អ្នកនាំពាក្យ ក្រសួងការបរទេស និងសហប្រតិបត្តិការអន្តរជាតិ កម្ពុជា បានថ្លែងថា ក្រសួងកំពុងតែព្យាយាមអន្ដរាគមន៍ និងប្រាប់ទៅកាន់មន្ដ្រីការទូតខ្មែរប្រចាំប្រទេស កូវ៉ែត ឱ្យពន្លឿនការងារជួយស្ដ្រីជនជាតិខ្មែរអ៊ីស្លាមម្នាក់ ដែលត្រូវបានចាញ់បោកមេខ្យល់នាំយកទៅធ្វើការនៅប្រទេសអារ៉ាប៊ីសាអូឌីត វិលមកកម្ពុជាវិញឱ្យបានឆាប់។
ក្រសួងការបរទេសកម្ពុជា កំពុងប្រឹងប្រែងបញ្ចប់កុងត្រាការងាររបស់ស្ដ្រីជានជាតិខ្មែរអ៊ីស្លាមរស់នៅខេត្ដកំពងចាមដែលធ្វើការនៅប្រទេសអារ៉ាប៊ីសាអូឌីតឱ្យបានធ្វើមាតុភូមិនិវត្ដន៍មកប្រទេសកំណើតវិញ។
លោក ជុំ សន្ទរី អ្នកនាំពាក្យក្រសួងការបរទេសកម្ពុជានៅថ្ងៃពុធ នេះបានប្រាប់វិទ្យុស្ដ្រីថាក្រោយពីទទួលព័ត៌មានភ្លាមនៅយប់ថ្ងៃទី៨ កម្ភៈ លោក ហោ ណាំហុង ឧបនាយករដ្ឋមន្ដ្រី និងជារដ្ឋមន្ដ្រីក្រសួងការបរទេសកម្ពុជា បានទាក់ទងទៅឯកអគ្គរាជទូតខ្មែរប្រចាំប្រទេសកូវ៉ែត ដោយផ្ទាល់ ដើម្បីទំនាក់ទំនងការទូតក្នុងការជួយស្ដ្រីរងគ្រោះរូបនោះ។
លោក ជុំ សន្ទរី បន្ដថា មូលហេតុដែលមិនអាចអន្ដរាគមជួយនាំស្ដ្រីខ្មែររូបនោះឱ្យវិលមកកម្ពុជាបានភ្លាមៗគឺដោយសារស្ត្រីរងគ្រោះមិនទាន់ចប់កិច្ចសន្យាការងារទើបធ្វើឱ្យមានការពិបាកដោះស្រាយ។
លោកបន្ថែមថា៖ «ក្រសួងការបរទេសបានអំពាវនាវជាច្រើនលើកច្រើនសារហើយ ថាឱ្យមានការប្រុងប្រយ័ត្នឱ្យបានខ្ពស់ ពិសេសគឺពាក្យសន្យាថាទៅនឹងបានប្រាក់ខែខ្ពស់ហ្នឹងឱ្យមានការប្រុងប្រយ័ត្ន កុំជឿតាមពាក្យឃោសនាប្រោកប្រាស់ពីពួកមេខ្យល់ងាយពេក ហើយករណីនេះយើងក៏បានឃើញហើយថាមេខ្យល់បានសន្យាថានឹងបានប្រាក់ខែបៀវត្សខ្ពស់ អីចឹងដល់ពេលទៅវាមិនមែនអញ្ចឹង ហើយឥឡូវវាចោទបញ្ហាគឺរឿងកិច្ចសន្យាដែលយើងចុះហត្ថលេខាជាមួយនិយោជកអញ្ចឹងយើងត្រូវដោះស្រាយរឿងហ្នឹងសិន»។
