សម្តេចនាយករដ្ឋមន្ត្រី ហ៊ុន សែន មានប្រសាសន៍ថា កម្ពុជាកំពុងធ្វើការចរចាជាមួយភាគីចិនជុំវិញដំណើរការសាងសង់ឃ្លាំងស្តុក និងម៉ាស៊ីនសម្ងួតស្រូវស្រូវនៅទូទាំងប្រទេសកម្ពុជា។
ការថ្លែងរបស់លោកនាយករដ្ឋមន្ត្រីនេះ ធ្វើឡើងនៅក្នុងវេទិកាស្រូវអង្ករកម្ពុជា លើកទី៥ នាសណ្ឋាគារសុខាភ្នំពេញ ព្រឹកថ្ងៃទី២៥ខែមករានេះ។ អ្នកវិភាគសេដ្ឋកិច្ចសាទរចំពោះដំណើរការនេះ និងបានលើកឡើងថា បញ្ហាកង្វះឃ្លាំងស្តុត និងម៉ាស៊ីនសម្ងួតស្រូវនេះ ជាហេតុនាំឲ្យកសិករត្រូវបង្ខំចិត្តលក់ស្រូវភ្លាមៗក្រោយពេលប្រមូលផល ដែលប្រការនេះហើយ បណ្តាលឲ្យឈ្មួញចទម្លាក់តំលៃស្រូវបានស្រេចតែចិត្ត។
ថ្លែងនៅក្នុងឱកាសបើកវេទិកាស្រូវអង្ករកម្ពុជា លើកទី៥ នេះ លោកនាយកមន្ត្រី ហ៊ុន សែន មានប្រសាសន៍ថា រដ្ឋាភិបាលកម្ពុជា បានពិភាក្សាជាមួយភាគីចិន ដើម្បីជំរុញការសាងសង់ឃ្លាំងស្តុកស្រូវ និងម៉ាស៊ីនសម្ងួត ដើម្បីរក្សាស្រូវទុកបានល្អ ជៀសវាងការខូចខាតក្រោយពេលប្រមូលផលរួច។ លោកនាយរដ្ឋមន្ត្រីបន្ថែមថា ការសាងសង់ឃ្លាំង និងម៉ាស៊ីនសម្ងួតស្រូវនេះ គឺជាផ្នែកមួយ ដែលអាចជំរុញឲ្យការនាំចេញអង្កររបស់កម្ពុជាសម្រេចដល់គោលដៅផងដែរ។ សម្តេច ហ៊ុន សែន៖ «ខ្ញុំក៏បានធ្វើការចរចាជាមួយមិត្តចិន ទាក់ទិនជាមួយនឹងកសាងឃ្លាំងនៅទូទាំងប្រទេស ដោយមានតម្រូវការឥទានមួយចំនួនពីភាគីចិន»។
អ្នកវិភាគសេដ្ឋកិច្ច លោក ស្រី ចន្ធី និយាយថា យន្តការរបស់រដ្ឋាភិបាលក្នុងការកសាងឃ្លាំង និងម៉ាស៊ីនសម្ងួតស្រូវពេលនេះ គឺជាវិធានការមួយល្អប្រសើរ ដែលអាចសម្រួលដល់គោលនយោបាយនាំអង្ករចេញរបស់កម្ពុជាឆាប់ទទួលបានជោគជ័យ។ តែយ៉ាងណា លោក ស្រី ចន្ធី បង្ហាញពីគន្លះមួយចំនួនដើម្បីពន្លឿនគោលនយោបាយនាំអង្ករចេញឲ្យបានមួយលានតោនយ៉ាងដូច្នេះថា ។ លោក ស្រី ចន្ធី៖ «ទីមួយត្រូវការឃ្លាំង ដើម្បីថែរក្សាទុកធ្វើយ៉ាងណាឲ្យយើងអាចប្រមូលទិញស្រូវដែលផលិតបានក្នុងប្រទេសយើងផ្គត់ផ្គង់ទៅដល់រោងម៉ាស៊ីនកែច្នៃសម្រាប់នាំចេញឲ្យបានពេញមួយឆ្នាំ។ ទី២ គឺត្រូវបញ្ចុះថ្លៃប្រេង ដែលវាពាក់ព័ន្ធនឹងការកែច្នៃ ថ្លៃដឹកជញ្ជូន ។ ទី៣ គឺត្រូវបញ្ចុះការប្រាក់ឥទាន ព្រោះកម្ពុជាថ្លៃការប្រាក់ឥទាននៅមានតំលៃថ្លៃនៅឡើយ»។
សូមរំលឹកថា កាលពីឆ្នាំ២០១០កម្ពុជាបានដាក់ចេញនូវគោលនយោបាយនាំអង្ករចេញឲ្យបាន១លានតោននៅឆ្នាំ២០១៥ ប៉ុន្តែគោលនយោបាយនេះ ត្រូវបរាជ័យ ដោយកម្ពុជាសម្រេចការនាំអង្ករចេញបានប្រមាណ តែ ៥៣ម៉ឺនតោនតែប៉ុណ្ណោះ។
សូមបញ្ជាក់ថា ប្រទេសដែលកម្ពុជានាំអង្ករចេញទៅច្រើនជាងគេ គឺប្រទេសចិន ប្រទេសបារាំង និងបណ្តាប្រទេសមួយចំនួនទៀតនៅតំបន់អឺរ៉ុប៕
