អ្នកវិភាគសង្គម និងពលរដ្ឋសាទរចំពោះវិធានការណ៍ថ្មី ដែលក្រសួងមហាផ្ទៃគ្រោងបើកការត្រួតពិនិត្យហាងផឹកស៊ីនៅទូទាំងប្រទេស ឲ្យបានច្បាស់លាស់ ដើម្បីត្រួតពិនិត្យជាតិស្រវឹង។ អ្នកវិភាគសង្គម និងពលរដ្ឋ លើកឡើងថា ចំណាត់ការនេះ អាចកាត់បន្ថយគ្រោះថ្នាក់ចរាចរណ៍នៅលើដងផ្លូវបានមួយកំរិត។
សម្ដេច ស ខេង រដ្ឋមន្ត្រីក្រសួងមហាផ្ទៃ បានចេញបញ្ជាឲ្យសមត្ថកិច្ចក្ដោបទិន្នន័យពីចំនួនហាងផឹកស៊ីនៅទូទាំងប្រទេសឲ្យបានច្បាសលាស់ ដើម្បីដាក់កម្លាំងចល័តតាមគោលដៅ ត្រួតពិនិត្យជាតិស្រវឹងនៅទូទាំងប្រទេស ។ ការថ្លែងរបស់រដ្ឋមន្ត្រីក្រសួងមហាផ្ទៃនេះ ធ្វើឡើងនៅក្នុងពិធីសន្និបាតបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៥ និងទិសដៅការងារឆ្នាំ២០១៦ កាលពីថ្ងៃទី០១ខែកុម្ភៈម្សិលមិញនេះ។
ប្រមុខរដ្ឋមន្ត្រីក្រសួងមហាផ្ទៃ បន្ថែមថា ក្រោយពីក្ដោបចំនួនហាងផឹកស៊ីបានហើយ សមត្ថកិច្ចនឹងដាក់គោលដៅនៅជិតហាងផឹកស៊ីតែម្ដង ដើម្បីឲ្យអ្នកដែលចូលទទួលទានគ្រឿងស្រវឹងតាមហាងទាំងនោះ អាចត្រួតពិនិត្យជាតិអាកុលនៅក្នុងខ្លួនបាន។
សម្ដេច ស ខេង៖ « ដំបូងត្រូវដឹងថា កន្លែងស៊ីផឹកមានប៉ុន្មាន ដាក់ឡានប្រចាំការនៅក្បែរនោះតែម្តង។ ហើយធ្វើម៉េចលើកទឹកចិត្តម្ចាស់ហាង ឲ្យសហការជាមួយសមត្ថកិច្ចរបស់យើងផង បើថាមានអ្នកផឹកស៊ីស្រវឹងនៅកន្លែងខ្លួនប្រាប់មកថា មានអ្នកស្រវឹងហើយជួយផង ឬក៏ហាងហ្នឹងគេហាមមិនបើកទេទុកនៅហ្នឹង ទុកឲ្យម៉ូលីសដឹកទៅ។ ឥឡូវធ្វើសាកអញ្ចឹងមើល! ម៉ូលីសដឹកតែពីរ បីករណីមើល! គឺថានឹងរាបឥឡូវ»។
ម្ចាស់ហាងផឹកស៊ីមួយកន្លែងស្ថិតក្នុងភូមិព្រែកព្នៅ លោក សុខ សុខា និយាយថា លោកសាទរចំពោះចំណាត់ការថ្មីនេះ ព្រោះវិធានការនេះ អាចពញ្ញាក់ស្មារតីប្រជាពលរដ្ឋ កុំឲ្យទទួលទានគ្រឿងស្រវឹងហួសកំណត់ដែលនាំឲ្យបាត់បង់ស្មារតីនៅពេលបើកបរ។ លើសពីនេះទៀត លោកថា វិធានការនេះនឹងអាចកាត់បន្ថយអាត្រាគ្រោះថ្នាក់ចរាចរណ៍លើដងផ្លូវបានផងដែរ។ បើទោះបីជាមានការបាត់បង់អតិថិជនខ្លះក្តី បន្ទាប់ពីសម្ថកិច្ចចាប់ផ្តើមរិតបន្តឹង តែលោក សុខា នៅតែសប្បាយចិត្ត និងស្វាគមន៍ចំពោះចំណាត់ការនេះថ្មីនេះ ។