ជុំវិញបញ្ហានេះ លោក មឿន តុលា នាយកប្រតិបត្ដិនៃមជ្ឈមណ្ឌលសម្ព័ន្ធភាពការងារ និង សិទ្ធមនុស្ស ហៅកាត់ថា (Tentral) បានមានប្រសាសន៍ថា ក្រសួងការបរទេសកម្ពុជា សព្វថ្ងៃបានបំពេញកាតព្វកិច្ចរបស់ខ្លួនល្អប្រសើរច្រើន ក្នុងការជួយពលករខ្មែរ ដែលរងគ្រោះនៅក្រៅប្រទេសសម្រាប់ចុងឆ្នាំ២០១៥ និងដើមឆ្នាំ២០១៦នេះ។
ទោះជាយ៉ាងណា លោក មឿន តុលា និយាយថា រដ្ឋាភិបាលគួរតែមានវិធានការធ្វើការរឹតបន្ដឹង និងត្រូតពិនិត្យក្រុមដែលនាំពលករចំណាកស្រុកឱ្យបានតឹងរឹងជាងនេះបន្ថែម ដើម្បីកុំឱ្យពួកគេមានឱកាសបោកបញ្ឆោតពលរដ្ឋខ្មែរតទៅទៀត។
លោក មឿន តុលា បានបន្តថា ក្នុងនាមលោកជាមន្ដ្រីធ្វើការផ្នែកសិទ្ធិមនុស្សលោកស្នើសុំឱ្យពលរដ្ឋទាំងអស់ត្រូវគិតគួរឲ្យបានច្បាស់លាស់ពីការធ្វើចំណាកស្រុកកុំងាយជឿលើការបោកបញ្ឆោតរបស់ជនខិលខួចមួយចំនួន នាំឱ្យអន្តរាយខ្លួនទៅវិញទេ។
លើសពីនេះទៀត លោកថា ពលរដ្ឋខ្មែរបើសិនជាអាចពួកគាត់គួរងាកមកចាប់យកការងារក្នុងប្រទេសវិញល្អជាជាងការធ្វើចំណាកស្រុកទាំងដែលមិនបានដឹងពីគោលដៅច្បាស់លាស់ គឺងាយប្រឈមនិងការចាញ់បោកគេខ្ពស់។ លោកថា បើពលរដ្ឋសម្រេចចិត្ដថាចង់ធ្វើចំណាកស្រុកពួកគាត់ត្រូវតែដឹងពីប្រវត្ដក្រុមហ៊ុន ឬអ្នកនាំទៅឱ្យបានច្បាស់លាស់ ហើយត្រូវដឹងពីលេខសម្រាប់ទំនាក់ទំនងទៅអង្គការដែលធ្វើការលើផ្នែកសិទ្ធមនុស្សនៅប្រទេសដែលចង់ទៅនោះ។
លោកបានសំណូមពរយ៉ាងដូច្នេះថា៖ «សំណូមពរឱ្យប្រជាពលរដ្ឋហ្នឹងបើសិនជាអាចគាត់គួរតែសម្លឹងមើលការងារក្នុងប្រទេសជាជាងទៅក្រៅ ប្រសិនជាគាតមិនចេះភាសាគេ មិនយល់ពីវប្បធម៍នៃប្រទេសគេ អញ្ចឹងគាត់គួរសម្លឹងមើលឱកាសនៅក្នុងស្រុកជាជាងនៅក្រៅស្រុក»។
សូមបញ្ជាក់ថា កាលពីថ្ងៃទី០៨ ខែមករា ឆ្នាំ២០១៦ ស្ដ្រីជនជាតិខ្មែរអ៊ីស្លាមវ័យ ៣៩ឆ្នាំ ម្នាក់ត្រូវបានមេខ្យល់បញ្ឆោតយកទៅធ្វើការនៅប្រទេសអារ៉ាប៊ីសាអូឌីត ដោយប្រាប់ថាននឹងទទួលបានប្រាក់ខែច្រើនយ៉ាងតិចណាស់ ៣០០ដុល្លារ ក្នុងមួយខែ៕
