ភ្នំពេញ៖ បើទោះបីជាបច្ចុប្បន្ន កុមារទទួលបាន ការអប់រំល្អប្រសើរជាងពេលមុន ហើយការប្រើប្រាស់អំពើហិង្សាទាំងក្នុងគ្រួសារ និងសាលារៀនត្រូវបានកាត់បន្ថយ តែយ៉ាងណា កុមារ និងក្មេងស្រី ក៏នៅតែប្រឈមនឹងបញ្ហាមួយចំនួន ដូចជាការបោះបង់ចោលការសិក្សា និងការបង្ខំឱ្យរៀបការទាំងវ័យក្មេងនៅតាមតំបន់ជនបទមួយចំនួន។ កត្តានេះតម្រូវឱ្យមានការចូលរួមយកចិត្តទុកដាក់ បន្ថែមពីអាណាព្យាបាល និង ក្រសួង-ស្ថាប័នភាគីពាក់ព័ន្ធទាំងអស់ចូលរួមដោះស្រាយដើម្បីឱ្យពួកគេទទួលបានសិទ្ធិ និងសេរីភាពកាន់តែទូលំទូលាយជាងមុន។ អ្នកស្រីវ៉ាយ វត្តី ជូនសេចក្តីរាយការណ៍
កញ្ញា ស្រីឡឹង មកពីស្រុកបន្ទាយស្រី ខេត្តសៀមរាប បានប្រាប់ឱ្យដឹងថា នៅក្នុងសហគមន៍ដែលកញ្ញារស់នៅ ក្មេងស្រីភាគច្រើននៅតែប្រឈមនឹងបញ្ហាឪពុកម្តាយរឹតត្បិត និងបង្ខំកូនឱ្យឈប់រៀន ដើម្បីទៅរកប្រាក់ចំណូលជួយផ្គត់ផ្គង់គ្រួសារ និងជាពិសេសឱ្យទៅរៀបការទាំងដែលខ្លួននៅក្មេង។ រីឯកុមារដែលរស់នៅជាមួយឪពុក ឬ ម្ដាយចុង និងសាច់ញាតិ តែងតែទទួលរងនូវការប្រើហិង្សា និងការស្តីបន្ទោសជាដើម។
កញ្ញា ស្រី ឡឹង៖ « គាត់គិតតែឱ្យកូនស្រីឈប់ទៅរៀន រៀបការដើម្បីជួយផ្គត់ផ្គង់គ្រួសារវិញ មួយទៀតគាត់បង្ខំកូនឱ្យទៅរកលុយនៅស្រុកឆ្ងាយ ឬតាមខេត្តដើម្បីជួយផ្គត់ផ្គង់គ្រួសារដោយសារតែជីវភាពខ្វះខាត តាមតំបន់មួយៗ ហើយសិស្សដែលប្រឈមនឹងការបោះបង់ការសិក្សាភាគច្រើនតាមបណ្តាញសង្គម ឬតាមមិត្តភក្តិ ដោយសារតែពួកគេភ្លឺតភ្លើនលឿន ហើយឪពុកម្តាយមិនសូវអើពើជាមួយ ពួកគាត់មិនបានចាប់អារម្មណ៍និងតាមដានកូនឱ្យបានគ្រប់ពេល សម្រាប់សុខភាពរបស់ស្រ្តីមិនបានពេញលេញនូវឡើយទេខាងតំបន់ ដោយសារតែជីវភាពរបស់ពួកគេ ពួកគេមិនបានខ្វល់ខ្វាយពីសុខភាពខ្លួនឯង ទាំងស្រ្តី និងកុមារី»។
ធ្លាប់ជាក្មេងស្រីម្នាក់ ដែលត្រូវបានឪពុកម្តាយ បង្ខំឱ្យបោះបង់ចោលការសិក្សា ដើម្បីឱ្យទៅរៀបការទាំងវ័យក្មេង ស្រីឡឹង ក៏បានជម្នះ និងព្យាយាមពន្យល់ឪពុកម្តាយ ដោយលើកហេតុផលថាខ្លួននៅក្មេងពេកមិនចង់ឈប់រៀនទេ ចង់រៀន និងធ្វើការរកលុយសិន មិនចង់បានគ្រួសារភ្លាមៗទាំងនៅក្មេងពេកព្រោះ ចង់រកលុយដើម្បីជួយខ្លួនឯង និងផ្គត់ផ្គង់ក្នុងគ្រួសារថែមទៀត។
