កម្ពុជាស្ថិតក្នុងលេខរៀងទី១៥០ ក្នុងចំណោមប្រទេស១៦៨ និងមានចំណាត់ថ្នាក់ខ្ពស់ជាងគេក្នុងបណ្ដាប្រទេសក្នុងតំបន់អាស៊ាន ដែលកើតមានអំពើពុករលួយ។ នេះបើយោងតាមរបាយការណ៍របស់អង្គការតម្លាភាពប្រចាំឆ្នាំ២០១៥។
របាយការណ៍នេះ ត្រូវបានបង្ហាញដោយអង្គការតម្លាភាពកម្ពុជា ក្នុងសន្និសីទសារព័ត៌មាន ស្ដីពីសន្ទស្សន៍ការយល់ឃើញពីអំពើពុករលួយឆ្នាំ២០១៥ នៅព្រឹកថ្ងៃទី២៧ ខែមករា ឆ្នាំ២០១៦ នេះ នៅសណ្ឋាគារ រ៉ាហ្វល ឡឺរ៉ូយ៉ាល់ (Raffle Hotel Le Royal)។
លោក ព្រាប កុល នាយកប្រតិបត្តិអង្គការតម្លាភាពកម្ពុជា បាននិយាយថា មូលហេតុដែលកម្ពុជានៅតែមានចំណាត់ថ្នាក់ទាបខ្ពស់ជាងគេក្នុងចំណោមប្រទេសនៅអាស៊ាន និងក្បែរបាតតារាក្នុងចំណោមប្រទេសក្នុងពិភពលោកនោះ ក៏ព្រោះតែសន្ទស្សន៍នៃអំពើពុករលួយក្នុងស្ថាប័នសាធារណមួយចំនួននៅកម្ពុជាបានទាញយកពិន្ទុ ធ្វើឲ្យកម្ពុជាមានចំណាត់ថ្នាក់មិនល្អ។
លោកបន្តថា ការចាត់ចំណាត់ថ្នាក់អំពើពុករលួយនៅក្នុងប្រទេសកម្ពុជានេះ គឺធ្វើឡើងតែក្នុងវិស័យសាធារណៈតែប៉ុណ្ណោះ ដែលពេលនេះកម្ពុជាមានពិន្ទុសរុប២១ពិន្ទុ ស្មើនិងឆ្នាំ២០១៤។
លោក ព្រាប កុល ៖ «អញ្ចឹងអាធ្លាក់ពិន្ទុពី២៥នៅ១០ហ្នឹង បានធ្លាក់អស់១៥ពិន្ទុ ធ្វើឲ្យវាទាញមធ្យមភាគពិន្ទុដទៃទៀត។ ពិន្ទុដែលឡើងល្អជាងគេគឺវិស័យធុរៈកិច្ច បរិយាកាសនៃការវិនិយោគគឺឡើងល្អ តែមួយជ្រុងទៀតទាញធ្លាក់មក បូកទៅវានៅដដែល»។
នាយកប្រតិបត្តិអង្គការតម្លាភាពកម្ពុជារូបនេះបន្តថា ដើម្បីឲ្យកម្ពុជាឈានទៅរកពិន្ទុល្អវិញ គឺ រដ្ឋាភិបាលត្រូវតែធ្វើកំណែទម្រង់ប្រព័ន្ធតុលាការ ប្រព័ន្ធយុត្តិធម៌ អនុម័តច្បាប់ទទួលបានព័ត៌មានវិសោធនកម្មច្បាប់ប្រឆាំងអំពើពុករលួយ បង្កើតច្បាប់ការពារសាក្សី និងអ្នករាយការណ៍ពីអំពើពុករលួយ ដោះស្រាយបញ្ហាបក្សពួកនិយម និងបង្កលក្ខខណ្ឌងាយស្រួយដល់អ្នកចូលរួមប្រយុទ្ធប្រឆាំងអំពើពុករលួយជាដើម។
លោក ព្រាប កុល ៖ «ខ្ញុំថាទម្រង់ធំបំផុតដែលធ្វើ គឺកែទម្រង់ស្ថាប័នសំខាន់ៗ ដូចជាប្រព័ន្ធតុលាការ អង្គភាពប្រឆាំងអំពើពុករលួយ ស្ថាប័នរដ្ឋសភា ហើយនឹងស្ថាប័នជាតិសំខាន់ៗដែលធ្វើការងារផ្តល់សេវាសាធារណហ្នឹង»។
ទាក់ទងនឹងបញ្ហានេះ លោក ឱម យិនទៀង ប្រធានអង្គភាពប្រឆាំងអំពើពុករលួយ បានច្រានចោលរបាយការណ៍ដែលអង្គការតម្លាភាពអន្តរជាតិបង្ហាញនេះ ដោយលោកលើកឡើងថា ការផ្តល់ពិន្ទុនេះជាចេតនានយោបាយ និងមិនឈរលើការពិតជាក់ស្តែងនោះឡើយ។ លោកបន្តថា របៀបក្នុងការចាត់ចំណាត់ថ្នាក់អំពើពុករលួយរបស់អង្គការតម្លាភាពអន្តរជាតិនេះ មិនមានបច្ចេកទេសច្បាស់លាស់នោះទេ។
លោក ឱម យិនទៀង៖ «ខ្ញុំហ៊ានជំរាបថា នេះជាចំណាត់ថ្នាក់នយោបាយ វាមិនដែលការប្រឹងប្រែងប្រយុទ្ធប្រឆាំងអំពើពុករលួយខ្លាំងបែបនេះបែរជាធ្លាក់ចំណាត់ថ្នាក់នោះទេ។ ហើយម្យ៉ាងទៀតបច្ចេកទេសនៃការងារនៃការដាក់សន្ទស្សន៍នេះ វាមិនមែនដែលបច្ចេកទេសដែលបរទេសទទួលស្គាល់នោះទេ ហើយសហគមន៍អន្តរជាតិមិនលើកទឹកចិត្តឲ្យធ្វើនោះទេ»។
ដោយឡែក លោក ព្រាប កុល ឲ្យដឹងថា ការផ្តល់ចំណាត់ថ្នាក់ឲ្យកម្ពុជា គឺពឹងផ្អែកលើប្រភពទិន្នន័យចំនួន៧ រួមមាន៖ សន្ទស្សន៍នៃការផ្លាស់ប្តូររបស់មូលនិធិ Bertelsmann ឆ្នាំ២០១៦ ចំណាត់ថ្នាក់ហានិភ័យប្រចាំប្រទេសរបស់ភ្នាក់ងារសេដ្ឋកិច្ច ឆ្នាំ២០១៥ ចំណាត់ថ្នាក់ហានិភ័យប្រចាំប្រទេសស្តីពីការយល់ដឹងជាសកលឆ្នាំ២០១៤ ភ្នាក់ងារទីប្រឹក្សាហានិភ័យនយោបាយ និងសេដ្ឋកិច្ចទី្វបអាស៊ី និងសន្ទស្សន៍នីតិរដ្ឋរបស់គម្រោងយុត្តិធម៌ពិភពលោកឆ្នាំ២០១៥ ជាដើម។
សូមបញ្ជាក់ថា យោងតាមរបាយការណ៍អង្គការតម្លាភាពអន្តរជាតិ បានឲ្យដឹងថា កាលពីឆ្នាំ២០១៤ កម្ពុជាស្ថិតនៅលេខរៀងទី១៥៦ ក្នុងចំណោមប្រទេស១៧៥ ដែលអង្គការតម្លាភាពអន្តរជាតិរកឃើញថា មានអំពើពុករលួយខ្លាំងផងដែរ៕
