ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យនៃក្រសួងសុខាភិបាល លោកវេជ្ជបណ្ឌិត លី សូវ៉ាន់ បានអះអាងថា វីរុសហ្ស៊ីកា (zika) មិនមែនជាជំងឺធ្ងន់ធ្ងរទេ អ្នកដែលកើតជំងឺនេះនឹងជាធម្មតាវិញ ក្នុងរយៈពេល៧ថ្ងៃប៉ុណ្ណោះ។ ការអះអាងរបស់លោក លី សូវ៉ាន់ នេះ ធ្វើឡើងនៅក្នុងសិក្ខាសាលាផ្សព្វផ្សាយស្តីពីជំងឺហ្ស៊ីកា (zika) ជូនដល់អ្នកសារព័ត៌មាន នៅថ្ងៃទី១៨ ខែកុម្ភៈ ឆ្នាំ២០១៦នេះ នៅវិទ្យាស្ថានជាតិសុខភាពសាធារណៈ ដើម្បីផ្សព្វផ្សាយកុំឱ្យប្រជាពលរដ្ឋមានការភ័យខ្លាច។
កញ្ញាឆេង ណាតា រាយការណ៍ព័ត៌មាននេះ ៖
ជំងឺហ្ស៊ីកា (zika) គឺជាជំងឺធម្មតាមួយ មានទម្រង់ស្រាល និងមិនមានការព្យាបាលជាក់លាក់ណាមួយនោះទេ។ នេះបើតាមការបញ្ជាក់របស់លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យនៃក្រសួងសុខាភិបាល។
ថ្លែងទៅកាន់អ្នកសារព័ត៌មាន ដែលបានមកទទួលការបណ្តុះបណ្តាលនៅថ្ងៃនេះ លោកវេជ្ជបណ្ឌិត លី សូវ៉ាន់ បានឱ្យដឹងថា បើទោះបីជាមានអ្នកបានឆ្លងវីរុសហ្ស៊ីកានេះក៏ដោយ ប៉ុន្តែ ៨០% នៃអ្នកជំងឺ មិនចេញរោគសញ្ញានោះទេ មានតែ ២០% ប៉ុណ្ណោះដែលមានចេញរោគសញ្ញា។
លោកបន្តថា រោគសញ្ញានៃជំងឺនេះ គឺស្រដៀងគ្នាទៅនឹងជំងឺគ្រុនឈាម ដោយអ្នកជំងឺនឹងមាន គ្រុនក្តៅ ឈឺក្បាល មានកន្ទួលក្រហមលើស្បែក ក្រហមភ្នែក ឈឺសាច់ដុំ ហើយជួនកាលឈឺសន្លាក់ និងមានភាពល្ហិតល្ហៃ។ លោកថា រោគសញ្ញាទាំងនេះ នឹងជាធម្មតាវិញដោយឯងៗ ក្នុងរយៈពេល ២ ទៅ ៧ ថ្ងៃ ដោយគ្រាន់តែប្រើនូវឱសថបន្ថយការឈឺចាប់ បន្ថយកំដៅ និងត្រូវញ៉ាំទឹកឱ្យបានច្រើនប៉ុណ្ណោះ។
លោកវេជ្ជបណ្ឌិត បានបញ្ជាក់ទៀតថា បច្ចុប្បន្ននេះកម្រិតនៃជំងឺហ្ស៊ីកា នៅកម្ពុជា មានហានីភ័យទាបនៅឡើយ។ ហើយគេមិនទាន់មានភស្តុតាងណាមួយ បញ្ជាក់ថា វីរុស ហ្ស៊ីកា ឆ្លងពីមនុស្សទៅមនុស្សដូចគ្នាដែរ។
សូមជម្រាបថា នៅថ្ងៃទី១៨ កុម្ភៈនេះ នាយកដ្ឋានប្រយុទ្ធនឹងជំងឺឆ្លង បានធ្វើការបណ្តុះបណ្តាលទៅដល់អ្នកសារព័ត៌មាន ប្រមាណ ៣០នាក់ មកពីប្រព័ន្ធផ្សព្វផ្សាយផ្សេងៗ ដើម្បីបានយល់ដឹង និងផ្សព្វផ្សាយឱ្យបានត្រឹមត្រូវ ដើម្បីឱ្យប្រជាពលរដ្ឋយល់ដឹងពីជំងឺ ហ្ស៊ីកានេះ ជៀសវាងការយល់ច្រឡំ ទៅលើការផ្សព្វផ្សាយពីប្រភពដែលមិនច្បាស់លាស់មួយចំនួន។
