ភ្នំពេញ៖ លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា (NGO FORUM) សម្ព័ន្ធទន្លេកម្ពុជា សហគមន៍ទន្លេមេគង្គ និងបឹងទន្លេសាប រួមទាំងអង្គការជាតិ និងអន្តរជាតិ ដាក់លិខិតរួមគ្នាមួយទៅ សម្តេចនាយករដ្ឋមន្ត្រី ហ៊ុន សែន ស្ថានទូតអាមេរិកប្រចាំនៅកម្ពុជា និងអគ្គលេខាធិការអាស៊ាន ដើម្បីស្នើសុំឱ្យមានការទប់ស្កាត់លើបញ្ហាប្រឈមនានា នៃការសាងសង់ទំនប់វារីអគ្គិសនីដនសាហុង ខណៈដែលសហរដ្ឋអាមេរិកនឹងធ្វើជាម្ចាស់ផ្ទះនៃកិច្ចប្រជុំកំពូលពិសេសអាស៊ាន-អាមេរិក នៅពាក់កណ្តាលខែកុម្ភៈនេះ។ ការលើកឡើងរបស់ NGO Forum នេះ ធ្វើឡើងនៅក្នុងសន្និសីទកាសែតមួយនៅរាជធានីភ្នំពេញ នាព្រឹកថ្ងៃព្រហស្បតិ៍នេះ។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា (NGO FORUM) មានប្រសាសន៍ថា លោកនឹងដាក់លិខិតទៅខុទ្ទកាល័យនាយករដ្ឋមន្ត្រី ស្ថានទូតអាមេរិកប្រចាំនៅកម្ពុជា អគ្គលេខាធិការអាស៊ាន នារសៀលថ្ងៃព្រហស្បតិ៍នេះ ដើម្បីយកបញ្ហា ផលប៉ះពាល់នៃការសាងសងទំនប់វារីអគ្គិសនីដនសាហុង ទៅពិភាក្សាក្នុងកិច្ចប្រជុំកំពូលពិសេសអាស៊ាន-អាមេរិក នៅរដ្ឋកាលីហ្វញ៉ា សហរដ្ឋអាមេរិកនៅថ្ងៃទី១៥ ដល់ថ្ងៃទី១៦ ខែកុម្ភៈ ឆ្នាំ ២០១៦ខាងមុខនេះ។
ចំណែក លោក យុក សេងឡុង នាយកប្រតិបត្តិនៃសម្ព័ន្ធ ដើម្បីអភិរក្សធនធានជលផល ថ្លែងថា ការសាងសង់ទំបន់វារីអគ្គសនីដនសាហុង នឹងធ្វើឱ្យមានការបម្រែបម្រួលចរន្តទឹកយ៉ាងខ្លាំង ដែលកត្តានេះ នឹងជះឥទ្ធិពលដល់ការបម្លាស់ទីរបស់ត្រីពីបឹងទន្លេសាប មកទន្លេមេគង្គនៅរដូវត្រីពងកូន និងប៉ះពាល់យ៉ាងធ្ងន់ធ្ងរដល់ព្រៃលិចទឹកទៅតាមតំបន់ទន្លេសាបជាង ៦០ ម៉ឺនហិចតាថែមទៀតផង។
លោក យុក សេងឡុង មានប្រសាសន៍ថា៖ «នៅឆ្នាំ២០១៥ កន្លងទៅ នៅក្នុងខែ៨ តំបន់ខ្លះបានគោកបាត់ទៅហើយ អញ្ចឹងនៅក្នុងខែ៩ ខែ១០ ទឹកចាប់ហូរធ្វើឱ្យមានការប្រែប្រួសខុសពីប្រក្រតីដើម ដែលយើងធ្លាប់ជួបប្រទះ។ អ្វីជាក្តីកង្វល់ដល់ធនធានជលផល ព្រោះតំបន់បឹងទន្លេសាបនេះ យើងមានព្រៃលិចទឹក និងជីវៈចម្រុះផ្សេងៗនៅនឹងទន្លេសាប ក្នុងនោះព្រៃលិចទឹកនៅក្នុងតំបន់ទន្លេសាបរហូតដល់៦០ម៉ឺនហិចតាជាង»។
