ភ្នំពេញ៖ នាពេលបច្ចុប្បន្នប្រជាពលរដ្ឋរស់នៅអមសងខាងផ្លូវជាតិលេខ ៤ មានការព្រួយបារម្ភខ្លាំង អំពីបញ្ហាគ្រោះថ្នាក់ចរាចរណ៍ ខណៈរថយន្តធំៗ ឬកុងតឺន័រ បើកបរហូសល្បឿនកំណត់ និងមិនគោរពច្បាប់ចរាចរណ៍។ ប្រជាពលរដ្ឋអំពាវនាវ ដល់ស្ថានប័នពាក់ព័ន្ធជួយត្រួតពិនិត្យ និងចាត់វិធានការជាបន្ទាន់ចំពោះម្ចាស់រថយន្តធុនធំណា ដែលបើកបរមិនគោរពច្បាប់ និងពួកគាត់ថា ប្រសិនជាអាចស្នើឱ្យរដ្ឋាភិបាល បញ្ឈប់ចរាចរណ៍រថយន្តកុងតឺន័រលើផ្លូវជាតិលេង ៤ នេះ ដើម្បីកាត់បន្ថយគ្រោះថ្នាក់ចរាចរណ៍។
ជាបន្តសូមនាងកញ្ញា លោក លោកស្រី អញ្ជើញស្តាបបទយកការណ៍ដែលរៀបចំឡើងដោយលោក មឿន ឌីណា ដូចតទៅ៖
ពលរដ្ឋរស់នៅសង្កាត់កំបូល ខ័ណ្ឌពោធិ៍សែនជ័យ អ្នកស្រី សៀវ មាន ប្រកបមុខរបរជា អ្នកលក់ឥវ៉ាន់នៅតាមដងផ្លូវជាតិលេខ ៤ សង្កេតឃើញថា អ្នកបើកបររថយន្តកុងតឺន័រភាគច្រើនមានវ័យក្មេង បើកបរមិនសូវប្រុងប្រយ័ត្ន ជាពិសេសបើកបរហូសល្បឿនកំនត់ទៀតផង។ អ្នកស្រីបន្តថា ជារៀយៗនៅលើផ្លូវជាតិលេខ ៤ នេះ មានគ្រោះថ្នាក់ចរាចរណ៍មិនសូវដាច់នោះទេ គឺស្ទើរតែរៀងរាល់ថ្ងៃ ព្រោះម្ចាស់រថយន្តធុនធំបើកមិនគោរពច្បាប់ចរាចណ៍ជាពិសេសនៅពេលយប់។
«ចំពោះកុងតឺន័រវិញ ប្រសិនជាគាត់កុំបើកបរក្នុងលក្ខណៈមួយដូចជាក្មេងស្ទាវ គឺបើកបរមានវិជ្ជាជាវៈ ហើយបើកបរមានល្បឿនកំណត់ មិនមានបញ្ហាអ្វីទេ ចំពោះឡាន កុងតឺន័រមួយចំនួនគឺចាប់ហ្វ្រាំងមិនទាន់ទេ បណ្ដាលឱ្យបុកគ្នា នៅចំណែកផ្លូវម្ខាងឡាន និងឡានវ៉ាគ្នាបណ្ដាលឱ្យទៅប៉ះម៉ូតូដែលបើកបញ្ច្រាសផ្លូវគ្នា សូមណូមពរឱ្យឡាន កុងតឺន័របើកបរគោរពច្បាប់ចរាចរណ៍»។