កញ្ញា ស្រីឡឹង៖« ខ្ញុំសំណូមពរដល់ឪពុកម្តាយគ្រប់រូបមិនត្រូវគិតអំពីផលប្រយោជន៍ណាមួយដើម្បីតែផលប្រយោជន៍ខ្លួនឯងទេ ប៉ុន្តែគួរតែគិតឬសួរចិត្តកូនដើម្បីឱ្យកូនមានការសម្រេចចិត្តបានត្រឹមត្រូវ កុំបង្ខំកូន ឬដាក់សម្ពាធកូនឱ្យឈប់រៀនដើម្បីយកគ្រួសារតាមគាត់»។
អង្គការភ្លែនអន្តរជាតិ បានសហការជាមួយក្រុមប្រឹក្សាជាតិកម្ពុជាដើម្បីកុមារ និងការចុះកិច្ចព្រមព្រៀងជាមួយអង្គការដៃគូកាលពីថ្ងៃទី១២ ខែសីហា ឆ្នាំ២០២៤ដាក់ឱ្យដំណើរការគម្រោង«យើងរួមគ្នាដើម្បីកិច្ចការពារកុមារ»ដែលគម្រោងនេះបានអនុវត្តន៍ក្នុងរាជធានី ខេត្តគោលដៅចំនួន៣ មានខេត្តសៀមរាប ស្ទឹងត្រែង រតនគីរី និងភ្នំពេញ។
ការអង្កេតប្រជាសាស្រ្ត និងសុខភាពនៅកម្ពុជា ឆ្នាំ២០២១-២០២២ បានបង្ហាញឱ្យឃើញថា ក្មេងស្រី១៩ភាគរយ និងក្មេងប្រុស៦ភាគរយបានរៀបអាពាហ៍ពិពាហ៍មុនអាយុ១៨ឆ្នាំ និង១.៨ភាគរយបានរៀបអាពាហ៍ពិពាហ៍មុនអាយុ១៥ឆ្នាំ។ ស្រ្តីវ័យក្មេងអាយុ១៥-១៩ឆ្នាំដែលបានរៀបអាពាហ៍ពិពាហ៍នៅអាយុ១៥ឆ្នាំមាន ២ភាគរយ មានផ្ទៃពោះទាំងវ័យក្មេង ហើយតិចជាង១ភាគរយបានសម្រាលកូន ឬ ធ្លាប់មានផ្ទៃពោះនៅចន្លោះអាយុនេះ។
កញ្ញា សុខលី បណ្តាញដឹកនាំយុវជនគាំទ្រពីអង្គការសម្ព័ន្ធសិទ្ធិកុមារ និងអង្គការយូនីសេហ្វបានមើលឃើញបញ្ហានៅតាមបណ្តាញប្រព័ន្ធFacebook គឺក្មេងស្រីទទួលរងនូវការបៀតបៀនផ្លូវភេទ ត្រូវបានគេបង្ខិតបង្ខំ មួយទៀត កុមារមួយចំនួនគាត់មិនទាន់មានឱកាសក្នុងការបញ្ចេញមតិក៏ដូចជារាយការណ៍បញ្ហាដែលគាត់បានជួបប្រទះនៅឡើយទេ ក្មេងស្រីមួយចំនួនទៀតក៏រៀបការវ័យក្មេង ក៏ដូចជាការបោះបង់ចោលការសិក្សា ពិសេសស្រ្តីនៅតាមតំបន់ដាច់ស្រយាល គាត់គ្មានឱកាសក្នុងការបង្ហាញនូវអ្វីដែលគាត់បានជួបប្រទះជាពិសេសបញ្ហារំលោភបំពាន។
កញ្ញា សុខលី៖ « គឺទី១ចង់ឱ្យ មានការផ្សព្វផ្សាយពាក់ព័ន្ធជាមួយការផ្តល់សិទ្ធិសេរីភាពទៅដល់ស្រ្តីឱ្យកាន់តែទូលំទូលាយជាងមុន ជាពិសេស មធ្យោបាយដែលល្អ បំផុតដោយសារតែតំបន់ដាច់ស្រយាលមួយចំនួនមិនទាន់មានលទ្ធភាព ក្នុងការប្រើស្មាតហ្វូន ដូចជាអ្នកនៅទីក្រុងទេ ដូច្នេះអ្វីដែលអាចធ្វើបានគឺការផ្សព្វផ្សាយតាមវិទ្យុ ក៏ដូចជាការធ្វើជាបែនណឺ ដាក់តាមតំបន់នានា ដើម្បីឱ្យពួកគាត់បញ្ជា្រប និងចង់ឱ្យពួកគាត់មានឱកាសក្នុងការនិយាយរាល់បញ្ហាដែលពួកគាត់បានជួបប្រទះ ទៅកាន់ស្ថាប័ននានា ក៏ដូចជាក្រសួងពាក់ព័ន្ធបានចូលរួមដោះស្រាយ ទាំងអស់គ្នាដើម្បីឱ្យពួកគាត់ទទួលបានសិទ្ធិដូចក្មេងស្រីមួយចំនួនដែរ»។
