ខេត្តត្បូងឃ្មុំ៖ ខណៈទឹកទន្លេមេគង្គបានជនលិចភូមិមួយចំនួន ក្នុងឃុំចំនួនពីរនៃស្រុកត្បូងឃ្មុំ ខេត្តត្បូងឃ្មុំអាជ្ញាធរបានបញ្ចេញកម្លាំងនិងវិធានការសង្គ្រោះភ្លាមៗដោយជម្លៀសពលរដ្ឋ និងសត្វពាហនៈ ទៅកាន់ទីទួលសិវត្ថិភាពចំនួនពីរកន្លែង គឺនៅទួលសុវត្ថិភាព អាន ម៉ាឌី ស្ថិតក្នុងភូមិទន្លេបិទ ឃុំទន្លេបិទ ស្រុកនិងខេត្តត្បូងឃ្មុំ និងទី២ នៅទួលសុវត្ថិភាពទួលវិហារ ស្ថិតក្នុងភូមិទួលវិហារ ឃុំជីរោទិ៍ទី១ ស្រុកនិងខេត្តត្បូងឃ្មុំដូចគ្នា។
ស្ថានភាពទឹកជំនន់នៅភូមិមួយចំនួនក្នុងស្រុកត្បូងឃ្មុំ។រូបភាព ឡេក ចាន់ពេជ្រ ។
ការជម្លៀសនេះធ្វើឡើងកាលពីថ្ងៃទី២០ ដល់២៣ ខែកញ្ញា ឆ្នាំ២០២៤កន្លងទៅ។ នេះបើតាមសេចក្តីរាយការណ៍បឋមពីសិក្ខាកាមរបស់វិទ្យុស្រ្តីប្រចាំខេត្តកំពង់ចាម។
ស្ថានភាពទឹកជំនន់នៅភូមិមួយចំនួនក្នុងស្រុកត្បូងឃ្មុំ។រូបភាព ឡេក ចាន់ពេជ្រ ។
លោក សេង សុខខឿន អភិបាលនៃគណៈអភិបាលស្រុកត្បូងឃ្មុំឲ្យដឹងថា ទឹកជំនន់បានជនលិចឃុំចំនួន២ គឺឃុំទន្លេបិទ និងឃុំជីរោទិ៍១ ។ ក្នុងនោះទឹកជំនន់បានបង្កការជន់លិចភូមិចំនួន ១៩ភូមិ ដោយឃុំទន្លេបិទ លិចលង់ចំនួន១០ភូមិ ក្នុងនោះមានភូមិទួលគរ ភូមិព្រែកតូច ភូមិព្រែកជីក ទួលខ្សាច់ ដូនម៉ៅក្រោម ដូនម៉ៅលើ ទន្លេបិទក្រោម ទន្លេបិទលើ ទន្លេបិទ និងភូមិយាយស ។ ចំណែកឃុំជីរោទិ៍ទី១វិញ មានចំនួន៩ភូមិត្រូវលិចលង់ដូចគ្នា ដោយមានភូមិព្រែកតូច រកាធំ ជីរោទិ៍ទី១ ជីរោទិ៍ទី២ ជីរោទិ៍កណ្តាល ជីរោទិ៍លើ ជួរកណ្តាល កំពង់ឫស្សី និងភូមិទួលកែវ ។
ពលរដ្ឋរើសម្ភារៈទៅកាន់ទីទួលមានសុវត្ថិភាព។រូបភាព ឡេក ចាន់ពេជ្រ ។
លោកអភិបាលស្រុកត្បូងឃ្មុំបន្តឲ្យដឹងទៀតថា អាជ្ញាធរមានសមត្ថកិច្ចបានអន្តរាគមន៍ជម្លៀស ពលរដ្ឋចំនួន ១៤៦គ្រួសារ និង សត្វពាហនៈ គោចំនួន ២៧៦ក្បាល ក្របី២០២ក្បាល និងពពែចំនួន ៣៥១ក្បាល ។ លោកបញ្ជាក់ទៀតថា បើសិនករណីស្ថានភាពទឹកនៅបន្តហក់ឡើងទៀតនោះ នោះអាជ្ញាធរស្រុកនឹងត្រៀមកម្លាំងជានិច្ច ដើម្បីចាំជួយអន្តរាគមន៍ជួយដល់ពលរដ្ឋពីបណ្តាភូមិដែលលិចទឹកមកកាន់ទីទួលសុវត្ថិភាពទាំងពីរខាងលើ ដើម្បីផ្តល់ទឹកស្អាត និងបង្គន់អនាម័យសម្រាប់បម្រើតាមសេចក្តីត្រូវការជូនពលរដ្ឋ។
រូបភាពទីទួលមានសុវត្ថិភាពដែលជម្លៀសពលរដ្ឋ។រូបភាព ឡេក ចាន់ពេជ្រ ។
ពិសេសជំនាញពេទ្យសត្វខេត្តបានបាញ់ថ្នាំសម្លាប់បាក់តេរី សត្វល្អិត រួចរាល់ផងដែរ ដោយរដ្ឋបាលបានណែនាំដល់ពលរដ្ឋត្រូវមានការប្រុងប្រយ័ត្នខ្ពស់ ហូបទឹកឆ្អិន ទឹកស្អាត ហើយកុមារតូចៗ ត្រូវហាមឃាតជៀសវាងការចុះលេងទឹកបណ្តាលឱ្យលង់៕
ទូកសម្រាប់ដឹកជញ្ជូនពលរដ្ឋរងគ្រោះដោយសារទឹកជំនន់មកទីទួលមានសុវត្ថិភាព។រូបភាព ឡេក ចាន់ពេជ្រ ។
អត្ថបទខ្លីសរសេរដោយ ឡេក ចាន់ពេជ្រ សិក្ខាកាមក្នុងវគ្គបណ្ដុះបណ្ដាល ស្ដីពីមូលដ្ឋានគ្រឹះនៃការសរសេរព័ត៌មាន និងការថតរូប រៀបចំដោយអង្គការមណ្ឌលព័ត៌មានស្ត្រីកម្ពុជា(WMC)។
