en     km
en     km

ក្រុមអ្នកឃ្លាំមើលសង្គម ជំរុញឱ្យរដ្ឋាភិបាលអន្តរាគមន៍ករណីក្រុមហ៊ុនCIC​ ដើម្បីយុត្តិធម៌សង្គមពេញលេញ

Share

អ្នកជំនាញ និងអ្នកឃ្លាំមើលសង្គម ជំរុញឱ្យរដ្ឋាភិបាលអន្តរាគមន៍លើករណីសំណុំរឿងក្រុមហ៊ុន CIC​ ដើម្បីឱ្យមានយុត្តិធម៌សង្គមពេញលេញ។ ចំណែកក្រុមហ៊ុនCIC​ អះអាងថា ខ្លួន​កំពុង​ប្រមូល​លុយ​ដើម្បី​ផ្តល់​ដំណោះ​ស្រាយ​ដល់​អ្នក​វិនិ​យោគិន​វិញ។ លោក គីម ចាន់ចាវ រាយការណ៍

 

កាលពីអំឡុងពាក់កណ្ដាលឆ្នាំ២០២៣​ជន​រងគ្រោះ ដែល​ដាក់​ទុន​វិនិយោគ​ក្នុង​ក្រុមហ៊ុន ​ខេមបូឌាន អ៊ិនវេសស្ទ័រ ឃែភីថល ផាតនើរ ម.ក (CIC) បានស្នើឱ្យមានការដោះស្រាយ​វិបត្តិ​នៃ​ការ​បាត់​ទុន​វិនិយោគ រាប់​សិប​លាន​ដុល្លារ ម្ដងរួចមកហើយ ប៉ុន្តែការអំពាវនាវនោះហាក់មានការស្ងប់ស្ងាត់។

រហូត​ទាល់​តែ​មានការលើកឡើងពីអ្នកធ្វើមាតិកាតាមបណ្ដាញសង្គម គឺអ្នកនាង សូ កន្និដ្ឋា រួមនឹង​ប្រតិកម្ម ពី​អតីត​សមាជិក​ក្រុម​ប្រឹក្សាភិបាល​ក្រុមហ៊ុន​នេះ គឺ​លោក គួច ម៉េងលី ក្នុងអំឡុងខែមីនា ឆ្នាំ២០២៤នេះ ដែល​ទាមទារ​ឱ្យ​មាន​ការ​ស៊ើបអង្កេត នាំ​ជន​ល្មើស​ដែល​កិបកេង​លុយ​វិនិយោគ​ទៅ​ផ្ដន្ទាទោស ទើបឃើញមានការអន្តរាគមន៍ និងការឆ្លើយតបពីស្ថាប័នពាក់ព័ន្ធ។

លោក គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន និងជាអ្នកជំនួញផ្នែកវេជ្ជសាស្ត្រ និងអប់រំ បានចេញមុខបញ្ជាក់ថាខ្លួនក៏ជាជនរងគ្រោះមួយរូបដែរក្នុងចំណោមពលរដ្ឋរងគ្រោះដទៃទៀត។ អ្នក​ឧកញ៉ា គួច ម៉េងលី ដែល​ជា​ជន​រងគ្រោះ អស់​លុយ​ជិត ៣០ម៉ឺន​ដុល្លារ បានទទូចថា ករណីនេះ ត្រូវតែមានកា​រស៊ើប​អង្កេត​ពីព្រោះ​ថា​ប្រាក់​រាប់សិប​លានដុល្លារ​ត្រូវ​បាន​បាត់​បង់ ហើយ​គ្រួ​សារ​និង​ជីវិត​មនុស្ស​ជាច្រើន​នាក់​បានរង​នូវ​ផលប៉ះពាល់ និងការឈឺ​ចាប់​ដោយសារតែក្លែងបន្លំ ទាំងនេះ  ។

