ភ្នំពេញ៖ ស្ទើរជារៀងរាល់ថ្ងៃ រូបភាពគ្រោះថ្នាក់មានលក្ខណៈសាហាវ រន្ធត់ រូបអាក្រាតជាដើម កំពុងពេញនិយមផ្សព្វផ្សាយក្នុងសារព័ត៌មានមួយចំនួននៅកម្ពុជា ដោយរូបភាពទាំងនោះ កំពុងបង្ហាញពីកង្វះវិជ្ជាជីវៈ និងក្រមសីលធម៌របស់អ្នកកាសែត ឬស្ថាប័នសារព័ត៌មានផងដែរ។
លម្អិតព័ត៌មានដោយ លោក សាក់ សំណាង៖
មិនតែប៉ុណ្ណោះ រូបភាពបង្ហាញឱ្យឃើញពីភាពភ័យរន្ធត់ រូបអាសអាភាសផ្សេងៗក្នុងសារព័ត៌មាន កំពុងធ្វើឱ្យប៉ះពាល់ផ្លូវចិត្តប្រជាពលរដ្ឋយ៉ាងខ្លាំង។ នេះជាការលើកឡើងរបស់ អ្នកជំនាញសារព័ត៌មាន និងសង្គមស៊ីវិលនៅកម្ពុជា។
អ្នកជំនាញសារព័ត៌មាន សង្គមស៊ីវិលធ្វើការងារពាក់ព័ន្ធស្ត្រី អ្នកចិត្តសាស្ត្រ បានលើកឡើងថា រូបភាពគ្រោះថ្នាក់មានលក្ខណៈសាហាវ រូបភាពធ្វើឱ្យរន្ធត់ រូបអាក្រាតកាយជាដើម កំពុងពេញនិយមផ្សព្វផ្សាយក្នុងសារព័ត៌មានមួយចំនួននៅកម្ពុជា កំពុងបង្ហាញពីកង្វះវិជ្ជាជីវៈ និងក្រមសីលធម៌របស់អ្នកកាសែត ឬស្ថាប័នសារព័ត៌មាន។
លោក ប៉ែន បូណា ប្រធានក្លឹបអ្នកកាសែតកម្ពុជា មានប្រសាសន៍ថា រូបភាពដែលសារព័ត៌មានប្រើប្រាស់នាពេលបច្ចុប្បន្នមានលក្ខណៈសាហាវ រូបភាពធ្វើឱ្យរន្ធត់ ឬរូបភាពបង្ហាញពីអាក្រាតកាយរបស់ជនរងគ្រោះជាដើម កំពុងបង្ហាញពីភាពទន់ខ្សោយ កង្វះវិជ្ជាជីវៈ និងក្រមសីលធម៌របស់អ្នកសារព័ត៌មាន។
លោកថា ការប្រើដាក់រូបភាពដោយខ្វះក្រមសីលធម៌របស់អ្នកសារព័ត៌មានទាំងនោះ នៅលើទំព័រសារព័ត៌មាន ព្រោះស្ថាប័នសារព័ត៌មានគិតថា នឹងទាញរកចំណូលបានច្រើនពីអត្ថបទសារព័ត៌មានទាំងនោះ។
ប្រធានក្លឹបអ្នកសែតរូបនេះ មានប្រសាសសន៍បន្តទៀតថា អ្នកសារព័ត៌មានគួរតែគោរពក្រមសីលធម៌វិជ្ជាជីវៈរបស់ខ្លួនឱ្យបានត្រឹមត្រូវ ព្រោះការប្រើប្រាស់រូបភាពដែលប៉ះពាលអារម្មណ៏ដល់អ្នកទស្សនា អ្នកសារព័ត៌មានត្រូវប្រើរូបភាពនោះ ដោយដាក់មិនឱ្យមានភាពច្បាស់ពេកទេ ដើម្បីកាត់បន្ថយភាពភិតភ័យដល់អ្នកចង់ទស្សនា។
