មន្ត្រីក្រសួងបរិស្ថានបានសម្ពោធរូបគំនូរបែបអប់រំបរិស្ថានជាលើកទី ០១ ស្តីអំពីកិច្ចគាំពារបរិស្ថាន នៅខាងមុខវិទ្យាល័យព្រះស៊ីសុវត្ថិ ព្រឹកថ្ងៃទី០៨ ខែកុម្ភៈ ឆ្នាំ២០១៦នេះ។ ការបង្ហាញផ្ទាំងគំនូរមួយនេះ ក្នុងគោលបំណង ដើម្បីបង្ហាញ ដល់សិស្សានុសិស្ស ប្រជាពលរដ្ឋ មន្ត្រីរាជការគ្រប់លំដាប់ថ្នាក់ឱ្យចេះស្រទ្បាញ់ និងថែរក្សាបរិស្ថាននៅព្រះរាជាណាចក្រកម្ពុជា ក៏ដូចជាបរិស្ថាននៅលើភពផែនដី សំដៅលើកិច្ចគាំពារបរិស្ថាន ការអភិរក្សជីវៈចម្រុះ និងការរស់នៅប្រកបដោយចីរភាព។
លោក ជួន សារ៉េត រាយការណ៍ពីព័ត៌មាននេះ៖
រដ្ឋលេខាធិការក្រសួងបរិស្ថាន លោក សាបូ អូហ្សាណូ លើកទ្បើងថា វិស័យបរិស្ថានដើរតូនាទីយ៉ាងសំខាន់នៅក្នុងសង្គមកម្ពុជា ពីព្រោះនៅពេលដែលប្រជាពលរដ្ឋបានយល់ដឹងពីតម្លៃបរិស្ថានកាន់តែច្រើនហើយនោះ នឹងអាចធ្វើឱ្យភពផែនដីទាំងមូលទទួលបានភាពល្អប្រសើរទ្បើងវិញតាមរយៈការរក្សាឱ្យបាននៅបរិស្ថានបៃតងជុំវិញខ្លួន។
លោក សាបូ អូហ្សាណូ បន្តថា គំនូរដែលដាក់សម្ពោធនៅថ្ងៃនេះធ្វើទ្បើងក្នុងគោលបំណងដើម្បីបណ្តុះគំនិតទៅដល់យុវជនជំនាន់ក្រោយ ក៏ដូចជាប្រជាពលរដ្ឋគ្រប់រូបដែលមិនទាន់បានចូលរួមកិច្ចគាំពារបរិស្ថាន ត្រូវប្តូរឥរិយាបថរបស់ខ្លួន ដោយងាកមកចូលរួមការពារបរិស្ថានទាំងអស់គ្នាវិញ។
លោករដ្ឋលេខាធិការក្រសួងបរិស្ថានរូបនេះទទួលស្គាល់ថា ប្រទេសកម្ពុជាបច្ចុប្បន្ន ពិតជាប្រឈមទៅនឹងបញ្ហាបរិស្ថាននៅទ្បើយ។ ដូច្នេះទើបក្រសួងជំរុញឱ្យយុវជន និងប្រជាពលរដ្ឋគ្រប់រូបត្រូវយកចិត្តទុកដាក់ពីតម្លៃនៃបរិស្ថាន។
លោក មានប្រសាសន៍បន្ថែមថា៖ «ជារួមធម្មតាយើងដឹងហើយទាក់ទងទៅនឹងភពផែនដីមួយដ៏ស្រស់បំព្រងបៃតង បាទ! អញ្ចឹងយើងចង់ឱ្យប្រទេសកម្ពុជាយើងឋិតនៅក្នុងពិភពមួយដ៏ស្រស់បំព្រងបៃតង ស្អាត ឃ្លីន ហ្គ្រីន បាទ យើងចង់បានអញ្ចឹង យើងទទួលស្គាល់ថាកម្ពុជាយើងបច្ចុប្បន្នមិនទាន់ឋិតទៅដល់ដំណាក់កាលហ្នឹងទេ…»។
ទាក់ទងនឹងការដាក់សម្ពោធនេះ វិចិត្រករដែលជាអ្នកគូររូបគំនូរមួយនេះ គឺលោក រិន ហឿត បាននិយាយថា គោលបំណងសំខាន់នៅក្នុងរូបគំនូរនេះចង់បង្ហាញទៅដល់សិស្សានុសិស្សទាំងអស់ និងសារធារណជនទូទៅបានស្វែងយល់ពីសារៈសំខាន់នៃបរិស្ថាន។