ប្រជាពលរដ្ឋម្នាក់ទៀត ជាជាងជួសជុលម៉ូតូរស់នៅសង្កាត់ចោមចៅ ខណ្ឌពោធិ៍សែនជ័យ រស់នៅតាមផ្លូវជាតិលេខ ៤ នេះដែរ គឺលោក មករា ក៏បានលើកឡើងស្រដៀងគ្នាទៅនឹងអ្នកស្រី សៀវ មានផងដែរ។ លោក មករា បាននិយាយថា នៅពេលយប់ម្ដងៗ រថយន្តកុងតឺន័រ បើកបរក្នុងល្បឿនលឿន ហើយមិនសូវគោរពសិទ្ធិអ្នកដទៃដែលធ្វើដំណើរលើដងផ្លូវជាមួយគ្នាឡើយ។ ជាការកត់សម្គាល់របស់លោក មករា គ្រោះថ្នាក់ចរាចរណ៍នៅលើផ្លូវជាតិលេខ ៤ នេះ មិនមានការស្រាកស្រាន្តឡើយ និយាយជារួមគឺគ្រោះថ្នាក់ចរាចរណ៍ជារៀងរាល់ថ្ងៃ។
«ឡានកុងតឺន័រនៅពេលយប់ប្រលប់បើកបរមិនសូវគោរពច្បាប់ ហើយបើកបរលឿនៗមិនដែលបន្ថយល្បឿន ចង់និយាយគឺបើកបរឱ្យមានការគោរពសិទ្ធគ្នាទៅវិញទៅមកនៅពេលយប់ឱ្យបើកក្នុងល្បឿនដែលបានកំណត់ ជៀសវាងគ្រោះថ្នាក់ ហើយបានឃើញហេតុការគ្រោះថ្នាក់ចរាចរណ៍នៅលើផ្លូវជាតិលេខ ៤ ស្ទើរជារៀងរាល់ថ្ងៃ បើកលឿនជាពិសេសគឺឡានកុងតឺន័រ»។
ចំណែកអ្នកស្រី វណ្ណី មានអាយុ ៥៨ រស់នៅសង្កាត់ឱឡោក ខណ្ឌពោធិ៍សែនជ័យ បាននិយាយថា នៅលើដងផ្លូវជាតិលេខ ៤ មានគ្រោះថ្នាក់ចរាចរណ៍ជារៀងរាល់ថ្ងៃ គឺបណ្តាលមកពីរថយន្តកុងតឺន័រ បើបរមិនគោរពច្បាប់។ ជាកម្មការិនីក្នុងរោងចក្រចំណីសត្វម្នាក់ អ្នកស្រី វណ្ណី ស្នើឱ្យរដ្ឋាភិបាលត្រួតពិនិត្យឡើងវិញនូវល្បឿនបើកបររបស់រថយន្តកុងតឺន័រ ដើម្បីបង្ការគ្រោះថ្នាក់ចរាចរណ៍នៅលើដងផ្លូវជាតិលេខ ៤នេះ។
លើសពីនេះទៀត អ្នកស្រីថា ប្រសិនជាអាចបញ្ឈប់ការចរាចណ៍រថយន្តធុនធំនៅលើផ្លូវនេះ រិតតែជាការប្រសើរ៖ «ប្រសិនជាមានការបញ្ឈប់ឡានកុងតឺន័របើកលើផ្លួវជាតិលេខ ៤ គឺមានការត្រេកអរ ពីព្រោះឡានកុងតឺន័រ បើកសាហាវហើយលឿនៗ មិនបានឃើញអ្នកឆ្លងកាត់ផ្លូវម្ខាងទៅម្ខាងទៀត ហើយមិនបន្ថយល្បឿន អាងតែខ្លួនធំលើសគេ»។
«មិនអាចទំលាក់កំហុសតែទៅលើអ្នកបើកបររថយន្តកុងតឺន័រតែម្នាក់នោះទេ អ្នកបើបររថយន្តធុនតូច និងទោចក្រក្រយាន្តជាដើម ក៏មិនសូវគោរពច្បាប់ចរាចរណ៍នោះដែរ»។ នេះជាការលើកឡើងរបស់លោក ឈឹម ចិន្តា អ្នករត់រ៉ឺម៉កកង់បីមួយរូប រស់នៅភូមិព្រែកព្រីងខាងជើង សង្កាត់ចោមចៅ ខ័ណ្ឌពោធិ៍សែនជ័យ។
