លោក ស សុខា រដ្ឋមន្ត្រីក្រសួងមហាផ្ទៃ បានបញ្ជាក់ឱ្យដឹងថា រាជរដ្ឋាភិបាលកម្ពុជា បានសម្រេចអនុញ្ញាតឱ្យពលករខ្មែរនៅក្រៅប្រទេសអាចធ្វើលិខិតឆ្លងដែន ឬពន្យារលិខិតឆ្លងដែន នៅតាមស្ថានទូតខ្មែរប្រចាំនៅប្រទេសដែលពួកគេបម្រើការងារ ដោយចាប់ផ្តើមបើកដំណើរការចាប់ពីថ្ងៃទី០១ ខែមករា ឆ្នាំ២០២៤តទៅ។

ក្នុងពិធីសម្ភោធដាក់ឱ្យប្រើប្រាស់ជាផ្លូវការ «មជ្ឈមណ្ឌលសំចតនិងស្ដារនីតិសម្បទាជនរងគ្រោះប៉ោយប៉ែត» នាព្រឹកថ្ងៃទី១៨ ខែធ្នូ ឆ្នាំ២០២៣នៅក្រុងប៉ោយប៉ែត ខេត្តបន្ទាយមានជ័យ លោករដ្ឋមន្ត្រីក្រសួងមហាផ្ទៃ បានលើកឡើងក្នុងសម្ដីដើមថា «ជាពិសេសពលករដែលធ្វើការនៅក្រៅប្រទេស ទាំងនៅប្រទេសថៃ ទាំងនៅប្រទេសកូរ៉េ ម៉ាឡេ នៅប្រទេសជប៉ុនជាដើម ពេលមួយនោះ (លោកនាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត) បានប្រគល់តួនាទីឱ្យខ្ញុំធ្វើការសិក្សាជាមួយក្រសួងសា្ថប័នពាក់ព័ន្ធ ជាពិសេសក្រសួងការងារ ក្នុងការសម្របសម្រួលក្នុងការដាក់មន្ត្រីនៃអត្តសញ្ញាណកម្ម ដើម្បីធ្វើPassport នៅប្រទេសគោលដៅដែលមានពលករច្រើន ឥឡូវនេះយើងនឹងចាប់ផ្តើមពីថ្ងៃទី០១ ខែមករា ឆ្នាំ២០២៤»។

លោក ស សុខា បានលើកឡើងពីភាពងាយស្រួលដែលពលករខ្មែរនៅក្រៅប្រទេសអាចធ្វើលិខិតឆ្លងដែន ឬពន្យារលិខិតឆ្លងដែន នៅស្ថានទូតថា៖ «បងប្អូនពលករដែលធ្វើការនៅខាងក្រៅមិនចាំបាច់មកភ្នំពេញ មកខេត្ត ក្នុងការធ្វើ ឬបន្តពន្យារ Passport គាត់ទៀតទេ អ៊ីចឹងគាត់គ្រាន់តែទៅស្ថានទូតខ្មែរប្រចាំប្រទេសនីមួយៗ ហើយក៏អាចស្នើសុំធ្វើ Passportថ្មី និងការដាក់ក្នុងការពន្យារ Passport តាមការចាំបាច់ណាមួយ»។

ទន្ទឹមនេះដែរ រដ្ឋមន្ត្រីក្រសួងមហាផ្ទៃ បានបញ្ជាក់ឱ្យដឹងថា ការអនុវត្តបើកឱ្យដំណើរការកន្លែងសម្រាប់ធ្វើលិខិតឆ្លងដែនសម្រាប់ពលរដ្ឋនៅក្រៅប្រទេស តាមប្រទេសដែលពួកគាត់កំពុងបម្រើការ អាចជួយសម្រួលដល់ការលំបាករបស់ពួកគាត់ ចំណេញពេលវេលា និងកាត់បន្ថយការចំណាយថវិកាលើការជិះយន្តហោះមកកម្ពុជាដើម្បីធ្វើ Passport ថ្មី ឬបន្តពន្យារ Passport។

លោក ស សុខា ក៏បានរំលឹកផងដែរថា រាជរដ្ឋាភិបាលកម្ពុជា  គ្រោងបើកឱ្យដំណើរការការធ្វើលិខិតឆ្លងដែននេះ នៅស្ថានទូតខ្មែរប្រចាំនៅប្រទេសថៃ ប្រទេសកូរ៉េ ប្រទេសម៉ាឡេស៊ី និងប្រទេសជប៉ុន ជាដើម៕

អត្ថបទ៖ចាន់រ៉ាត់ សៀវមិញ