«ក្រមសីលធម៌អ្នកសារព័ត៌មានយើង ហោចណាស់យើងត្រូវមានការកែរូបភាពហឹ្នងយើងត្រូវប្រយ័ត្នប្រយែងមែនទេន យើងមិនត្រូវបង្ហាញរូបភាពអ្វីដែលបង្ហាញឱ្យឃើញពីការសាហាវខ្លាំងពេកមើល ដូចរូបកាត់កមនុស្សស្រស់ៗ ឬក៏គ្រោះថ្នាក់ចរចរាណ៏ បែកខួរ បែកឈាម អើធ្វើឱ្យអ្នកអានរន្ធត់ហា៎ យើងត្រូវបិទបាំងហើយជាក្រមសីលធម៌»។
ទន្ទឹមគ្នានេះដែរ លោក ប៉ែន បូណា បានឱ្យដឹងទៀតថា ជារៀងរាល់ឆ្នាំក្លឹបអ្នកការសែតកម្ពុជា តែងមានការប្រជុំពិភាក្សាជាមួយនិពន្ឋនាយកគ្រប់ស្ថាប័នព័ត៌មាន អំពីការជ្រើសរើសដាក់រូបភាពដែលមិនធ្វើឱ្យប៉ះពាល់ដល់អារម្មណ៏អ្នកសាធារណជន។
ចំណែក លោក សេក បរិសុទ្ឋ ប្រធានក្រុមប្រឹក្សាក្រមសីលធម៌សារព័ត៌មានកម្ពុជា មានប្រសាសន៍ថា ចំពោះរូបលោកផ្ទាល់មិនគាំទ្រឡើយ ចំពោះអ្នកសារព័ត៌មានដែលបានដាក់រូបភាពបង្ហាញពីភាពកាច់សាហាវដល់មហាជន ដូចជារូបភាពកាត់កស្រី្តរងគ្រោះ ឬរូបភាពកាត់ដៃជើង និងរូបភាពមួយចំនួនដែលធ្វើឱ្យប៉ះពាល់ដល់សិទ្ធិសេរីភាពរបស់បុគ្គលណាម្នាក់ជាដើម។
លោក សេក បរិសុទ្ធ បានសង្កត់ធ្ងន់ថា អ្នកសារព័ត៌មានប្រើប្រាស់រូបភាពកាចសាហាវ គឺកំពុងតែធ្វើការងារខុសចំពោះក្រមសីលធម៌ជាអ្នកសារព័ត៌មាន៖ «ចឹងយើងគ្រាន់ពិនិត្យមើលឡើងវិញ ហើយចៀសវាង ទី២ សម្រាប់អ្នកមិនមែនជាអ្នកសារព័ត៌មានក៏គាត់គួរយល់ដែរ បើសិនគាត់មិនទាន់យល់ដឹងក៏គាត់ចាប់ផ្តើមរៀនយល់បណ្តើរៗទៅ បើយើងទាំងអស់គ្នាធ្វើតាមគោលការណ៏ ក្រមសីលធម៌ត្រឹមត្រូវទាំងអស់គ្នា ថ្ងៃក្រោយប្រព័ន្ធផ្សព្វផ្សាយសង្គមហ្វេសប៊ុកហ្នឹង ទៅជាមធ្យោបាយជួយរួមចំណែកបានល្អដល់ការកសាងសង្គមរបស់យើងទាំងអស់គ្នា ហ្នឹហើយ បើមិនចឹងទេវាធ្វើឱ្យច្របូកច្របល់ទាំងអស់គ្នា ធ្វើឱ្យខូចខាត់ទៅវិញ»។
លោក សេក បរិសុទ្ធ បានបន្ថែមទៀតថា អ្នកសារព័ត៌មានទាំងអស់ ត្រូវតែគោរពក្រមសីលធម៌របស់ខ្លូនឡើងវិញ មុននឹងដាក់រូបភាពណាមួយផ្សព្វផ្សាយទៅជាសាធារណៈ និងប្រុងប្រយ័ត្នជានិច្ចចំពោះការប្រើប្រាស់រូបភាព។