ជាអ្នករត់រ៉ឺម៉កកង់បី នៅលើដងផ្លូវជាតិលេខ ៤ ជារៀងរាល់ថ្ងៃ លោក ឈឹម ចិន្តា លើកឡើងថា ជូនកាលគ្រោះថ្នាក់ចរាចរណ៍បង្កឡើងដោយម៉ូតូ ឬឡានតូច ដែលបើកបរ មិនគោរពច្បាប់ចរាចរណ៍ តែនៅពេលដែលមានគ្រោះថ្នាក់តែងតែបន្ទោសរថយន្តធំជានិច្ច។
«បើបន្ទោសតែឡានកុងតឺន័រក៏មិនកើតដែរ មានតៃកុងខ្លះក៏បើកបរល្អដែរបើយើងយកភាគច្រើនវិញខ្ញុំរកស៊ីតាមផ្លូវ រត់រ៉ឺម៉កកង់បីភាគច្រើនបណ្ដាលមកពីក្មេងស្ទាវបើថាគ្រោះបណ្ដាលមកពីម៉ូតូ ជួនកាលមានឡានកុងតឺន័រទាំងសងខាង ហើយជ្រែ ហើយដល់ពេលប៉ះដៃចង្កូតគ្នាក៏ចូលទៅក្នុងឡានមិនអាចបន្ទោសឡានកុងតឺន័របានទេ»។
លោក ស្រេង វ៉ា ជាប្រជាពលរដ្ឋ រស់នៅឃុំបែកចាន ស្រុកអង្គស្នួលខេត្តកណ្ដាល បានបញ្ចេញជាទស្សនៈដែរថា ផ្លូវជាតិលេខ ៤ ជាផ្លូវមួយ ដែលរថយន្តកុងតឺន័របើកបរដឹកទំនិញពីខេត្តព្រះសីហនុឡើងទៅភ្នំពេញ ឬពីភ្នំពេញទៅខេត្តព្រះសីហនុ។
ដូច្នេះពិបាកនឹងស្នើសុំឱ្យបញ្ឈប់បើកបរចំពោះរថយន្តធុនធំនៅលើផ្លូវនេះណាស់។
ប៉ុន្តែជាយោបល់របស់លោក ស្រេង វ៉ា លោកថា រាល់ទំនិញទាំងអស់គួរតែបង្វែរដឹកតាមផ្លូវរថភ្លើងវិញ ទើបអាចកាត់បន្ថយការចរាចរណ៍រថយន្តកុងតឺន័រ នៅលើផ្លូវជាតិលេង៤ និងអាចកាត់បន្ថយគ្រោះថ្នាក់ចរាចរណ៍បានមួយកម្រិតផងដែរ។
«វាត្រូវតែមានឡានកុងតឺន័រមកពីកំពង់សោម បើកតាមផ្លូវជាតិលេខ ៤ បើមិនឱ្យបើកតាមផ្លូវនេះលើកលែងតែដាក់ទំនិញតាមរថភ្លើងវិញ នោះកាត់បន្ថយការកកស្ទះ និងគ្រោះថ្នាក់ចរាចរណ៍ពីព្រោះនៅលើកំណាត់ផ្លូវនេះមានឡានមួយចំនួនមិនមានការគោរពច្បាប់ និងបើកជែងគ្នាពេញតែផ្លូវ ហើយសូមណូមពរ គ្រប់រថយន្ដទាំងអស់មានការគោរពច្បាប់»។
