វាមិនមែនជារឿងងាយឡើយក្នុងនាមជាបុរស ឫ ស្វាម៉ីម្នាក់។ បុរសនៅសម័យទំនើបនេះ គឺអាចនិយាយបានថាឆាប់មានប្រតិកម្ម ខ្វាយខ្វល់ និង យល់តែចិត្តខ្លួនឯង ស្របពេលដែលគេរំពឹងទុកថាបុរសៗជាបុគ្គលខ្លាំងរឹងមាំ ជាអ្នកការពារ ហើយអាចដោះស្រាយបញ្ហាដែលកើតមានបាន។ បុរស មិនគួរឆាប់ប្រតិមកម្មលឿនពេកនោះទេ មិនដូច្នេះទេពួកគេមិនទាន់អាចក្លាយជាអ្នកគ្រប់គ្រងបញ្ហាបានឡើយ។
ក្នុងនាមជាបុរស យើងព្យាយាមធ្វើឲ្យមានតុល្យភាពរវាងការយកចិត្តទុកដាក់ និងភាពខ្លាំងរបស់ខ្លួន ក៏ព្រោះថា វាអាចជាវិធីត្រឹមត្រូវ។ មានរឿងជាច្រើនដែលបុរសជាប្តីបានប្រព្រឹត្ត ហើយធ្វើឱ្យប្រពន្ធឈឺចាប់ និងធ្វើឲ្យជីវិតអាពាហ៍ពិពាហ៍ប្តីប្រពន្ឋបញ្ចប់។
ខាងក្រោមនេះ ជាទង្វើ ៥ យ៉ាង ដែលបុរសៗអាចបំផ្លាញប្រពន្ធ និងជីវិតអាពាហ៍ពិពាហ៍ ដោយមិនដឹងខ្លួន៖
១. មិនបានផ្ដល់តម្រូវការចាំបាច់ដល់គ្រួសារ
ក្នុងនាមជាបុរស អ្នកមានទំនួលខុសត្រូវក្នុងការផ្ដល់ភាពកក់ក្ដៅទៅឱ្យគ្រួសារអ្នក ដោយមិនត្រូវគិតថាវាជាតួនាទីរបស់ភរិយាអ្នកតែឯងនោះទេ។ ការងារពិតជាមានតម្លៃណាស់សម្រាប់អ្នក ប៉ុន្តែអ្នកត្រូវទុកពេលវេលាខ្លះដើម្បីសុភមង្គលក្នុងគ្រួសារ។
វាធ្វើឱ្យមានតម្លៃណាស់ នៅពេលដែលអ្នកត្រលប់មកពីធ្វើការដល់ផ្ទះយឺត ប៉ន្តែឃើញនូវស្នាមញញឹមពីសមាជិកគ្រួសារទាំងអស់។ នេះក៏ព្រោះពួកគេយល់ពីអ្នកដែលឲ្យតម្លៃការងារ តែមិនភ្លេចគ្រួសារ។
២. ទុទិដ្ឋិនិយម
ពេលអ្នកនៅក្មេង អ្នកត្រូវបានគេបង្រៀនឱ្យ “ធ្វើខ្លួនឱ្យជាបុរស“ និង “កុំយំ“ ដោយគ្រាន់តែទទួលស្គាល់ការពិតថាជារឿងមិនល្អ ដែលតែងកើតមានក្នុងជីវិត។ ខណៈដែលវាជាដំបូន្មានល្អ ប្រពន្ធរបស់អ្នកក៏ត្រូវការអ្នកឱ្យគិតដោយសុទិដ្ឋិនិយមដែរ។ ជាទូទៅ ទំនាក់ទំនងរបស់អ្នកតែងតែជួបឧបសគ្គ ការបរាជ័យ ការឈឺចាប់ និងបញ្ហាសុខភាព។ ភរិយារបស់អ្នកមិនត្រូវការអ្នកផ្សេងប្រាប់ឱ្យនាងឈប់យំទេ នាងត្រូវការស្មាដ៏កក់ក្តៅរបស់អ្នកផ្អែកដើម្បីយំ។
៣. មិនពេញចិត្តរូបរាងកាយរបស់ភរិយា
ពិតហើយ មានបុរសមួយចំនួនធំធ្វើដូចនេះ។ ឥទ្ធិពលនៃការស្រលាញ់ខាងក្រៅស្តែងមក មិនត្រឹមមានលើទំនាក់ទំនងផ្លូវភេទឡើយ វារួមបញ្ចូលទាំងការឱបប្រពន្ធអ្នក មុនពេលដែលអ្នកចាកចេញទៅធ្វើការ ការកាន់ដៃរបស់នាងនៅពេលដើរ និងនៅស្និទ្ឋស្នាលជាមួយនាងពេលអ្នកកំពុងមើលកុនជាមួយគ្នា។