ជាមួយគ្នានេះកញ្ញា សុខលី សំណូមពរដល់អាណាព្យាបាល ឪពុកម្តាយគ្រប់រូប ចូលរួមលើកទឹកចិត្តដល់កូនៗជាជាងដាក់ការស្តីបន្ទោស ដាក់សម្ពាធទៅលើកូននិងស្វែងយល់បន្ថែមពីតម្រូវការកូនរបស់ ដើម្បីឱ្យពួកគេមានឱកាសចាប់ក្តីស្រមៃពួកគេស្រលាញ់ដែរ។
កញ្ញា សុខលី៖«ខ្ញុំសុំសំណូមពរទាំងអាណាព្យាបាល ក៏ដូចជាក្រសួងពាក់ព័ន្ធផ្តល់វគ្គបណ្តុះបណ្តាល ឬក៏ផ្សព្វផ្សាយទៅតាមសហគមន៍នានា ដើម្បីឱ្យអាណាព្យាបាលមួយចំនួនបានបញ្ជ្រាបពីបញ្ហាទាំងអស់ហ្នឹង ក៏ដូចជាការលើកទឹកចិត្តកូនពួកគាត់ ក៏ដូចជាបញ្ឈប់រៀបការវ័យក្មេង បង្ខំកូនឱ្យរៀបការ គាត់មានបញ្ហាខ្លះ ឱ្យកូនឈប់រៀនជួយរកប្រាក់កម្រៃ ខ្ញុំគិតថាទាំងអស់ហ្នឹងវាមិនមែនជាដំណោះសា្រយដ៏ល្អទេ គឺខ្ញុំចង់ឱ្យពួកគាត់ចូលរួម ឱ្យកូនបានរៀនបន្តទៅមុខទៀត»។
លោក ខាន់ ម៉ាង អភិបាលរងស្រុកអង្គរធំ ខេត្តសៀមរាប បានឱ្យដឹងថា បញ្ហាប្រឈមលើស្រ្តី យុវវ័យ និងកុមារនៅតែមានខ្លះៗ ដូចជា សិស្សមួយចំនួនបោះបង់ចោលការសិក្សា ចំណាកស្រុកទៅធ្វើស្រែចម្ការជាមួយឪពុកម្តាយ ការរំលោភបំពាន និងអំពើហិង្សាជាដើម បើទោះបីកន្លងមក មានការគាំទ្រពីគម្រោងនានា ពីថ្នាក់ជាតិ ថ្នាក់ក្រោមជាតិ និងដៃគូអភិវឌ្ឍន៍ជាច្រើន ក៏ដោយ។
ផ្អែកតាមការអង្កេតប្រជាសាស្រ្ត និងសុខភាពនៅកម្ពុជា ឆ្នាំ២០២១-២០២២ ចំនួន៦៦ភាគរយ នៃកុមារកម្ពុជាអាយុពី ១ ទៅ១៤ឆ្នាំ ធ្លាប់ទទួលរងនូវការដាក់ពិន័យហិង្សាពីមនុស្សពេញវ័យក្នុងគ្រួសារ ក្នុងនោះ មានកុមារបីនាក់ក្នុងចំណោមប្រាំនាក់ ស្មើរនឹង ៥៩ភាគរយ ធ្លាប់ទទួលរងនូវការដាក់ពិន័យលើផ្លូវចិត្ត កុមារ ៤៣ភាគរយ ធ្លាប់ទទួលរងនូវការដាក់ពិន័យលើរាងកាយ និង ៥ភាគរយ ធ្លាប់ទទួលរងការដាក់ពិន័យលើរាងកាយធ្ងន់ធ្ងរ។ មនុស្សពេញវ័យក្នុងគ្រួសារចំនួន ២៧ភាគរយ ជឿថាការដាក់ពិន័យលើរាងកាយជាការចំាបាច់ ដើម្បីប្រៀនប្រដៅកូនឱ្យបានត្រឹមត្រូវ។
លោក ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា បើទោះបីអំពើហិង្សាលើកុមារនូវបន្តកើតមានក៏ដោយ រដ្ឋាភិបាលមានឆន្ទៈខ្ពស់ក្នុងការឈានទៅលុបបំបាត់អំពើហិង្សាលើកុមារ ដើម្បីសម្រេចឱ្យបាននូវគោលដៅ១៦.២ នៃគោលដៅអភិវឌ្ឍន៍ប្រកបដោយ ចីរភាព នៅឆ្នាំ២០៣០។ ជាមួយគ្នានេះ ក្រសួងបាននិងកំពុងពន្លឿនសេចក្តីព្រាងច្បាប់ស្តីពីកិច្ចការពារកុមារផងដែរ៕
រូបភាពដោយ៖វត្តី
