កីឡាការិនីកញ្ញា យិន អាមូនី ម្ចាស់ចំណាត់ថ្នាក់លេខ៤ ផ្នែកវាយកូនគោលក្នុងព្រឹត្តិការណ៍កីឡាស៊ីហ្គេមលើកទី៣២ កំពុងតំណាងឱ្យប្រទេសកម្ពុជាក្នុងការចូលរួមព្រឹត្តិការណ៍ប្រកួតកីឡាវាយកូនគោល Women’s Amateur Asia-Pacific Championship ឆ្នាំ២០២៤ នៅប្រទេសថៃ។
ផ្អែកតាម សហព័ន្ធកីឡាវាយកូនគោលកម្ពុជា កញ្ញា យិន អាមូនី នឹងចាប់ផ្ដើមប្រកួតនៅថ្ងៃទី១ ដល់ថ្ងៃទី៤ ខែកុម្ភៈ ឆ្នាំ២០២៤ នេះ ដោយមានកីឡាការិនីចូលរួមចំនួន ៩០រូប មកពី២២ប្រទេសទូទាំងពិភពលោក។
ប្រភពពីសហព័ន្ធកីឡាវាយកូនគោលកម្ពុជាដដែលថា នេះជាលើកទី១ហើយ ដែលកម្ពុជាបានចូលរួមក្នុងព្រឹត្តិការណ៍ Women’s Amateur Asia-Pacific Championship លើទឹកដីប្រទេសថៃ ក្នុងទីលានវាយកូនគោល Siam Country Club, Waterside ក្នុងខេត្តឈុនបូរី។ ជាមួយគ្នា កញ្ញា យិន អាមូនី ក៏ជាកីឡាការិនីមួយរូបដែលបានទៅហ្វឹកហាត់នៅក្នុងប្រទេសបារាំង និងត្រូវបានសហព័ន្ធ ជ្រើសរើសជាអត្ដពលិកវាយកូនគោល តំណាងឲ្យកម្ពុជា ខណៈនាងមានចំណាត់ថ្នាក់លេខ ១៦៥៦លើពិភពលោក។
សូមជម្រាបថា ព្រឹត្តិការណ៍ប្រកួត Women’s Amateur Asia-Pacific Championship (WAAP) ត្រូវបានបង្កើតឡើងដោយ The R&A និង Asia-Pacific Golf Confederation ដើម្បីស្វែងរកអ្នកមានទេពកោសល្យកំពុងលេចធ្លោ និងផ្តល់ផ្លូវសម្រាប់អ្នកចូលចិត្តកីឡា ជាពិសេសកីឡាការិនីឆ្នើមរបស់អាស៊ីទៅកាន់ឆាកអន្តរជាតិ៕