ជុំវិញបញ្ហាគ្រោះថ្នាក់ចរាចរណ៍នៅតាមដងផ្លូវជាតិលេខ ៤ នេះ លោក ភ័ក្តិ ជាអ្នកបើកបររថយន្តកុងតឺន័រ ពីក្រុងព្រះសីហនុ-ភ្នំពេញ ច្រានចោលចំពោះការរិះគន់នេះ។ លោកថា ប្រជាពលរដ្ឋដែលរស់នៅតាមបណ្តោយផ្លូវជាតិលេខ ៤ មិនត្រូវបន្ទោសតែចំពោះអ្នកបើកបររថយន្តកុងតឺន័រទាំងស្រុងនោះទេ ជូនកាលអ្នកបើកបរ រថយន្តខា្នតតូច ឬម៉ូតូ ជាអ្នកបង្កទៅវិញទេ។
លោកបន្ថែមថា រថយន្តកុងតឺន័រមានសារៈសំខាន់ណាស់ ព្រោះប្រើសម្រាប់ដឹកទំនិញទូទៅទាំងធំ ទាំងតូចមិនអាចខ្វះបានឡើយ៖ «តាមការពិតទៅបើមកបន្ទោសតែឡាន ក៏មិនត្រូវ ឡានកុងតឺន័របើកទៅតាមធម្មតា មិនមានបំពានផង ហើយប្រជាជនៅតាមផ្លូវជាតិលេខ ៤ ហ្នឹង គាត់ជិះម៉ូតូមិនខ្លាចឡានបន្តិចផងហ្នឹង ហើយឡានយើងត្រូវដឹកឥវ៉ាន់ធ្ងន់ ពេលទំនិញទាំងអស់មិនឡើងចេញពីផ្លូវជាតិលេខ ៤ ដឹកចេញពីកំពង់សោម កោះកុង ស្រែអំបិលចេញពីហ្នឹងទាំងអស់ បើឱ្យឈប់បើករផ្លូវហ្នឹងចឹងឱ្យឡានធំដឹកតាមផ្លូវណា បើឱ្យរត់តាមផ្លូវជាតិលេខ ៣ ផ្លូវជាតិលេខ ៣ ផ្ទះប្រជាជនមានដូចតែគ្នាហ្នឹង បើមិនឱ្យរត់តាមផ្លូវហ្នឹង ចឹងមានតែធ្វើផ្លូវ highway មួយទៅចឹងសម្រាប់ឡានធំ»។
ចំណែកអ្នកបើកបររថយន្តកុងតឺន័រមួយរូបទៀត គឺលោក ផានី បានបញ្ចេញទស្សនៈយ៉ាងដូច្នេះថា៖ «អារឿងឡានកុងតឺន័រ ឡានធំអី បើកឱ្យបើកឈ្លើយ ឱ្យបើកលឿនមិនមានទេពីព្រោះរាល់ថ្ងៃនេះបើកអត់បានលឿនទេ ហើយតែឡានធំ ខ្ញុំបើកជិតម្ភៃឆ្នាំហើយមិនដែលមានបញ្ហាអីទេ»។
ទាក់ទងនឹងបញ្ហានេះ លោក អ៊ា ចរិយ៉ា នាយកវិទ្យាស្ថានសុវត្ថិភាពចរាចរណ៍ផ្លូវគោក មានប្រសាសន៍ថា ការហាមឃាត់មិនឱ្យរថយន្តកុងតឺន័របើកបរលើផ្លូវជាតិលេខ ៤ គឺមិនមែនជាការងាយស្រួលទេ ព្រោះផ្លូវជាតិនេះ ប្រើសម្រាប់ដឹកទំនិញឡើងចុះពីខេត្តព្រះសីហនុមករាជធានីភ្នំពេញ។ លោកបន្តថា ប្រសិនបើចង់បញ្ចៀសពីការដឹកទំនិញតាមដងផ្លូវជាតិនេះ លុះត្រាតែរដ្ឋាភិបាមានដំណោះស្រាយ ដឹកទំនិញទាំងឡាយតាមរថភ្លើងវិញ ទើបអាចកាត់បន្ថយការដឹកតាមផ្លូវបាន។
