តុលាការខេត្តកំពង់ស្ពឺ មិនទាន់ធ្វើការជម្រះក្ដីវិវាទការងាររវាងអ្នកស្រី រឿន កូលាប និងក្រុមហ៊ុនសេងបូ ហ្គាមិននៅឡើយ ខណៈក្រុមហ៊ុននេះ បន្តអវត្តមានជាច្រើនដង មិនចូលរួមក្នុងសវនាការ។ ការអវត្តមានរបស់ក្រុមហ៊ុននេះ ប្រធានសហជីពរូបនេះថា ក្រុមហ៊ុនកំពុងគេចវេះមិនចង់ដោះស្រាយវិវាទការងារនេះ ដោយស្នើឱ្យរាជរដ្ឋាភិបាល និងស្ថាប័នពាក់ព័ន្ធ ជួយពន្លឿនដោះស្រាយវិវាទនេះឱ្យបានឆាប់។ កញ្ញា សៃ ចន្ធី រាយការណ៍
វិវាទការងាររវាងអ្នកស្រី រឿន កូលាប និងក្រុមហ៊ុនសេងបូ ហ្គាមិន ត្រូវបានអូសបន្លាយពេលជាងមួយឆ្នាំហើយ ខណៈអ្នកស្រី កូលាប អះអាងថា ខ្លួននៅតែមិនទាន់ទទួលបានយុត្តិធម៌ ពីព្រោះកន្លងមកក្រុមហ៊ុនបញ្ឈប់អ្នកស្រីពីការងារ ជាការរំលោភបំពានយ៉ាងធ្ងន់ធ្ងរដល់សិទ្ធិសេរីភាពក្នុងការបង្កើតសហជីព ដើម្បីការពារសិទ្ធិកម្មករស្របច្បាប់នៅកន្លែងការងារ។
អ្នកស្រី រឿន កូលាប ត្រូវបានក្រុមហ៊ុន សេងបូហ្គាមិន (ខេមបូឌា) ឯ.ក បញ្ឈប់ពីការងារ កាលពីថ្ងៃទី៣០ ខែមិថុនា ឆ្នាំ២០២៣ ក្រោមហេតុផលថា អ្នកស្រី មិនបានបំពេញការងារឱ្យគ្រប់ចំនួនកំណត់តាមតម្រូវការរបស់ក្រុមហ៊ុន។ ការបញ្ឈប់ពីការងារនេះ គឺធ្វើឡើងស្របពេលដែល អ្នកស្រី កូលាប ជាប់ឆ្នោតជាប្រធានសហជីព។
តាមច្បាប់ស្តីពីការងារ ក្នុងមាត្រា១២ មាត្រា២៦៦ និងមាត្រា២៦៧ បានចែងថាហាមឃាត់រាល់ទម្រង់នៃការរើសអើងសហជីព ដែលរួមមាន ការពិន័យ ការផ្តាច់កិច្ចសន្យាការងារ។ និងច្បាប់ស្តីពីសហជីព ក្នុងមាត្រា៦៧ និងមាត្រា៤៣ បានចែងថា បេក្ខជនដែលជាប់ឆ្នោតជាថ្នាក់ដឹកនាំសហជីព ត្រូវទទួលបានការការពារពិសេស ហើយរាល់ការបញ្ឈប់បេក្ខជនណាម្នាក់ លុះត្រាតែមានការយល់ព្រមពីអធិការកិច្ចការងារ។
អ្នកស្រី រឿន កូលាប អតីតប្រធានសហជីពការពារសិទ្ធិកម្មករនៅក្នុងក្រុមហ៊ុនសេងបូ ហ្គាមិន ប្រាប់វិទ្យុស្ដ្រីនៅថ្ងៃទី២៧ ខែសីហាថា តុលាការខេត្តកំពង់ស្ពឺ បើកសវនាការជាលើកទី៦ហើយ ក្នុងការដោះស្រាយវិវាទការងាររវាងអ្នកស្រី ជាមួយក្រុមហ៊ុនសេងបូ ហ្គាមិន ខណៈសវនាការលើកនេះ ក៏មិនខុសពីសវនាការមុនដែរ ដោយមិនមានវត្តមានភាគីក្រុមហ៊ុនចូលរួមឡើយ។ ទោះជាក្រុមហ៊ុននេះគេចវេសមិនចូលរួមក្ដី អ្នកស្រី បន្តព្យាយាមមិនបោះបង់ការប្ដឹងផ្ដល់ទៅកាន់ក្រុមហ៊ុនសេងបូ ហ្គាមិនឡើយ ខណៈការមិនចូលរួមសវនាការរបស់ក្រុមហ៊ុន ធ្វើឱ្យប៉ះពាល់ដល់ជីវភាពគ្រួសារអ្នកស្រី។
អ្នកស្រី រឿន កូលាប ៖ «ផលប៉ះពាល់ទីមួយ គឺខ្ញុំខាតនឹងលុយកាក់ ពេលវេលា ខាតនឹងកម្លាំងចិត្ត សង្ឈឹមថាមកដល់ទីកន្លែងនេះ ខ្ញុំគិតថាបានហើយ ប៉ុន្តែបែរជាអត់បានទៅវិញ។ ការទាមទាររបស់ខ្ញុំហ្នឹងមានតែពីរចំណុចនោះទេ ទីមួយ ឱ្យយកខ្ញុំចូលធ្វើការវិញ ទីពីរ ផ្ដល់នូវប្រាក់រំលឹកចាប់ពីថ្ងៃដែលគេបញ្ឈប់ខ្ញុំ មកទល់ថ្ងៃដែលគេមកយកខ្ញុំចូលធ្វើការវិញ មានតែពីរចំណុចហ្នឹងទេ»។
