អ្នកនាំពាក្យគណបក្សប្រជាជនកម្ពុជាថ្លែងប្រាប់វិទ្យុស្ត្រី FM 102 នៃ WMC នៅថ្ងៃទី១២ ខែ កុម្ភៈ នេះថា លិខិតរបស់សមាជិកព្រឹទ្ធសភា និងសភាសហរដ្ឋអាមេរិកមកពីគណបក្សប្រជាធិបតេយ្យ បានផ្ញើទៅលោកនាយករដ្ឋមន្ត្រី ហ៊ុន សែន ដែលអំពាវនាវឱ្យរាជរដ្ឋាភិបាលកម្ពុជាអនុញ្ញាតឱ្យសមាជិកសភាគណបក្សប្រឆាំងបានវិលត្រឡប់ចូលមាតុភូមិវិញ គឺមិនអាចបង្គាប់បញ្ជារាជរដ្ឋាភិបាលកម្ពុជាឱ្យធ្វើតាមនោះឡើយ ។
យោងតាមសារព័ត៌មានសំឡេងសហរដ្ឋអាមេរិក បានឱ្យដឹងថា សមាជិកព្រឹទ្ធសភាសហរដ្ឋអាមេរិកដ៏មានឥទ្ធិពលចំនួន ៧នាក់ ដែលមកពីគណបក្សប្រជាធិបតេយ្យបានចូលរួមជាមួយនឹងសមាជិកសភាសហរដ្ឋអាមេរិក បានអំពាវនាវដល់ថ្នាក់ដឹកនាំប្រទេសកម្ពុជាអនុញ្ញាតឱ្យសមាជិកសភាគណបក្សប្រឆាំងបានវិលត្រឡប់ចូលប្រទេសវិញ ដោយគ្មានការភ័យខ្លាច ការចាប់ខ្លួន ឬការយកមកកាត់ទោសអ្វីឡើយ។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឆ្លើយតបថា លិខិតរបស់សមាជិកព្រឹទ្ធសភា និងសមាជិកសភាសហរដ្ឋអាមេរិក មកពីគណបក្សប្រជាធិបតេយ្យអាមេរិក គ្មានឥទ្ធិពលអ្វីមកលើច្បាប់កម្ពុជាឡើយ។
អ្នកនាំពាក្យគណបក្សប្រជាជនកម្ពុជារូបនេះ បន្តថា លោកចាត់ទុកលិខិត ឬអនុសាសន៍របស់ សមាជិកព្រឹទ្ធសភា និងសមាជិកសភាសហរដ្ឋអាមេរិក មកពីគណបក្សប្រជាធិបតេយ្យចំនួន ៧នាក់ នោះ គ្រាន់តែជាសិទ្ធិក្នុងការបញ្ចេញមតិ ដូច្នេះមិនអាចមានឥទ្ធិពលមកលើច្បាប់របស់កម្ពុជា និងមិនអាចមកបង្គាប់បញ្ជាប្រមុខដឹកនាំកម្ពុជាឱ្យធ្វើតាមឡើយ។
លោក សុខ ឥសាន បានបញ្ជាក់ថា៖ « មុននឹងផ្តល់អនុសាសន៍ជូនសម្តេចឱ្យដោះលែង ឯកឧត្តម សម រង្ស៊ី សមាជិកព្រឹទ្ធសភាទាំងនោះ គួរតែទៅណែនាំ ឯកឧត្តម សម រង្ស៊ី កុំប្រព្រឹត្តិបទល្មើសព្រហ្មទណ្ឌផ្ទួនៗនៅប្រទេសកម្ពុជា ឱ្យតែប្រព្រឹត្តិបទល្មើសព្រហ្មទណ្ឌហើយ គេអនុវត្តហើយ មិនអាចលើកលែងថាប្រធានគណបក្សប្រឆាំង ឬក៏ថាអ្នកណា អ្នកនោះឡើយ ច្បាប់គឺច្បាប់»។
ទាក់ទងនឹងបញ្ហានេះ វិទ្យុស្ត្រីមិនទាន់អាចសុំការអត្ថាធិប្បាយពីអ្នកនាំពាក្យគណបក្សសង្គ្រោះជាតិ ដើម្បីធ្វើការអត្ថាធិប្បាយលើរឿងនេះ បាននៅឡើយទេ នៅរសៀសថ្ងៃសុក្រនេះ ។
លោក អ៊ូ វីរៈ ប្រធានអង្គការវេទិកាអនាគតបានលើកឡើងថា រាជរដ្ឋាភិបាលកម្ពុជាគួរតែអនុញ្ញាតិឱ្យលោក សម រង្ស៊ី ប្រធានគណបក្សសង្គ្រោះជាតិ អាចវិលចូលស្រុកវិញ ដើម្បីឱ្យលោក មានសិទ្ធិប្រកួតប្រជែកផ្នែកនយោបាយ។
លោកបន្ថែមថា បញ្ហារបស់លោក សម រង្ស៊ី នេះ គឺជារឿងនយោបាយ ដូច្នេះមានតែដោះស្រាយតាមផ្លូវនយោបាយប៉ុណ្ណោះ ទើបអាចមានសង្ឃឹម។ ជាងនេះទៀត លោក អ៊ូ វីរៈ មានសង្ឃឹមតិចតូចណាស់ថា លោក សម រង្ស៊ី ប្រធានគណបក្សសង្គ្រោះជាតិអាចនឹងវិលចូលស្រុកវិញបាន ព្រោះជំហររបស់គណបក្សប្រជាជនកម្ពុជា មិនចង់ឱ្យប្រធានគណបក្សប្រឆាំងរូបនេះ វិលចូលមាតុភូមិកម្ពុជាវិញឡើយ លុះណាតែលោក សម រង្ស៊ី ហ៊ានដើរចូលពន្ធធាគារដោយខ្លួនឯង។
លោក អ៊ូ វីរៈនិយាយថា៖ «ទាល់តែគាត់ [លោក សម រង្ស៊ី] ហ៊ានបន្តិច មានន័យថា ទាល់តែ លោក សម រង្ស៊ី ចូលគុក ប្រសិនបើលោក សម រង្ស៊ី ហ៊ានចូលគុក ប្រហែលជាអាចចូលស្រុក ហើយប្រហែលជាអាចបង្ខំឱ្យមានការចរចាណាមួយដែលអាចទទួលយកបានទាំងសងខាង»។
សូមជម្រាបថា លោក សម រង្ស៊ី ប្រធានគណបក្សសង្គ្រោះជាតិ កំពុងតែនិរទេសខ្លួននៅក្រៅប្រទេសនៅឡើយ បន្ទាប់ពីរដ្ឋសភាកម្ពុជាសម្រេចលុបចោលសមាជិកភាពសភារបស់លោក ។
លើសពីនេះទៀត លោក សម រង្ស៊ី កំពុងតែប្រឈមមុខនឹងការជាប់ពន្ធនាគារទាក់ទងនឹងរឿងបរិហារកេរ្តិ៍លោក ហោ ណាំហុង រដ្ឋមន្ត្រីក្រសួងការបរទេស៕