លោក រិន ហឿត បន្ថែមថា សារៈសំខាន់នៃបរិស្ថាននោះ គឺរួមបញ្ចូលទាំងការសំអាតបរិស្ថាននៅជុំវិញខ្លួន ចូលរួមការគាំពារបរិស្ថានដោយមានការដាំដើមឈើបន្ថែមជាដើម។
លោកបានបង្ហាញពីចំណុចវិជ្ជមាន និងអវិជ្ជមាន នៅក្នុងរូបគំនូរដែលលោកគូរនេះយ៉ាងដូច្នេះថា៖ «យើងបានឃើញទាំងអស់គ្នាតាមរយៈរូបភាពហ្នឹង វាមាន ២ ផ្នែក ផ្នែកខាងក្រោមហ្នឹងភាពអវិជ្ជមាន ផ្នែកខាងលើគឺជាភាពវិជ្ជមាន ផលអវិជ្ជមានដូចជាការគាំពារវាត្រូវបានបាត់បង់ហើយយើងព្យាយាមថែទាំទ្បើងវិញ ហើយបងប្អូនខ្មែរត្រូវតែបណ្តុះគំនិតនឹងស្រទ្បាញ់គាំពារនូវអ្វីដែលបាត់បង់ទៅហើយកន្លងមកហើយហ្នឹង មួយទៀតបញ្ហាទីក្រុងពាក់ព័ន្ធជាមួយប្លាស្ទិកសំរាមអីផ្សេងៗ យើងឃើញថាផលអវិជ្ជមានបច្ចុប្បន្នឥរិយាបថប្រជាជនខ្មែរមួយចំនួនលោកនៅតែមិនទាន់មានការផ្លាស់ប្តូរនៅទ្បើយទេ នៅចោលសំរាមពាសវាលពាសកាលនៅទ្បើយ…»។
យុវតី ទ្បេង មុនីអមរា ជាសិស្សរៀនថា្នក់ទី ១០ នៃវិទ្យាល័យព្រះស៊ីវត្ថិ បាននិយាយថា តាមរយៈរូបគំនូរខាងលើនេះបានបង្ហាញពីតម្លៃនៃការថែរក្សាបរិស្ថាន នឹងផ្តល់នូវការអប់រំជាច្រើនទៅដល់សាធារណៈជនទូទៅឱ្យកាន់តែយល់ដឹងបន្ថែមទៀតពីតម្លៃនៃបរិស្ថាន។
យុវតីរូបនះបន្តទៀតថា បច្ចុប្បន្ននេះវិស័យបរិស្ថាននៅប្រទេសកម្ពុជាកំពុងតែជួបបញ្ហាប្រឈមដ៏ធ្ងន់ធ្ងរផងដែរ ទាក់ទងនឹងការកាប់បំផ្លាញព្រៃឈើពីសំណាក់ជនខិលខូចមួយចំនួន ។ មុនីអមរា បានស្នើទៅដល់សិស្សានុសិស្ស និងប្រជាពលរដ្ឋគ្រប់រូបត្រូវចូលរួមថែរក្សាបរិស្ថាន ឱ្យមានអនាម័យមិនត្រូវបោះសំរាមចោលឥតសណ្តាប់ធ្នាប់នោះទេ។
យុវតីរូបនេះបន្ថែមថាដើម្បីចូលរួមចំណែកក្នុងការថែរក្សាបរិស្ថានគឺត្រូវមានការចូលរួមពីក្រសួងបរិស្ថាន ជាពិសេសប្រជាពលរដ្ឋគ្រប់រូបផងដែរ៖ «បរិស្ថាននៅក្នុងប្រទេសកម្ពុជាយើងជួបធំបំផុតគឺការកាប់បំផ្លាញព្រៃឈើ ដែលបានបាត់ច្រើនមែនទែន ពីមួយថ្ងៃទៅមួយថ្ងៃ ហើយមួយវិញទៀតនៅតាមតំបន់ខ្លះទៀតគឺមិនទាន់យល់ច្បាស់ព្រោះថានៅតែមានការបោះសំរាមចោលដដែល…»។
លោករដ្ឋលេខាធិការ សាបូ អូហ្សាណូ បានឱ្យដឹងទៀតថា ការដាក់ឱ្យសម្ពោធនៅរូបគំនូរបែបអប់រំបរិស្ថាននៅខាងមុខវិទ្យាល័យព្រះស៊ីវត្ថិនេះ គឺជាលើកទី ០១ ហើយក្រសួងបរិស្ថាននឹងបន្តផ្សព្វផ្សាយពីបញ្ហាបរិស្ថានបន្ថែមទៀតនៅតាមសាលានានា៕