បើតាមអ្នសស្រី កូលាប ក្រោយពីអវត្តមានភាគីក្រុមហ៊ុនចូលរួមសវនាការនេះជាច្រើនដងមក តុលាការខេត្ត ក៏មិនឃើញមានសកម្មភាពជំរុញអ្វីឱ្យភាគីក្រុមហ៊ុនចូលខ្លួនមកដោះស្រាយសំណង តាមសំណើរបស់អ្នកស្រីនៅឡើយ។ ក្រៅពីនេះអ្នកស្រីថា តុលាការខេត្តហាក់ដូចជាកាន់ជើងខាងភាគីក្រុមហ៊ុន ពីព្រោះនៅពេលដែលអ្នកស្រីនិយាយថា ការមិនចូលរួមសវនាការរបស់ក្រុមហ៊ុន ជាការមើលងាយច្បាប់ ប៉ុន្តែបែរជាតុលាការថា ការនិយាយបែបនេះរបស់អ្នកស្រី អាចនឹងត្រូវបានភាគីក្រុមហ៊ុនប្ដឹងបកមកវិញ។
អ្នកស្រី រឿន កូលាប ៖ «ខ្ញុំសំណូមពរទៅឱ្យរាជរដ្ឋាភិបាល និងក្រុមការងារដែលគាត់កាន់នៅផ្នែកច្បាប់ក្នុងការងាររោងចក្រហ្នឹង សុំឱ្យគាត់គិតគូរដល់ខ្ញុំផង ព្រោះអីគ្រាន់តែសាច់រឿងប្ដឹងផ្ដល់នេះវាចូលជិតមួយឆ្នាំជាងហើយ។ អីចឹងចង់ឱ្យគាត់ហ្នឹង ជួយឱ្យខ្ញុំហ្នឹងបានភាពយុត្តិធម៌ឱ្យខ្ញុំ ទាំងខាងតុលាការ ទាំងខាងអង្គការផ្សេងៗ និងខាងBuyer ដែលជាអ្នកបញ្ជាទិញហ្នឹងទាំងម្ដងជាពិសេស»។
ជុំវិញរឿងនេះ លោក វ៉ិត មឃៈ ព្រះរាជអាជ្ញារង នៃអយ្យការអមសាលាដំបូងខេត្តកំពង់ស្ពឺ ប្រាប់ថា លោកមិនបានចូលរួមសវនាការករណីអ្នកស្រី រឿន កូលាប នៅព្រឹកនេះទេ ដូច្នេះលោកមិនអាចផ្ដល់ព័ត៌មានបានឡើយ។
ចំណែកព្រះរាជអាជ្ញារង នៃអយ្យការអមសាលាដំបូងខេត្តកំពង់ស្ពឺម្នាក់ទៀត លោក ទិន សុចិត្រា បញ្ជាក់ប្រាប់វិទ្យុស្ដ្រីថា ករណីអ្នកស្រី រឿន កូលាប ស្ថិតក្នុងដំណាក់កាលជំនុំជម្រះក្ដី ដែលផុតពីតំណាងអយ្យការហើយ ដូច្នេះលោកសុំបដិសេធក្នុងការបកស្រាយ ដោយលើកឱ្យទៅសួរអ្នកនាំពាក្យសាលាដំបូងខេត្តវិញ។
លោក ទិន សុចិត្រា ៖ «ខ្ញុំជំរាបវិញថា ខ្ញុំអ្នកនាំពាក្យខាងអយ្យការ សំណុំរឿងនេះវាអត់នៅខាងអយ្យការទៀតទេ វានៅខាងសាលាដំបូងខេត្តកំពង់ស្ពឺ អ៊ីចឹងអ្នកនាំពាក្យសាលាដំបូងខេត្តកំពង់ស្ពឺ គាត់ត្រូវតែឆ្លើយអីចឹងណាជូនព័ត៌មានហ្នឹងទៅអ្នកសារព័ត៌មាន»។
វិទ្យុស្ដ្រីបានព្យាយាមទាក់ទងលោក ផេង ស៊ីភ័ណ អ្នកនាំពាក្យសាលាដំបូងខេត្តកំពង់ស្ពឺ ជាច្រើនដង ប៉ុន្តែលេខទូរស័ព្ទរបស់លោកមិនអាចទាក់ទងបានឡើយ។
អ្នកស្រី រឿន កូលាប ជាស្ត្រីមេម៉ាយ ដែលត្រូវរ៉ាប់រងការចំណាយក្នុងគ្រួសារ និងផ្គត់ផ្គង់ការសិក្សារបស់កូន។ អ្នកស្រីធ្លាប់បានប្រាប់វិទ្យុស្ត្រីថា រយៈពេលដែលអ្នកស្រីបាត់បង់ការងារធ្វើ អ្នកស្រីប្រឈមនឹងការបាក់ទឹកចិត្ត ដោយគ្មានប្រាក់សម្រាប់ឱ្យកូនទៅរៀន ខណៈពេលដែលអ្នកស្រីក៏ជាជន្ទល់ផ្គត់ផ្គង់ការចំណាយនិងការហូបចុកសម្រាប់គ្រួសារ៕
អត្ថបទដោយ៖ កញ្ញា ជា សុខនី
