ែត ផល្លា អាយុ ២៧ ឆ្នាំ បានគប់ទឹកអាស៊ីតសំដៅលើប្រពន្ធរបស់ខ្លួនឈ្មោះ ស៊ុំ សុខនី អាយុ ២៣ ឆ្នាំ បណ្តាលឱ្យមានរបួសយ៉ាងធ្ងន់ធ្ងរ។ ករណីនេះកើតឡើងកំលុងពេលតែប៉ុន្មានថ្ងៃប៉ុណ្ណោះបន្ទាប់ពីអ្នកស្រី សុខនី បាននិយាយថាប្តីរបស់គាត់បានយល់ព្រមលែងលះជាមួយអ្នកស្រី។ នគរបាលដាក់ការសង្ស័យថា ទឹកអាស៊ីតដែលជះមកលើអ្នកស្រី ស៊ុំ សុខនី នោះគឺយកពីអាគុយម៉ូតូ៕
