នៅថ្ងៃពុធ ទី១៣ ខែធ្នូ ឆ្នាំ២០២៣នេះ មេធាវីថៃបាននិយាយថា សកម្មជនដែលទើបក្លាយជាសមាជិកសភា ត្រូវបានកាត់ទោសឱ្យជាប់ពន្ធនាគាររយៈពេល ៦ឆ្នាំ ពីបទប្រមាថព្រះមហាក្សត្រ។ ជុំវិញបញ្ហានេះ ចៅក្រមបានប្រកាសជាបន្តបន្ទាប់ ដោយចាត់ទុកថាជាការបរិហារកេរ្តិ៍រាជបល្ល័ង្គរបស់សេ្តចថៃ។
(កញ្ញា ងិន ស៊ាងលីម រាយការណ៍)
អ្នកនាង Rukchanok Srinork អាយុ២៩ឆ្នាំ ជាសមាជិករបស់គណបក្សចលនាឆ្ពោះទៅមុខផងនោះ កំពុងប្រឈមមុខនឹងការដកសិទ្ធិជាសមាជិកសភានៃទីក្រុងបាងកក ប្រសិនបើតុលាការមិនអនុញ្ញាតឱ្យនាងនៅក្រៅឃុំ។ ជាមួយគ្នានេះ តុលាការថៃបានដាក់ទោសអ្នកនាង Rukchanok ឱ្យជាប់ពន្ធនាគាររយៈពេល ៦ឆ្នាំ ពីបទប្រមាថព្រះមហាក្សត្រ។ នេះបើយោងតាមសារព័ត៌មាន CNA ចុះផ្សាយនៅថ្ងៃពុធ ទី១៣ ខែធ្នូ ឆ្នាំ២០២៣។
ជុំវិញសំណុំរឿងនេះ មេធាវីការពារក្តីឱ្យអ្នកនាង Rukchanok អះអាងថា ពួកគេនឹងបន្តប្តឹងទៅឧទ្ធរណ៍ចំពោះការកាត់ទោសនេះបន្ថែមទៀត ដើម្បីរកយុត្តិធម៌។ មេធាវីគូសបង្ហាញថា អ្នកនាង Rukchanok ត្រូវបានតុលាការចោទប្រកាន់ថាមានពិរុទ្ធ ចំពោះការរិះគន់លើការចូលរួមរបស់ក្រុមហ៊ុនរបស់ព្រះបាទ មហា វ៉ាជីរ៉ាឡុងកន (Maha Vajiralongkorn)ក្នុងការផលិតវ៉ាក់សាំងកូវីដ១៩ លើការបង្ហោះនៅលើទំព័រ X ឬ Twitter។
មកទល់នឹងពេលនេះ មិនមានអ្នកណាអាចទាក់ទងសុំការបញ្ជាក់ពីតុលាការក្នុងការកាត់ទោសនេះបាននៅឡើយទេ។ គួរបញ្ជាក់ថា ជាធម្មតា តុលាការរបស់ប្រទេសថៃមិនផ្សព្វផ្សាយជាសាធារណៈនូវដំណើរការផ្លូវច្បាប់ទាំងអស់នោះទេ ហើយនៅឯព្រះរាជវាំងវិញក៏មិនបានធ្វើអត្ថាធិប្បាយលើការផ្តន្ទាទោសក្រោមច្បាប់ប្រមាថព្រះមហាក្សត្រនេះនោះដែរ។
ច្បាប់ប្រមាថព្រះមហាក្សត្រនេះ ជាច្បាប់តឹងរ៉ឹងបំផុតមួយក្នុងពិភពលោក ក្នុងការការពារព្រះមហាក្សត្រ ម្ចាស់ក្សត្រី អ្នកស្នងមរតក និងរាជានុសិទ្ធិរបស់ប្រទេសថៃពីការរិះគន់។ ចំពោះជនណាដែលល្មើសនឹងច្បាប់នេះ នឹងត្រូវផ្តន្ទាទោសដាក់ពន្ធនាគាររហូតដល់ ១៥ឆ្នាំ។ យ៉ាងហោចណាស់ មនុស្សចំនួន ២៦២នាក់ ត្រូវបានចោទប្រកាន់ពីបទប្រមាថព្រះមហាក្សត្រចាប់តាំងពីឆ្នាំ២០២០។ នេះបើយោងតាមទិន្នន័យដែលតាមដានដោយក្រុមតស៊ូមតិសិទ្ធិមនុស្សរបស់ថៃ។
គួរបញ្ជាក់ថា កញ្ញា Rukchanok ជាសកម្មជនម្នាក់ដែលលេចធ្លោនៅក្នុងចលនាប្រជាធិបតេយ្យដែលដឹកនាំដោយយុវជនប្រឆាំងរដ្ឋាភិបាល និងបានអំពាវនាវឱ្យមានកែទម្រង់ព្រះបរមរាជវាំង និងច្បាប់នៃការប្រមាថព្រះមហាក្សត្រ ក្នុងនោះមនុស្សរាប់សែនលាននាក់បានគាំទ្រលើការសំណើរបស់អ្នកនាងផងដែរ។
ក្រោយមក អ្នកនាងបានចូលរួមនៅក្នុងគណបក្សចលនាឆ្ពោះទៅមុខ នៅក្នុងយុទ្ធនាការការកែប្រែច្បាប់ប្រមាថព្រះមហាក្សត្រសម្រាប់ការបោះឆ្នោតសកលកាលខែឧសភា ឆ្នាំ២០២៣។ គណបក្សចលនាឆ្ពោះទៅមុខនេះ បានឈ្នះការបោះឆ្នោត ក៏ប៉ុន្តែបែរជាបរាជ័យក្នុងការបង្កើតរដ្ឋាភិបាលទៅវិញ ដោយសារតែមានការប្រឆាំងយ៉ាងខ្លាំងពីសំណាក់សមាជិកសភា៕
ប្រភព៖ CNA ចុះនៅថ្ងៃពុធ ទី១៣ ខែធ្នូ ឆ្នាំ២០២៣
