en     km
en     km

ថៃត្រៀមទទួលជនភៀសខ្លួនរួចផុតពីសង្គ្រាមស៊ីវិលមីយ៉ាន់ម៉ា

Share

រដ្ឋាភិបាលថៃ​បាន​ត្រៀម​ខ្លួន​ជា​ស្រេច​ក្នុង​ការ​សាងសង់​ជម្រក​នៅ​តាម​បណ្តោយ​ព្រំដែន ​សម្រាប់ជនភៀសខ្លួនដែល​ដែលឆ្លងដែនមកពីប្រទេសមីយ៉ាន់ម៉ា។ នេះ​បើយោង​តាមសម្រង់សម្តីរបស់លោករដ្ឋមន្ត្រី​ក្រសួង​ការ​បរទេសថៃកាលពីថ្ងៃអាទិត្យ ទី០៣ ខែធ្នូ ឆ្នាំ២០២៣។

(កញ្ញា សៃ ចន្ធី រាយការណ៍)

យោងតាម​លោក Parnpree Bahiddha-Nukara រដ្ឋមន្ត្រី​ក្រសួង​ការ​បរទេសថៃបាននិយាយកាលពីថ្ងៃអាទិត្យ ទី០៣ ខែធ្នូ ឆ្នាំ២០២៣ថា រដ្ឋាភិបាលថៃកំពុងតាមដានស្ថានការណ៍នៅក្នុងប្រទេសមីយ៉ាន់ម៉ា និងត្រៀមអនុញ្ញាតទទួលនិងផ្តល់ជំនួយមនុស្សធម៌ដល់ជនភៀសខ្លួនដែលស្វែងរកទីកន្លែងជ្រកកោននៅក្នុងប្រទេសថៃ។ ជាងនេះ លោក​អំពាវនាវ​ឱ្យ​គ្រប់​ភាគីដែល​ពាក់ព័ន្ធទាំងអស់ ជួយគ្នាបញ្ឈប់ការប្រយុទ្ធតទល់គ្នានៅមីយ៉ាន់ម៉ា ខណៈ​ចាប់ផ្តើមបើកការចរចាគ្នា​ឱ្យបាន​ឆាប់​រហ័សតាម​ដែល​អាចធ្វើ​ទៅបាន​។ នេះបើយោងតាមសារព័ត៌មាន Bangkok Post។

ទន្ទឹមគ្នានេះ លោក Parnpree បាន​បន្ថែម​ថា លោក​មិនទាន់​បាន​ទទួល​របាយការណ៍​ណាមួយ​ដែលទាក់ទងនឹងស្ថានភាពជាក់លាក់ដែលកំពុងកើតមាននៅ​ក្នុង​ប្រទេស​មីយ៉ាន់ម៉ានោះ​ទេ។ យ៉ាងណាមិញ នៅក្រោមស្ថានភាពបច្ចុប្បន្ន លំហូរនៃជនភៀសខ្លួនដែលឆ្លងមកប្រទេសថៃគឺមិនទាន់មាននៅឡើយទេ។ ក៏ប៉ុន្តែប្រសិនបើមានអំពើហឹង្សា ឬការប្រយុទ្ធគ្នានៅតែបន្តដាក់សម្ពាធនិងបង្កជាភាពវឹកវរដល់ប្រជាពលរដ្ឋកាន់តែខ្លាំងឡើង ប្រជាពលរដ្ឋអាចនឹងរត់ភៀសខ្លួនទៅគ្រប់ទិសទី ដែលក្នុងចំណោមគោលដៅទាំងអស់អាចមានប្រទេសថៃផងដែរ។

គួរបញ្ជាក់ផងដែរថា ការប្រយុទ្ធគ្នារវាងកងកម្លាំងរដ្ឋាភិបាលមីយ៉ាន់ម៉ា និងកងទ័ពជនជាតិភាគតិចមីយ់ាន់ម៉ា ត្រូវបានគេរាយការណ៍នៅក្នុងទីក្រុង Myawadee ភាគអាគ្នេយ៍នៃប្រទេសមីយ៉ាន់ម៉ាកាលពីថ្ងៃសៅរ៍ ទី០២ ខែធ្នូ ឆ្នាំ២០២៣ថា ការប្រយុទ្ធគ្នារវាងកងកម្លាំងរដ្ឋាភិបាលមីយ៉ាន់ម៉ានិងកងទ័ពជនជាតិភាគតិចមីយ់ាន់ម៉ា បានធ្វើឱ្យអ្នកជំនួញនិងរថយន្តដឹកទំនិញជាច្រើនបានជាប់គាំងនៅមួយកន្លែងក្បែរច្រកព្រំដែន។ ការប្រយុទ្ធគ្នារវាងក្រុមយោធារដ្ឋាភិបាលនិងក្រុមប្រឆាំងនេះមានមូលដ្ឋានទ័ពនៅចម្ងាយប្រហែល ១០ គីឡូម៉ែត្រពីស្រុក Mae Sot ខេត្ត Tak ប្រទេសថៃ ដែលមានព្រំប្រទល់ជាប់នឹងប្រទេសមីយ៉ាន់ម៉ា។

សូមជម្រាបថា ស្ថានភាពតានតឹងរវាងក្រុមទាំងពីរនៅក្នុងប្រទេសមីយ៉ាន់ម៉ានេះ គឺមិនទាន់ផ្តល់ផលប៉ះពាល់ដល់ប្រទេសថៃនៅឡើយទេ។ ប៉ុន្តែប្រសិនបើមានជនភៀសខ្លួនឆ្លងកាន់ព្រំដែន នោះជនភៀសខ្លួនទាំងនោះនឹងទទួលបានជំនួយមនុស្សធម៌ពីសំណាក់ប្រទេសថៃ។ នេះបើយោងតាមលោកឧត្តមសេនីយ៍ឯក លោក Prasarn Saengsirirak មេបញ្ជាការកងទ័ពជើងគោកទី៣ នៃប្រទេសថៃ។ លោក​បានបញ្ជាក់ទៀត​ថា ទាហាន​ដែលបាន​ឈរ​យាម​ការពារ​ទឹកដី​ថៃ និងទាហាន​របប​យោធា​មីយ៉ាន់ម៉ា​កំពុង​កាន់​អំណាច ​បាន​សហការ​គ្នា​ដើម្បី​ការពារ​ការ​រំលោភ​បំពាន​លើ​ ប្រទេសថៃក្នុងរូបភាពណាមួយ៕

ប្រភព៖ Bangkok Posts ចុះថ្ងៃចន្ទ ទី០៤ ខែធ្នូ ឆ្នាំ២០២៣

Share

Image
Image
Image