លោក គួច ម៉េងលី ជនរងគ្រោះ​អស់​លុយ​ជិត ៣០ម៉ឺន​ដុល្លារ ក្នុង​ការ​វិនិយោគ​ជាមួយ​ក្រុមហ៊ុន ស៊ីអាយស៊ី (CIC) ប្រភព រូបភាពពី ហ្វេសប៊ុក របស់លោក

អ្នក​ជំនាញ​ផ្នែក​ច្បាប់​ លោក វ៉ន ចាន់ឡូត​ ប្រាប់វិទ្យុស្ត្រី​ថា​ករណី​ក្រុមហ៊ុ​ន​CIC រដ្ឋាបាភិបាលមានតួនាទីទទួលខុសត្រូវចម្បងបំផុតនោះគឺ ធានាថាប្រសិនបើមានអំពើឆបោក គឺត្រូវចាត់វិធានការតាមផ្លូវច្បាប់ជាបន្ទាន់ចៀសវាង បញ្ហានេះរីករាលដាលបន្តទៀត ឬទុកឱកាសឱ្យជនឆបោកមានលទ្ធភាពនៅក្នុងការទទួលខុសត្រូវ។

លោក​ថ្លែង​ថា​៖«ប្រសិនបើវាជាអំពើឆបោក ដូច្នេះរដ្ឋាភិបាលត្រូវប្រញាប់នៅក្នុងការរក្សានូវអត្ថប្រយោជន៍របស់ជនរងគ្រោះ។ នៅក្នុងការរក្សានេះវាអាចមានជាការបង្កកទ្រព្យសម្បត្តិ ការរឹបអូសទ្រព្យសម្បត្តិ ឬក៏អ្វីផ្សេងៗដែលធានាថា នៅពេលដែលជនបង្ក អត់ទទួលខុសត្រូវចំពោះមុខច្បាប់ហើយ ដូច្នេះជនរងគ្រោះក៏គាត់មិនខាតបង់អំពីការដាក់ប្រាក់វិនិយោគរបស់ពួកគាត់ហ្នឹងបាទ»។

 

លោក វ៉ន ចាន់ឡូត​ អ្នក​ជំនាញ​ផ្នែក​ច្បាប់​  ប្រភព រូបភាពពី ហ្វេសប៊ុក របស់លោក

ក៏ប៉ុន្តែក្រុមហ៊ុន​ខេមបូឌាន អ៊ិនវេសស្ទ័រ ឃែភីថល ផាតនើរ ម.ក (CIC) បាន​អំពាវនាវ​ឱ្យវិនិយោគិន​ចូលរួម​ក្នុង​យន្តការ​ដោះ​ស្រាយ​ពាក់ព័ន្ធលុយ​ជាង​ ១០០​លាន​ដុល្លារ​សហរដ្ឋ​អាមេរិក​ ខណៈ​ក្រុមហ៊ុន​កំពុង​តែ​វេច​ខ្ចប់​ទ្រព្យដើម្បី​ដោះស្រាយ​ជូន​ទៅ​អ្នក​វិនិយោគ​វិញ​។ នេះ​បើ​តាមសេចក្តី​បំភ្លឺព័ត៌មាន​របស់​ក្រុមហ៊ុន​។ ​

ក្នុង​សេចក្តី​បំភ្លឺ​ព័ត៌មាន​ចុះ​ថ្ងៃទី​២៥​ ខែមីនា ឆ្នាំ​២០២៤​ ក្រុមហ៊ុន​ស៊ីអាយស៊ី​ បាន​រៀបរាប់​ថា ​បញ្ហា​ដែល​កំពុង​កើត​ឡើង​នៅក្នុង​ក្រុមហ៊ុន​គឺ​ជា​វិបត្តិ​ហិរញ្ញ​វត្ថុ​ដែល​រង​ឥទ្ធិពល​ពី​វិបត្តិ​សេដ្ឋកិច្ច​សកល​ និងភាព​ខ្វះចន្លោះ​ក្នុងការ​ត្រៀម​ខ្លួន​របស់​ក្រុមហ៊ុន​ពោល​គឺ​មិនមែន​ជា​សំណុំ​រឿង​បោកប្រាស់​ដូចការ​ចោទ​ប្រកាន់​តាម​រយៈ​បណ្តាញ​ទំនាក់​ទំនង​សង្គមមួយ​ចំនួន​ឡើយ​។

