តំណាងរាស្ត្រគណបក្សសង្គ្រោះជាតិ លោករៀល ខេមរិន្ទ្រធ្វើលិខិតបំភ្លឺជាថ្មីម្តងទៀត ទៅអង្គភាពប្រឆាំងអំពើ ពុករលួយ (ACU) ជុំវិញការចោទប្រកាន់ថាលោក បានកិបកេងប្រាក់ សម្រាប់រៀបចំការចុះត្រួតពិនិត្យព្រំដែនកម្ពុជា-វៀតណាម នៅខេត្តស្វាយរៀង ។
លិខិតបំភ្លឺរបស់ លោករៀល ខេមរិន្ទ្រ ចុះកាលពីថ្ងៃទី២០ មករា ឆ្នាំ២០១៦ ដែលអង្គភាពប្រឆាំងអំពើពុក បានចុះផ្សាយនៅក្នុងគេហទំព័រផ្លូវការរបស់ខ្លួន បានឱ្យដឹងថា លោកបានទទួលថវិកាពីសប្បុរសជនចំនួន២០,៧៥០ដុល្លារ។ ចំណែកឯការចំណាយរបស់លោកក្នុងការរៀបចំចុះត្រួតពិនិត្យព្រំដែនកម្ពុជា-វៀតណាម នៅខេត្តស្វាយរៀងកាលពីខែកក្កដា ឆ្នាំ២០១៥ សរុប ២០,៧៤០ដុល្លារ នៅសល់តែ១០ដុល្លារប៉ុណ្ណោះ។
គួរបញ្ជាក់ផងដែរថា កាលពី ដើមខែសីហា ឆ្នាំ២០១៥កន្លងទៅ លោកឱម យ៉ិនទៀងប្រធានអង្គភាពប្រឆាំងអំពើពុករលួយ បានស្នើឱ្យលោក រៀល ខេមរិន្ទ្រ បំភឺ្លឱ្យបានច្បាស់ពាក់ព័ន្ធនឹងការចោទប្រកាន់ថា លោកបានកេងប្រវញ្ច័យកប្រាក់ប្រមាណ ៥៥,០០០ដុល្លារ ពីការរៀបចំដំណើរចុះពិនិត្យមើល បង្គោលព្រំដែនកម្ពុជា-វៀតណាម នៅស្រុកកំពង់រោទ៍ ខេត្តស្វាយរៀង កាលពីថ្ងៃទី១៩ ខែកក្កដា ឆ្នាំ២០១៥។
ការស្វែងរកចម្លើយបំភ្លឺរបស់អង្គភាពប្រឆាំងអំពើពុករលួយនេះ ក្រោយមានពាក្យបណ្តឹងបីផ្សេងគ្នាពីជនអនាមិកបានប្តឹងតំណាងរាស្ត្របក្សប្រឆាំងរូបនេះទៅអង្គភាពប្រឆាំងអំពើពុករលួយ។ ពាក្យបណ្តឹង ពីការកេងប្រវ័ញ្ចប្រាក់ទាំង៣នោះ មានចំនួនទឹកប្រាក់ខុសៗគ្នា គឺបណ្តឹងទី១៖ មានទឹកប្រាក់ ១៥.០០០ដុល្លារ, ពាក្យបណ្តឹងទី២៖ មានទឹកប្រាក់ ២០.០០០ដុល្លារ និងបណ្តឹងទី៣ ៖ មានទឹកប្រាក់ ២០.០០០ដុល្លារ។
កន្លងមកលោករៀល ខេមរិន្ទ្រ ធ្លាប់បានធ្វើលិខិតបំភ្លឺមួយ ទៅកាន់អង្គភាពប្រឆាំងអំពើពុករលួយផងដែរ ដោយលោកបានបញ្ជាក់ថា លោកពុំដែលទទួលបាន ឬកិបកេងប្រាក់រាប់ម៉ឺនដុល្លារ ដូចទៅនឹង ការចោទប្រកាន់នោះឡើយ៕
