គណៈកម្មាធិការជាតិសុវត្ថិភាពចរាចរណ៍ផ្លូវគោក ប្រកាសឲ្យពលរដ្ឋ ដែលមិនទាន់បាន បំពេញស្របតាមលក្ខខណ្ឌដែលមានចែងក្នុងច្បាប់ចរាចរណ៍ផ្លូវគោក ឲ្យប្រញាប់ទៅបំពេញ បែបបទផ្សេងៗ នៅមន្ទីរសាធារណដឹកជញ្ជូនរាជធានី ខេត្ដ។
យោងតាមលិខិតជូនដំណឹងរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ចុះថ្ងៃទី ១៩ ខែមករា ឆ្នាំ២០១៦ បានឲ្យដឹងថា ពលរដ្ឋដែលមិនទាន់បានចុះបញ្ជីយានយន្ដ គ្មានស្លាកលេខ គ្មានបណ្ណបើកបរ និងមិនទាន់មានលិខិតអនុញ្ញាត ធ្វើអាជីវកម្មដឹកជញ្ជូននោះ ត្រូវប្រញាប់ទៅបំពេញបែបបទផ្សេងៗ នៅមន្ទីរសាធារណៈការ និងដឹកជញ្ជូន រាជធានី-ខេត្ដ តាមលក្ខខណ្ឌច្បាប់ដែលបានកំណត់។
លិខិតជូនដំណឹងបានឲ្យដឹងទៀតថា មូលហេតុដែលគណៈកម្មាធិការជាតិសុវត្ថិភាពចរាចរណ៍ផ្លូវគោកចេញសេចក្តីប្រកាសនេះ ដោយសារ ចាប់ពីថ្ងៃទី១៥ ខែមីនា ឆ្នាំ២០១៦ ខាងមុខ មន្ដ្រីនគរបាលចរាចរណ៍ផ្លូវគោក នឹងចុះត្រួតពិនិត្យ រាល់បទល្មើសទាំងអស់ ដែលមានចែងនៅក្នុងច្បាប់ចរាចរណ៍ផ្លូវគោកថ្មីនេះ៕