លោក សុខ សុខា៖ «វាប៉ះពាល់ គឺប៉ះពាល់ហើយ! តែក្រសួងចេញជាព័ត៌មានផ្សព្វផ្សាយទៅហើយ វាមិនមែនត្រឹមតែយើងម្នាក់ឯង ម្ចាស់ហាងទាំងអស់ត្រូវចូលរួមចំណែកជួយម្នាក់តិចៗ ដើម្បីឲ្យមានភាពរីកចំរើនទៅទាំងអស់គ្នា»។
ទាក់ទងនឹងបញ្ហានេះដែរ អ្នកវិភាគសង្គម អ្នកស្រី ជា វណ្ណាត មានប្រសាសន៍ថា បទបញ្ជាថ្មីដែលរដ្ឋាភិបាលគ្រោងដាក់ចេញនេះ អាចនឹងបញ្ចៀសបញ្ហាគ្រោះថ្នាក់ចរាចរណ៍ដែលបង្កឡើងដោយការទទួលទានគ្រឿងស្រវឹង។ អ្នកស្រី ជា វណ្ណាត បន្ថែមថា ដើម្បីរួមចំណែកកាត់បន្ថយអត្រាគ្រោះថ្នាក់ចរាចរណ៍ ដែលបង្កឡើងពីការទទួលគ្រឿងស្រវឹង រដ្ឋាភិបាលត្រូវពង្រឹងសីលធម៌សង្គមឡើងវិញ ដោយអំពាវនាវឲ្យពលរដ្ឋត្រូវឈប់ទទួលគ្រឿងស្រវឹង និងហាមការផ្សព្វ ផ្សាយផលិតផលគ្រឿងស្រវឹងជាដើម។
លោកស្រី ជា វណ្ណាត៖ អញ្ចឹង!យើងត្រូវពង្រឹងសីលធម៌ក្នុងសង្គមឡើងមកវិញ គឺហាមមិនឲ្យផឹកស្រាហ្នឹងហើយនឹងជួយកាត់បន្ថយការមានគ្រោះថ្នាក់ បើយើងបណ្ដោយឲ្យអ្នកលក់ស្រាលក់ស្រាច់តែចិត្ត ផ្សព្វផ្សាយស្រាច់តែចិត្តយើងមិនហ៊ានថាកុំពិសារស្រាផង ហើយធ្វើម៉េចទៅ។
បើតាមរបាយការណ៍ រយៈពេល១ខែដំបូងនៃការអនុវត្តច្បាប់ចរាចរណ៍ថ្មីនេះ បានបង្ហាញថា គ្រោះថ្នាក់ចរាចរណ៍បានបណ្តាលឲ្យមានអ្នកស្លាប់ចំនួន១៨២នាក់ កើនឡើងចំនួន៣៤នាក់ ស្មើនឹង២៣ភាគរយ បើធៀបនឹងខែធ្នូឆ្នាំ២០១៥។ ចំណែកឯអ្នករបួសមានចំនួន៩៥១នាក់ កើន៧០នាក់ស្មើនឹង៨ភាគរយ។ គ្រោះថ្នាក់ទាំងនោះ គឺបណ្តាលមកពីអ្នកបើកបរហួសល្បឿនកំណត់មានចំនួន៤៥ភាគរយ វ៉ាជែង១៣ភាគរយ មិនគោរពសិទ្ធិអាទិភាព១១ភាគរយ ស្រវឹង១០ភាគរយ បត់កាត់ផ្លូវ៨ភាគរយ មិនប្រកាន់ស្តាំ៨ភាគរយ កត្តាយានយន្ត២ភាគរយ និងកត្តាផ្សេងៗ៣ភាគរយ៕
