មេធាវី និងមន្ត្រីសម្របសម្រួលអង្គការលីកាដូប្រចាំខេត្តកោះកុងជឿជាក់ថា ចៅក្រមសាលាដំបូងខេត្តកោះកុង នឹងអាចទម្លាក់ការចោទប្រកាន់ពីបទប្រមូលផលអនុផលព្រៃឈើដោយគ្មានលិខិតអនុញ្ញាត និងលុបបំបាត់វត្ថុតាង ទៅលើសមាជិកក្រុមប្រឹក្សាឃុំជំនាប់ និងជាតំណាងសហគមន៍ជនជាតិដើមភាគតិចជងតំបន់អារ៉ែង លោក វ៉ែន វ៉ន បន្ទាប់ពីតុលាការខេត្តកោះកុងបើកសវនការសាកសួរនាព្រឹកថ្ងៃពុធនេះ។
លោក ធូ វិរៈ រាយការណ៍ព័ត៌មាននេះ៖
ក្រោយពីតុលាការខេត្តកោះកុងបញ្ចប់សវនការសាកសួរសមាជិកក្រុមប្រឹក្សាឃុំជំនាប់ និងជាតំណាងសហគមន៍ជនជាតិដើមភាគតិចជង លោក វ៉ែន វ៉ន អស់រយៈពេលជាង ៣ ម៉ោង រួចមក មិនទទួលបានលទ្ធផលនោះទេ ដោយចៅក្រមតុលាការខេត្តកោះកុងសម្រេចលើកពេលជំនុំជំរះទៅថ្ងៃទី៣ ខែមីនា វិញ។
ជុំវិញរឿងក្តីនេះ មេធាវីការពារក្តីលោក វ៉ែន វ៉ន គឺអ្នកស្រី អ៊ិត មធុរ៉ា បានឱ្យដឹងថា កូនក្តីរបស់អ្នកស្រីមិនបានប្រព្រឹត្តិដូចការចោទប្រកាន់របស់តុលាការឡើយ ព្រោះលោក វ៉ែន វ៉ន គ្រាន់តែសាងសង់មជ្ឈមណ្ឌលសហគមន៍មួយក្នុងឃុំជំនាប់ស្ថិតក្នុងតំបន់អារ៉ែង ដើម្បីជាប្រយោជន៍រួមរបស់សហគមន៍ជនជាតិដើមភាគតិចប៉ុណ្ណោះ។
អ្នកស្រីមេធាវី អ៊ិត មធុរ៉ា ជឿជាក់ថា កូនក្តីរបស់អ្នកស្រីអាចនឹងរួចពីការចោទប្រកាន់ ទាំងស្រុងនៅពេលចៅក្រមប្រកាសសាលក្រមនៅថ្ងៃទី៣ ខែមីនា ឆ្នាំ២០១៦ ខាងមុខនេះ។ អ្នកស្រីមេធាវី អ៊ិត មធុរ៉ា និយាយថា៖ «បើយើងវិភាគទៅលើអង្គហេតុ និងអង្គច្បាប់ គឺមានសង្ឃឹមច្រើន ព្រោះគាត់ លោក វ៉ែន វ៉ន មិនបានធ្វើខុសទៅនិងអ្វីដែល ច្បាប់ព្រៃឈើបានចែង ប៉ុន្តែការសម្រេចសេចក្តីសម្រេចទៅលើចៅក្រម»។
ទាក់ទិនបញ្ហានេះ លោក អ៊ិន គង់ជិត មន្ត្រីសម្របសម្រួលអង្គការលីកាដូ (LICADHO) ប្រចាំខេត្តកោះកុង ដែលបានចូលរួមក្នុងសវនការនោះដែរ មានប្រសាសន៍ថា លោក វ៉ែន វ៉ន មានទឹកមុខញញឹមស្រស់ថ្លា និងឆ្លើយសំណួរយ៉ាងម៉ឺងមាត់នៅក្នុងសវនការជំនុំជម្រះ នាព្រឹកមិញនេះ។
មន្ត្រីសម្របសម្រួលអង្គការលីកាដូ (LICADHO) រូបនេះ ហាក់មានជំនឿចិត្តថា តុលាការខេត្តកោះកុងនឹងអាចទម្លាក់បទចោទប្រកាន់ទាំងស្រុងមកលើសមាជិកក្រុមប្រឹក្សាឃុំជំនាប់ និងជាតំណាងសហគមន៍ជនជាតិដើមភាគតិចជង តំបន់អារ៉ែង លោក វ៉ែន វ៉ន ព្រោះតំណាងអធ្យាការព្រះរាជអាជ្ញារង លោក អ៊ូង ត្រាយបានស្នើសុំឱ្យចៅក្រមលុបចោលបទចោទមួយនៅក្នុងចំណោមបទចោទពីរ គឺបទចោទលុបបំបាត់វត្ថុតាង។
លោក អ៊ិន គង់ជិត មានប្រសាសន៍ថា៖ «យើងសង្ឃឹមថានឹងផ្តល់យុត្តិធម៌ជូនគាត់ ព្រោះព្រឹកមិញនេះ យើងដឹងហើយថាកន្លងមក អយ្យការចោទគាត់ពីរបទល្មើស បទល្មើសទី១ ទាក់ទងនិងប្រមូលអនុផលព្រៃឈើ និងទី២ ការបំបាត់វត្ថុតាង»។
ទាក់ទងនឹងការលើកពេលប្រកាសសាលក្រមទៅនៅថ្ងៃទី៣ ខែមីនា វិញនេះ លោកចៅក្រម អាំង ចិន្តា មិនធ្វើការអត្ថាធិប្បាយអ្វីច្រើននោះទេ គ្រាន់តែលោកប្រាប់យ៉ាងខ្លីថា ត្រូវការពេលវេលាដើម្បីសម្រេចរឿងក្តីនេះ។
សូមជម្រាបថា តុលាការខេត្តកោះកុងបានសម្រេចឃុំខ្លួន លោក វ៉ែន វ៉ន ជាតំណាងសហគមន៍ជនជាតិដើមភាគតិចជង ជាបណ្តោះអាសន្ននៅកំលុងខែតុលា ឆ្នាំ២០១៥ កន្លងទៅ ក្រោមបទចោទចំនួន ២ គឺការប្រមូលអនុផលព្រៃឈើ និងការបំបាត់វត្ថុតាង៕
រូបថតផ្ដល់ដោយ៖ មន្ត្រីសម្របសម្រួលអង្គការលីកាដូប្រចំាខេត្តកោះកុង