ក្រុមហ៊ុន​បញ្ជាក់​ថា​៖«ក្រុម​ហ៊ុន​នៅ​តែ​រក្សា​គោលជំហរ​យ៉ាង​ម៉ឺងម៉ាត់​ក្នុងការ​ដោះ​ស្រាយ​បញ្ហា​ចំពោះ​មុខ ដោយ​ធានា​ឱ្យ​បាន​ជាអតិ​បរមា​នូវ​ផលប្រយោជន៍​របស់​វិនិយោគិន​គ្រប់​រូប​។ ក្រុម​ហ៊ុន​នឹង​បន្ត​ធ្វើការ​ដោយ​អនុលោម​ទៅតាម​គោលការ​ណ៍​ និង​បទប្បញ្ញ​ត្តិ ដែល​កំណត់​ដោយ​ និយ័តករ​មូលប​ត្រ​កម្ពុជា​(នមក) ដែល​តែង​តែ​តម្កល់​ផល​ប្រយោជន៍​វិនិយោគិន​ជាអាទិភាព​»។

កាលពី២ខែមុន ក្នុងសំណុំរឿងក្រុមហ៊ុន ស៊ីអាយស៊ី នេះ ម្ចាស់គណនី ហ្វេសប៊ុកឈ្មោះ (Chivann Pen) គឺលោក យ៉ង ប៉ាក់ ធ្លាប់បានបញ្ជាក់ថា លោកក៏ជាជនរងគ្រោះម្នាក់ នៅក្នុងការវិនិយោគ​ជាមួយក្រុមហ៊ុនដែរ។

លោក យ៉ង ប៉ាក់ ត្រូវបានអាជ្ញាធរចាប់ដាក់ពន្ធនាគារ ក្រោយពីលោកបានផ្សព្វផ្សាយថា អតីតប្រធានអង្គការតម្លាភាពកម្ពុជា (TI) និងបច្ចុប្បន្នជារដ្ឋមន្ត្រីប្រតិភូអមនាយករដ្ឋមន្ត្រី គឺលោក ព្រាប កុល ជាប់ពាក់ព័ន្ធនឹងអំពើពុករលួយ លួចលុយក្នុងក្រុមហ៊ុននេះ។ ប៉ុន្តែការចោទប្រកាន់ពីលោក យ៉ង បាក់ ត្រូវបានលោក ព្រាប កុល ចេញមុខបដិសេធ។ លោក យ៉ង ប៉ាក់ ធ្លាប់ព្រលយសារមុនការចាប់ខ្លួនថា លោកមានភស្តុតាង ដែលបញ្ជាក់អំពីការជាប់ពាក់ព័ន្ធរបស់លោក ព្រាប កុល ក្នុងការកិបកេងលុយជាង៨០លានដុល្លារ។

លោក កឹម សុខ អ្នកវិភាគបញ្ហាសង្គមនៅក្រៅប្រទេស បានសរសរលើបណ្ដាញហ្វេសប៊ុកថា មុនស៊ើបអង្កេតក្រុមហ៊ុនCIC ត្រូវដោះលែងលោក យ៉ង ប៉ាក់។ លោកអះអាងថា  លោក យ៉ង ប៉ាក់ ជាជនរងគ្រោះ ចាញ់បោកក្រុមហ៊ុនដែរ។ តាមផ្លូវច្បាប់ គាត់ត្រូវមានឱកាសរកយុត្តិធម៌ឱ្យខ្លួនគាត់ផង និងក៏ជាសាក្សីសំខាន់មួយរូប ក្នុងដំណើរការស៊ើបអង្កេតលើក្រុមហ៊ុនផង។

