យុវតីកម្ពុជាជាច្រើនរូបបានចុះឈ្មោះនិងចូលរួមបង្ហាញទេពកោសល្យ សមត្ថភាព និងភាពច្នៃប្រឌិតរបស់ខ្លួនតាមរយៈការរចនាគំនូរក្នុងកម្មវិធីប្រកួតរចនាគំនូរសុបិនស្រ្តីជំនាន់ទី១០សម្រាប់ឆ្នាំ២០២៣។ ការប្រកួតរចនាគំនូរសុបិនស្ត្រី ឬ Dream Girls Design Contest បានសម្រឹតសម្រាំងស្វែងរកម្ចាស់ជ័យលាភីសម្រាប់ការប្រកួតរចនាគំនូរក្រោមប្រធានបទស្តីពី «អច្ឆរិយនៃប្រទេសកម្ពុជា» ដែលកើតចេញពីការស្រមើលស្រមៃ និងស្នាដៃផ្ទាល់របស់បេក្ខនារីប្រឡង។
បន្ទាប់ពីការរង់ចាំអស់រយៈពេលជាងពីរខែ នៅថ្ងៃអាទិត្យ ទី១៩ ខែវិច្ឆិកា ឆ្នាំ២០២៣ លទ្ធផលនៃការប្រកួតក៏បានដាក់បង្ហាញជាសាធារណៈ។ ក្នុងនោះ ម្ចាស់ជ័យលាភីលេខ៣នៃការប្រកួតរចនាគំនូរសុបិនស្ត្រីសម្រាប់ឆ្នាំ២០២៣នេះ បានទៅលើយុវតី៣រូបគឺ យុវតី ខាត់ រីណា, យុវតី ខៀវ សេរីរត្នសៅវត្តី និងយុវតី កៀន ដាវី។
ចំណែកម្ចាស់ជ័យលាភីលេខ២បានទៅលើយុវតី មៀន គីមចេង និងយុវតី ភាព ស្រីរ័ត្ន។ ក៏ប៉ុន្តែ ដោយសារតែស្នាដៃយុវតីពីររូបមានគំនិតច្នៃប្រឌិត ភាពលេចធ្លោ កខ្វះខាត និងសមត្ថភាពនៅមានកម្រិត ទើបធ្វើឱ្យគណៈកម្មាធិការសម្រេចឱ្យជ័យលាភីលេខ២ផ្ទួន។
យុវតីដែលទទួលបានជ័យលាភីលេខ២ទាំងពីររូបនេះ ទទួលបានពានរង្វាន់ម្នាក់មួយ និងអមជាមួយទឹកប្រាក់ចំនួន៣០០ដុល្លារអាមេរិក។ ចំណែកជ័យលាភីលេខ៣ ទទួលបានទឹកប្រាក់ចំនួន១០០ដុល្លារអាមេរិករៀងៗខ្លួនចំនួន៣រង្វាន់។
គួរបញ្ជាក់ថា កម្មវិធីប្រកួតរចនាគំនូរសុបិនស្ត្រី ឬ Dream Girls Design Contest ធ្វើឡើងសម្រាប់ស្ត្រីកម្ពុជាក្នុងការទទួលបានឳកាសរៀនសូត្រ ទទួលអាហារូបករណ៍ក្នុងសាលាសិល្បៈ និងដាក់បង្ហាញស្នាដៃគំនូរនៅតាមផ្សារទំនើបដូចជា AEON ឬ ហាង Amazing Cambodia និងអាកាសយានដ្ឋានកម្ពុជាផងដែរ។
កម្មវិធីប្រកួតនេះប្រព្រឹត្តឡើងជារៀងរាល់ឆ្នាំ ដោយក្នុងឆ្នាំ២០២៣នេះជាការប្រកួតលើកទី១០ហើយ។ កម្មវិធីនេះបានអាកខានរយៈពេល២ឆ្នាំ ដោយសារជម្ងឺរាតត្បាតកូវីដ១៩។ ការប្រកួតរចនាគំនូរសុបិនស្ត្រីនេះរៀបចំឡើងដោយ លោកស្រី WaKana Nukui ម្ចាស់ក្រុមហ៊ុន Blooming Life និង អ្នកនាង ហ៊ាង វត្តី ម្ចាស់ក្រុមហ៊ុន រៀល ថាយហ្គើរ៕
