en     km
en     km

សហគមន៍ខេត្តត្បូងឃ្មុំ ស្នើតុលាការ​ទម្លាក់​បទចោទ​លើ​ពួកគាត់ និង​ស្នើ​រដ្ឋាភិបាល ​អន្តរាគមន៍​បញ្ហាដីធ្លី ខណៈពួកគេ​ប្រឈម​បញ្ហា​ជីវភាព

Share

ភ្នំពេញ៖ ពលរដ្ឋប្រមាណ៥០នាក់ ដែលភាគច្រើនជាស្រ្តីមកពីសហគមន៍ខុសៗគ្នាចំនួន៣ ខេត្តត្បូងឃ្មុំ ឡើងទៅសាលាឧទ្ធរណ៍ខេត្តត្បូងឃ្មុំ ដោយមានកាន់បដាភ្ជាប់ជាមួយខ្លឹមសារក្នុងគោលបំណងទទូចឱ្យតុលាការទម្លាក់បទចោទប្រកាន់លើពួកគេ។ លើសពីនេះប្រជាសហគមន៍ទាំងនោះក៏ស្នើឱ្យមានការគិតគូរស្វែងរកដំណោះស្រាយជុំវិញករណីដីធ្លីដ៏រុំារ៉ៃ ដោយពួកគេអះអាងថាខ្លួនកំពុងតែរងគ្រោះ ហើយប្រឈមនឹងជីវភាពដោយសារតែបញ្ហានេះ។ ពួកគេចង់ឃើញការអន្តរាគមន៍ពីសំណាក់រដ្ឋាភិបាលអាណត្តិថ្មី ដោយជំរុញឱ្យមានការដោះស្រាយជាក់លាក់។

ប្រជាសហគមន៍ចំនួន ៣ ភូមិ រួមមាន ភូមិកំប្រើស ភូមិត្រពាំងព្រីងនិង ភូមិស្រែប្រាំង ដែលស្ថិតក្នុង ឃុំត្រពាំងព្រីង ស្រុកតំបែរ ខេត្តត្បូងឃ្មុំ នាំគ្នាកាន់បដា ថតនៅមុខសាលាឧទ្ធរណ៍ខេត្តត្បូងឃ្មុំ ដែលពួកគេស្នើសុំឱ្យតុលាការ ទម្លាក់បទចោទទៅលើ សមាជិកសហគមន៍របស់ពួកគេ។ ជនជាប់ចោទទាំង៤រូបនោះ រួមមាន លោកស្រី ឃឹមសុខជា លោកវឿន វឿ លោកចក់ ជ័យ លោក ពុំពេជ្រ និងសមាជិកផ្សេងទៀត ដែលតុលាការបានចោទពីបទ «ធ្វើឱ្យខូចខាតដោយចេតនា មានស្ថានទម្ងន់ទោស» ពាក់ព័ន្ធ​នឹង​ការ​តវ៉ា កុំឱ្យ​ក្រុមហ៊ុន​ចិន​ចូល​ឈូស​ឆាយដី​ដែល​កំពុង​មាន​ជម្លោះ ដែល​ប្រព្រឹត្តនៅចំណុចទួលពពែល ស្ថិតក្នុងភូមិសែប្រាំង ឃុំត្រពាំងព្រីង ស្រុកដំបែរ ខេត្តត្បូងឃ្មុំ កាលពីថ្ងៃទី១១ ខែមិថុនាឆ្នាំ ២០២០។

យ៉ាងណាមិញ ពួកគេក៏បានទទូចនឹងស្នើសុំ ដល់រដ្ឋាភិបាលអាណត្តិថ្មី អន្តរាគមន៍ដោយធ្វើយ៉ាងណាពន្លឿនដល់អាជ្ញាធរពាក់ពន្ធដោះស្រាយបញ្ហាដីធ្លីដែលពួកគេបាត់បង់ ដោយនៅអំឡុងខែមិថុនា ឆ្នាំ២០២១ ​តុលាការ​ខេត្តត្បូងឃ្មុំ កាត់ក្តីឱ្យពលរដ្ឋ​ឃុំ​ត្រពាំង​ព្រីង ស្រុក​តំបែរ​ខេត្ត​ត្បូងឃ្មុំ ​ចាញ់ក្ដី​ក្រុមហ៊ុន​ចិន ហាម៉ីនី វីន អ៊ិនវេសមេន (Hamenivent Investment)​ ហើយពួកគេអះអាងថាតាំងពីបាត់បង់ដីធ្លីទាំងនោះមក បណ្តាលឱ្យប្រជាពលរដ្ឋចំណាកស្រុកកាន់តែច្រើន ជំពាក់បំណុលមីក្រូហិរញ្ញវត្ថុនិងឯកជនកាន់តែកើនឡើង ហើយកន្លងមក តំណាងសហគមន៍ខ្លះ ក៏ធ្លាប់បាន ជាប់ពន្ធនាគារ ដោយសារបញ្ហាដីធ្លីដែរ៕

Share

ព័ត៌មានទាក់ទង

Image