យោងតាមសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃច័ន្ទម្សិលម៉ិញ បានក្រើនរំឭកដល់ម្ចាស់យានយន្តចង្កូតស្តាំទាំងអស់នៅក្នុងប្រទេសកម្ពុជា ដែលមិនទាន់បានបង់ពន្ធនិងអាករ ត្រូវប្រញាប់ទៅបង់ពន្ធឲ្យបានរួសរាន់។
អគ្គនាយកដ្ឋានគយនិងរដ្ឋាករកម្ពុជា រៀបចំដំណើរការចុះបញ្ជីយានយន្តចង្កូតស្តាំគ្មានពន្ធដែលមានវត្តមាន នៅក្នុងប្រទេសចាប់ពីថ្ងៃទី១៨ ខែមករា ដល់ថ្ងៃទី១៨ ខែកុម្ភៈ ឆ្នាំ២០១៦។
សេចក្តីជូនដំណឹងដដែល បានឱ្យដឹងទៀតថា ម្ចាស់យានយន្តចង្កូតស្តាំគ្រប់ប្រភេទ ដែលគ្មានពន្ធទាំងអស់ ត្រូវរួសរាន់ចូលមកបង់ពន្ធ ឬចុះបញ្ជីឲ្យបានឆាប់បំផុត។ ប្រសិនបើម្ចាស់រថយន្តពុំបានចូលមកចុះបញ្ជី តាមកាលកំណត់ខាងលើនឹងត្រូវចាត់ទុកថា ជារថយន្តនាំចូលថ្មីខុសច្បាប់ ដែលនឹងត្រូវទទួលរងនូវការបង្ក្រាបតាមបទប្បញ្ញត្តិជាធរមាន៕