ចំណែក លោកស្រីវេជ្ជបណ្ឌិត តេង ស្រី អនុប្រធាននាយកដ្ឋានប្រយុទ្ធនឹងជំងឺឆ្លង បានឱ្យដឹងថា បច្ចុប្បន្ននេះ គ្មានវ៉ាក់សាំងសម្រាប់ព្យាបាលវីរុស ហ្ស៊ីកា ទេ។ លោកស្រីបន្តថា ស្ត្រីមានផ្ទៃពោះមានហានីភ័យខ្ពស់ ដោយសារតែវីរុស ហ្ស៊ីកា ធ្វើឱ្យខូចខួក្បាល និងប្រព័ន្ធសរសៃប្រសាទទារកនៅក្នុងផ្ទៃ និងអាចបណ្តាលឱ្យទារកស្លាប់ក្នុងផ្ទៃ ឬមានក្បាលតូច។
យ៉ាងណាមិញ លោកស្រីថា នៅកម្ពុជាវីរុសហ្ស៊ីកា បានកើតឡើងតែមួយករណីប៉ុណ្ណោះ កាលពីឆ្នាំ ២០១០ ហើយអ្នកជំងឺមានលក្ខណៈស្រាល មិនបណ្តាលឱ្យស្លាប់នោះទេ។
អនុប្រធាននាយកដ្ឋានប្រយុទ្ធនឹងជំងឺឆ្លងរូបនេះ បានឱ្យដឹងទៀតថា ដើម្បីទប់ស្កាត់កុំឱ្យកើតជំងឺ ហ្ស៊ីកា គឺត្រូវបង្ការខ្លួនកុំឱ្យមូសខ្លាខាំ។ ហើយដើម្បីកុំឱ្យមូសខាំ ត្រូវបំបាត់ជម្រកមូសខ្លា ដោយត្រូវដាក់អាបែតក្នុងពាង ឬអាងទឹក លុបថ្លុកទឹកដក់ សម្អាតលំនៅដ្ឋានកុំឱ្យមានព្រៃស្តុក ស្លៀកពាក់ខោអាវវែងៗ ប្រើថ្នាំកុំឱ្យមូសខ្លាមកជិតបាន និងត្រូវដេកក្នុងមុងទាំងយប់ទាំងថ្ងៃ។
លោកវេជ្ជបណ្ឌិត លី សូវ៉ាន់ បានអំពាវនាវទៅដល់ប្រជាពលរដ្ឋទាំងអស់ ត្រូវតាមដានឱ្យជាប់ជានិច្ចអំពីការវិវត្តនៃជំងឺនេះ ដោយផ្អែកតាមប្រភពច្បាស់លាស់ ដើម្បីជៀសវាងការយល់ច្រលំផ្សេងៗ និងចូលរួមទាំងអស់គ្នា ក្នុងការបំបាត់ជម្រកមូសខ្លា ដើម្បីបង្ការពីជំងឺហ្ស៊ីកា និងជំងឺគ្រុនឈាម។
សូមបញ្ជាក់ថា វីរុសហ្ស៊ីកា ជាវីរុសដែលចម្លងតាមរយៈមូសខ្លាញី ។ វីរុសនេះ គេរកឃើញដំបូងនៅលើសត្វស្វានៅក្នុងទ្វីបអាហ្វ្រិក ក្នុងឆ្នាំ១៩៤៧ តាមរយៈការតាមដាននៃជំងឺគ្រុនលឿង ហើយបន្ទាប់មករកឃើញនៅក្នុងខ្លួនមនុស្សក្នុងឆ្នាំ១៩៥២។ បច្ចុប្បន្ននេះ វីរុស ហ្ស៊ីកា Zika កំពុងរាត្បាតនៅប្រទេសក្នុងតំបន់អាមេរិក ខាងត្បូង និងកណ្តាល។ ការរាត្បាតនេះ រីកខ្លាំងឡើង បន្ទាប់ពីមានការប្រកួតកីឡាបាល់ទាត់ពិភពលោកនៅប្រទេសប្រេស៊ីលពីឆ្នាំ២០១៤៕
