លោកស្រី ជា ស៊ុនដាណែត នាយិកាមណ្ឌលព័ត៌មានស្រី្តកម្ពុជា (វិទ្យុស្ត្រី FM 102) បានយកប្រាក់មួយចំនួន ដែលទទួលបានពីសប្បុរសជន ទៅជូនអ្នកជំងឺក្រីក្រ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត នៅរសៀលថ្ងៃទី២៩ ខែ មករា ឆ្នាំ២០១៦។
យុវតីម្នាក់នេះមកពីស្រុកកោះធំ ខេត្តកណ្តាល ត្រូវបានពេទ្យកាត់ជើងឆ្វេងដល់ក្រលៀន ដោយសារនាងដួលម៉ូតូនៅពេលភ្លៀង គ្រាន់តែរលាត់ខ្មងជើងបន្តិចទេ តែម៉ូតូសង្កត់លើជើងខាងឆ្វេងរយ:ពេល ៥ ខែហើយ។ បន្ទាប់ពីនោះមកជើងនាងបានហើម ហើយឈឺដេកយំរហូត ទោះជាលេបថ្នាំអីក៏មិនបាត់ដែរ។ បន្ទាប់មកទៀត ឪពុកនាងនាំទៅគ្រូខ្មែរ តែទីបំផុតឪពុកនាងនាំមកពេទ្យរុស្ស៊ី ហើយក៏ពេទ្យឱ្យកាត់ជើងបែបនេះ។
បុរសម្នាក់នេះ គ្រោះថ្នាក់ដោយភ្លើងឆក់ រឡេះរលួយសាច់ដៃទាំងសងខាង។ គាត់ជាកម្មករសំណង់ និងភរិយាជាកម្មការិនីរោងចក្រ នៅខេត្តស្វាយរៀង។
លោកយាយម្នាក់នេះ ដុះសាច់នៅកំប៉េះគូថ គាត់អត់មានគ្រែសម្រាន្តទេ រួចហើយគាត់ក៏សម្រាន្តនៅលើឥដ្ឋនៃអគារជនក្រីក្រនៃមន្ទីរពេទ្យនេះ។ មន្ទីរពេទ្យនេះអស់គ្រែសម្រាប់គាត់ ព្រោះអ្នកជំងឺជាជនក្រីក្រច្រើនពេក។
លោកយាយម្នាក់នេះ ជាទុរគតជនរស់នៅតែ ២ នាក់បងប្អូនចាស់ៗដូចគ្នា។ ប្អូនស្រីរបស់លោកយាយវះពកនៅក ហើយអ្នកជំងឺក្បែរគាត់ប្រាប់ថា ពួកគាត់ឱ្យបាយគាត់គ្រប់គ្នា។ គាត់មានលុយ ៥០,០០០ រៀល មកពេទ្យ។ នាយិកាបានជូនថវិការបស់សប្បុរសជនគាត់ស្រក់ទឹកភ្នែកព្រោះមិនដែលស្គាល់លុយនេះ និងមិនដែលមានលុយនេះទេ គាត់រំភើបមិនដឹងនិយាយថាម៉េច គឺមានតែយំ អ្នកគ្រែជិតប្រាប់ថា គាត់យំរាល់ថ្ងៃ ព្រោះគ្មានលុយទិញបាយហូប។