«ខ្ញុំគិតថាការដែលស្នើសុំ កុំឱ្យមានឡានកុងតឺន័រនេះ លុះត្រាតែរដ្ឋភិបាលមានដំណោះស្រាយ ហើយក្រុមហ៊ុនទាំងអស់ហ្នឹងអាចដឹកតាមមធ្យោបាយផ្សេង ហើយដំណោះស្រាយមួយយើងជំរុញឱ្យមានការដឺកជញ្ជូនតាមរទេសភ្លើង វាអាចនឹងកាត់បន្ថយចំនួនការដឹកជញ្ជូនតាមផ្លូវហ្នឹងដែរ ទើបអាចកាត់បន្ថយចំនួនកុងតឺន័រនោះបាន»។
ចំណែក លោក ផែង សុវិជ្ជានោ អនុរដ្ឋលេខាធិការ ក្រសួងសាធារណៈការ និងដឹងជញ្ជូន និងជាអ្នកនាំពាក្យ បានមានប្រសាសន៍ថា ផ្លូវជាតិលេខ ៤ គឺជាផ្លូវសេដ្ឋកិច្ចដ៏សំខាន់មួយនៃប្រទេសកម្ពុជា និងជាផ្លូវទីផ្សារអន្ដរជាតិ។ ដូច្នេះ អនុរដ្ឋលេខាធិការ ក្រសួងសាធារណៈការ និងដឹងជញ្ជូន និងជាអ្នកនាំពាក្យរូបនេះថា ក្រសួងមិនអាចហាមឃាត់រថយន្តកុងតឺមិនឱ្យបើកបរលើផ្លូវនេះ បានឡើយ។ លោកបាន សំណូមពរទៅដល់ប្រជាពលរដ្ឋដែលរស់នៅអមតាមសងខាងផ្លូវជាតិលេខ៤នេះ មានការប្រុងប្រយ័ត្នអំពីសុវត្ថិភាពឱ្យខ្ពស់បំផុត និងមានការយោគយល់គ្នា ជាពិសេសត្រូវចេះអធ្យាស្រ័យគ្នា ចំពោះអ្នកបើកបរនៅលើដងផ្លូវ ដើម្បីបញ្ចៀសការកកស្ទះ និងគ្រោះថ្នាក់ចរាចរណ៍ជាយកថាហេតុ។
ផ្លូវជាតិលេខ ៤ គឺជាផ្លូវជាតិដ៏សំខាន់របស់ប្រទេសកម្ពុជា ហើយផ្លូវនេះគឺជាផ្លូវសំខាន់សម្រាប់ដឹកទំនិញនាំចេញរបស់ប្រទេសកម្ពុជា ទៅកាន់ទីផ្សារអន្ដរជាតិ ឥឡូវនេះបានរៀបចំដើម្បីឱ្យវាមានសុវត្ថិភាពចរាចរណ៍ល្អឡើងនៅលើផ្លូវជាតិលេខ ៤ នេះ ប៉ុន្តែក៏សូមឱ្យអ្នកដែលរស់នៅផ្លូវជាតិហ្នឹងដែរ ត្រូវធ្វើការយោគយល់ពិចារណាទៅដល់ការរស់នៅ និងត្រូវយល់វិញថា បើឃាត់កុងតឺន័រដឹក គឺមិនអាចទៅរួចទេ ត្រូវតែអនុញ្ញាត»។
ទោះជាយ៉ាងណាប្រជាពលរដ្ឋដែលរស់នៅអមតាមសងខាងផ្លូវជាតិលេខ ៤ នៅតែទទូចឱ្យរដ្ឋាភិបាល ដាក់ពិន័យឱ្យបានតឹងរឹងទៅលើអ្នកបើកបរទាំងឡាយណា ដែលបើកបរលើសល្បឿនកំណត់ ជាពិសេសដាក់ទោសឱ្យធ្ងន់ធ្ងរ ចំពោះអ្នកបើកបរដោយមិនគោរពច្បាប់ចរាចរណ៍៕