លោកស្រី រស់ សុភាព នាយិកាអង្គការយេនឌ័រនិងអភិវឌ្ឍន៏ដើម្បីកម្ពុជា ក៏មានប្រសាសន៍ដែរថា អ្នកសារព័ត៌មានត្រូវគោរពក្រមសីលធម៌របស់ខ្លួនឱ្យបានល្អ ចៀសវាសការប្រើប្រាស់រូបភាពសាហាវឃោឃៅ ឬរូបភាពជនរងគ្រោះអាក្រាតផ្សេងៗលើអត្ថបទព័ត៌មាន។
លោកស្រីថា អ្នកសារព័ត៌មាន ឬស្ថាប័នព័ត៌មានគួរប្រើប្រាស់រូបភាពជនប្រព្រឹត្តល្មើសជំនួសឱ្យជនរងគ្រោះប្រសើរជាង៖ «បើរឿងរំលោភសេពសន្ថវៈអីហ្នឹង មិនគួរដាក់រូបអ្នកជាជនរងគ្រោះទេ គួរដាក់រូបជនល្មើសវិញ បើសិនយើងចាប់គាត់មិនទាន់បានយើងស្គាល់អត្តសញ្ញាណគាត់គួរតែយករូបថតគាត់មកដាក់ទៅ ឱ្យគាត់ខ្មាសគេ »។
ទន្ទឹមគ្នានោះដែរ លោក អ៊ុក គឹមសេង អ្នកនាំពាក្យក្រសួងព័ត៌មាន និងអនុរដ្ឋលេខាធិការក្រសួងព័ត៌មាន មានប្រសាសន៍ថា អ្នកសារព័ត៌មាន ឬស្ថាប័នអ្នកសារព័ត៌មានដែលបង្ហោះរូបភាពសាហាវៗ គឺបង្ហាញពីភាពខ្វះខាត់ក្រមសីលធម៌របស់អ្នកខ្លួនជាអ្នកសារព័ត៌មានទៅវិញ។
អ្នកនាំពាក្យក្រសួងព័ត៌មាន និងអនុរដ្ឋលេខាធិការក្រសួងព័ត៌មានរូបនេះ បានបន្តថា លោកមានការសោកស្តាយយ៉ាងខ្លាងចំពោះទង្វើអ្នកសារព័ត៌មានមួយ ដែលខ្វះការពិចារណាមុននឹងបោះពុម្ភអត្ថបទសារព័ត៌មានរបស់ខ្លួន។
លោក អ៊ុក គឹមសេង បានសុំណូមពរដល់អ្នកសារព័ត៌មានទាំងអស់ឱ្យចេះកែរូបភាពទាំងឡាយណាដែលមើលទៅមានភាពសារហាវ ឱ្យមើលទៅជារូបភាពមិនច្បាស់វិញ មុននឹងចុះផ្សាយ៖ «បើសិនគាត់អាចធ្វើទៅបានគាត់ត្រូវចេះ អ៊ីឌីតរូបហ្នឹង យើងមិនឱ្យឃើញកន្លែងណាដែលបង្ហាញពីរូបសាហាវ ឬ ក៏ឃើញឈាម ឃើញកំបុតក ដាច់ភ្លៅទាំងភ្នែនៗចឹងហា៎ គ្រាន់តែធ្វើអ្វីឱ្យព្រាលៗទៅ បើគាត់ត្រូវការផ្សាយចឹង»។
ជាការកត់សម្គាល់ នៅក្នុងសារព័ត៌មានកម្ពុជាមួយចំនួន តែងប្រើប្រាស់រូបភាពលក្ខណៈសាហាវ រូបភាពធ្វើឱ្យរន្ធត់ ឬរូបភាពបង្ហាញពីអាក្រាតកាយរបស់ជនរងគ្រោះជាដើម នៅលើអត្ថបទសារព័ត៌មានរបស់ខ្លួន ដោយភ្លេចគិតដល់ ក្រមសីលធម៌វិជ្ជាជីវៈអ្នកសារព័ត៌មាន៕