ប្រសិនបើអ្នកមិនធ្វើរឿងនេះជាមួយប្រពន្ឋ នោះអ្នកកំពុងតែបង្ហាយថាអ្នកមិនស្រឡាញ់ពេញចិត្តនាងឡើយ។ ក្ដីស្រឡាញ់ដែលអ្នកបង្ហាញនៅខាងក្នុងបន្ទប់គេង នឹងមិនបំពេញ ឫ ជំនួសឲ្រក្ដីស្រឡាញ់លើភរិយា ពេលនៅខាងក្រៅនោះទេ។
៤. ចាត់ទុករឿងផ្សេងសំខាន់ជាងភរិយា
ទោះជាអ្នកស្គាល់នារីរាប់រយនាក់ និងធ្លាប់មានសង្សារបួនដប់នាក់ក៏ដោយ ក៏ប្រពន្ធរបស់អ្នក នៅតែជាមនុស្សម្នាក់ដែលអ្នកបានជ្រើសរើស ក្នុងការចំណាយពេលមួយជីវិតរបស់អ្នកជាមួយនាងបន្តទៀត។ នាងនៅតែដឹងថាអ្នកនៅតែជ្រើសយកនាងមួយជីវិត ហើយនាងចង់ស្តាប់ពាក្យនេះរហូត ព្រោះនាងស្រលាញ់អ្នក។
គ្រប់ពេលចេញទៅខាងក្រៅជាមួយប្រពន្ឋ អ្នកតែងឆែកទូរស័ព្ទស្មាតហ្វូន (smartphone) របស់អ្នក ឬរាល់ពេលដែលអ្នកមកផ្ទះយឺតព្រោះការងារ ហើយមិនដែលទូរស័ព្ទមកប្រាប់នាង នេះជាទង្វើប្រាប់នាងថាមិនសំខាន់អ្វើទេសម្រាប់អ្នក។ ជាលទ្ធផល នាងអាចឆ្ងល់ថាតើអ្នកនៅតែបារម្ភពីនាង ដូចពេលដែលរៀបការហើយដំបូងៗទេ។ ដូច្នេះបើអ្នកស្រលាញ់ភរិយា អ្នកមិនគួរធ្វើបែបនេះឡើយ។
ការងារសំខាន់ តែមិនត្រូវភ្លេចថាអ្នកកំពុងធ្វើការដើម្បីអ្វីនោះដែរ។ ត្រូវចាំថា មិនត្រូវមានអ្វីសំខាន់ទាល់តែសោះក្នុងទូរស័ព្ទអ្នក ហើយរឿងដែលសំខាន់ជាងនេះ គឺអ្វីដែលកំពុងកើតមានឡើងនៅជុំវិញអ្នក។
៥. មិនយល់ចិត្តភរិយា
ស្ត្រីត្រូវការដឹងថា អ្នកនៅតែស្រលាញ់នាង ហើយពេញចិត្តនិងស្មោះនឹងនាងជារៀងរហូត។ អ្នកគិតថាអ្នកកំពុងតែបង្ហាញនូវក្ដីស្រឡាញ់ដោយការទៅធ្វើការងាររាល់ថ្ងៃ និងរកប្រាក់ចំណូលចូលគ្រួសារ។ ដូច្នេះហើយ អ្នកមិនមិនបានធ្វើអ្វីឱ្យច្រើនជាងនេះ (លើកលែងតែ អាចជាថ្ងៃបុណ្យនៃក្ដីស្រឡាញ់ ១៤ កុម្ភៈ)។ នេះជាការយល់ខុស។
អ្នកត្រូវដឹងថា ស្ត្រីជាភរិយាត្រូវការលើសពីនេះ ដើម្បីឱ្យឃើញពីការស្រឡាញ់របស់អ្នក ដូច្នេះហើយ ក្នុងនាមជាស្វាម៉ី អ្នកគួរចំណាយពេលបន្ថែមទៀត និងធ្វើអ្វីពិសេសៗដូចជាផ្ញើសារទៅ ឬក៏ទិញផ្កាទៅឱ្យនាង។ បន្ទាប់មក អ្នកនឹងភ្ញាក់ផ្អើលអំពីទង្វើ ហើយនឹងការលះបង់ដែលអ្នកនឹងទទួលបានត្រលប់មកវិញពីនាង៕
ប្រភព៖ familyshare.com
