សាលារាជធានីភ្នំពេញហាមដាច់ខាត មិនឱ្យមានការដុតផាវ កាំជ្រួច ឬបង្កសំលេងផ្ទុះគ្រប់ប្រភេទ ក្នុងឱកាសពិធីបុណ្យចូលឆ្នាំប្រពៃណីចិន-វៀតណាម ចាប់ពីថ្ងៃទី ០៧ ដល់ថ្ងៃទី១០ ខែ កុម្ភៈ ឆ្នាំ២០១៦នេះឡើយ ដើម្បីរក្សាបាននូវសន្តិសុខ សុវត្តិភាព សណ្តាប់ធ្នាប់ និងរបៀបរៀបរយ សាធារណៈ។ នេះបើតាមយោងតាមសេចប្រកាសព័ត៌មានរបស់សាលារាជធានីភ្នំពេញ នៅថ្ងៃទី០៤ កុម្ភៈ ឆ្នាំ២០១៦នេះ។
សេចក្តីប្រកាសព័ត៌មានដដែលនេះ ក៏បានហាមរាល់ការហែក្បួន ផ្សេងៗ ទាំងបែបសាសនា និងប្រពៃដែលគ្មានការអនុញ្ញាត និងមិនអនុញ្ញាតឱ្យលេងល្បែងគ្រប់ប្រភេទ ដែលមានលក្ខណៈស៊ីសងឡើយ។រីឯការដុតក្រដាសសែនវិញ ហាមដាច់ខាត មិនឱ្យដុតលើចញ្ចើមផ្លូវ ឬទ្រូងផ្លូវសាធារណៈឡើយ។
សាលារាជធានីភ្នំពេញបានបញ្ជាក់ទៀតថា ចាប់ពីពេលនេះតទៅ អាជ្ញាធរមានសមត្ថកិច្ច គ្រប់លំដាប់ថ្នាក់ ត្រូវចាត់វិធានការឱ្យបានម៉ឺងម៉ាត់បំផុត កុំឱ្យមានការនាំចូលផាវ កាំជ្រួច ជាតិផ្ទុះគ្រប់ប្រភេទ តាមច្រកចេញចូលរាជធានីភ្នំពេញ និងត្រូវត្រួតពិនិត្យដកហូតវត្ថុទាំងនេះ ដែលមានទីតាំងលក់នៅក្នុរាជធានីភ្នំពេញ។
សេចក្តីប្រកាសព័ត៌មានដដែលបន្តថា នៅគ្រប់កន្លែងកំសាន្ត មន្ទីរ អង្គភាព រោងចកក្រ សហគ្រាស គេហដ្ឋាននានា ត្រូវរក្សាសន្តិសុខ សណ្តាប់ធ្នាប់ និងត្រូវប្រុងប្រយ័ត្នក្នុងការអុជទៀន ធូប ក្រដាសសែន ភ្លើងចង្ក្រាន អគ្គីសនី ដែលអាចបង្កឱ្យមានគ្រោះអគ្គីភ័យកើតមានជាយថាហេតុ៕