ក្រៅតែពីផលប៉ះពាល់ផ្ទាល់ទៅលើប្រជាពលរដ្ឋកម្ពុជាជាង ៦លាន នាក់ ដែលរស់នៅតាមដងទន្លេមេគង្គ ដោយសារតែការសាងសង់ទំនប់វារីអគ្គសនីដនសាហុងនេះ ក៏មានផលប៉ះពាល់ដល់ប្រជាពលរដ្ឋប្រមាណជាង ៣០០ លាននាក់ ដែលរស់តាមបណ្តាប្រទេសចំនួន ៥ផ្សេងទៀតផងដែរ។ នេះបើតាមការបង្ហាញនៅក្នុងសន្និសីទសាព័ត៌មាននេះ។
លោក គង់ ចាន់ធី ប្រធានសមាគមន៍នេសាទ អូរស្វាយ ខេត្តស្ទឹងត្រែង មានប្រសាសន៍ថា ប្រសិនបើរដ្ឋាភិបាលឡាវសាងសងទំនប់វារីអគ្គសនីដនសាហុងនេះ វានឹងធ្វើឱ្យប៉ះពាល់ដល់សេដ្ឋកិច្ចប្រចាំថ្ងៃរបស់ប្រជានេសាទយ៉ាងធ្ងន់ធ្ងរ។ លោកថា៖ «ប្រជាពលរដ្ឋដែលរស់នៅក្នុងតំបន់ទន្លេមេគង្គ ផ្នែកខាងក្រោមនៃដនសាហុងជាពិសេសប្រជាពលរដ្ឋដែលរស់នៅក្នុងខេត្តស្ទឹងត្រែង ពួកគាត់ពឹងអាស្រ័យផលលើការនេសាទត្រី ជាអាហារចំបាច់បំផុត និងសេដ្ឋកិច្ចជាលក្ខណៈគ្រួសាររបស់គាត់»។
សូមជម្រាប់ថា ការសាងសងទំនប់វារីអគ្គសនីដនសាហុងប្រទេសឡាវនេះ នៅត្រង់តំបន់ល្បាក់ខោន មានចម្ងាយប្រមាណជាង ២គីឡូម៉ែត្រ ពីព្រំប្រទល់កម្ពុជា-ឡាវ។
បើតាមសេចក្តីរាយការណ៍ពិព័ត៌មានជាតិ និងអន្តរជាតិនាពេលកន្លងមកបានឱ្យដឹងថា សកម្មភាពសាងសងទំនប់វារីអគ្គសនីដនសាហុងប្រទេសឡាវនេះ កំពុងតែធ្វើដំណើរការជាបណ្តើរៗ ជាក់ស្តែងកាលពីឆ្នាំ២០១៥ កន្លងទៅ រដ្ឋាភិបាលឡាវបានសាងសង់ស្ពានមួយរួចរាល់ហើយ ដើម្បីដឹកសម្ភារៈសាងសងទំនប់វារីអគ្គសនីដនសាហុង។
សូមបញ្ជាក់ថា បន្ទាប់ពីបញ្ចប់សន្និសីទសាព័ត៌មាននេះ NGO FORUM រួមទាំងអង្គការពាក់ព័ន្ធមួយចំនួនទៀត បានបង្ហាញគោលជំហរថា ប្រសិនបើការដាក់លិខិត ទៅលោកនាយករដ្ឋមន្ត្រី ហ៊ុន សែន ស្ថានទូតអាមេរិកប្រចាំនៅកម្ពុជា និងអគ្គលេខាធិការអាស៊ាន ពុំទទួលបានលទ្ធផលអ្វីនោះ ពួកគេនឹងធ្វើសកម្មភាព ដើម្បីអំពាវនាវឱ្យប្រជាពលរដ្ឋឈប់ទទួលទានស្រាបៀរអង្គរតទៅទៀត ព្រោះក្រុមហ៊ុនស្រាបៀរនេះ បានរួមចំណែកក្នុងការសាងសងទំនប់វារីអគ្គសនីដនសាហុង៕