និយ័តករ​មូលបត្រ​កម្ពុជា​វិញ កាលពី​ទី២៥ មីនា បាន​ចេញ​ប្រកាស​ព័ត៌មាន​ថា ទ្រព្យ​សកម្ម​របស់​ក្រុមហ៊ុន ត្រូវ​បាន​ប្រមូល​មក​វិញ​ប្រមាណ ៩០% នៃ​ចំនួន​ទឹក​ប្រាក់​សរុប។ និយ័តករ​មូលបត្រ​កម្ពុជា កំពុង​ជំរុញ​ការ​រៀបចំ​វេច​ខ្ចប់​ទ្រព្យ​ទាំង​នេះ ឱ្យ​បាន​ត្រឹមត្រូវ​តាម​ផ្លូវ​ច្បាប់ និង​បន្ត​ពិនិត្យ គ្រប់គ្រង​ការងារ​របស់​គណៈកម្មការ​ស្ដារ​ក្រុមហ៊ុន និង​មូលនិធិ​របស់​ក្រុមហ៊ុន​ជា​បន្ត​ទៀត ដើម្បី​ការពារ​ផល​ប្រយោជន៍​របស់​វិនិយោគិន​ស្រប​ច្បាប់។

លោក ឃឹម សុខហេង គ្រូជោគជ័យ ដែលជា​ថ្នាក់​ដឹកនាំ​ក្រុមហ៊ុន ស៊ីអាយស៊ី (CIC) ។ ប្រភព រូបភាពពី ហ្វេសប៊ុក CIC

លោក អ៊ុំ សំអាន អតីតតំណាងរាស្ត្រ អតីតគណបក្សសង្គ្រោះជាតិ លើកឡើងថា កុំថាឡើយពលរដ្ឋសាមញ្ញ សូម្បីតែឧកញ៉ា គួច ម៉េងលី ក៏ចាញ់បោកគ្រូជោគជ័យនិងក្រុមហ៊ុនស៊ី.អាយ.ស៊ី (CIC Plc) អស់ជិត៣សែនដុល្លារដែរ។

ចំណែកប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោកបណ្ឌិត គិន ភា អះអាងថា សង្គមយើងមិនអាចបណ្ដែតបណ្ដោយឱ្យជនប្រភេទនេះបន្តសកម្មភាពរបស់ខ្លួនដោយរួចផុតពីសំណាញ់ច្បាប់បានជាដាច់ខាត ពីព្រោះបើដូច្នេះ វានឹងបង្កទៅជាវិបត្តិសង្គមដ៏ធ្ងន់ធ្ងរទៅថ្ងៃក្រោយ គឺវិបត្តិទំនុកចិត្ត, វិបត្តិសីលធម៌, វិបត្តិធនាគារ, វិបត្តិហិរញ្ញវត្ថុ, វិបត្តិផ្លូវចិត្ត, វិបត្តិសន្តិសុខ, វិបត្តិវណ្ណៈ ហើយចុងក្រោយ គឺវិបត្តិនយោបាយ ដែលនាំឱ្យសង្គមចលាចល ពិបាកគ្រប់គ្រង។

មន្ត្រីជាន់ខ្ពស់រដ្ឋាភិបាលរូបនេះបញ្ជាក់ថា ច្បាប់ត្រូវតែកាត់ផ្តាច់ ជីកឫស រំលើងគល់ជនឈ្លើងសង្គមឱ្យអស់ ទើបស្រុកយើងមានសន្តិភាពនិងស្ថិរភាពយូរអង្វែង, មានវិបុលភាពនិងការអភិវឌ្ឍពិតប្រាកដ, មានយុត្តិធម៌សង្គមពេញលេញ និងមានសុខុដមរម្យនារឹងមាំ។ បើមិនដូច្នោះទេ ផ្លូវទៅកាន់ឆ្នាំ២០៣០ ពិតជាលំបាក ហើយផ្លូវទៅកាន់ឆ្នាំ២០៥០ កាន់តែវែងឆ្ងាយ៕

Share

Image
Image
Image