ក្រុមទីមួយនៃជនជាតិថៃចំនួន៤១នាក់ បានចាកចេញពីកន្លែងជាប់គាំងមួយនៅភាគឦសាន នៃប្រទេសមីយ៉ាន់ម៉ា ក្រោយមានការប៉ះទង្គិចរវាងទាហានមីយ៉ាន់ម៉ា និងក្រុមឧទ្ទាមជនជាតិភាគតិច។
(កញ្ញា សៃ ចន្ធី រាយការណ៍)
ទាក់ទិននឹងជនជាតិថៃមួយក្រុម ដែលបានជាប់គាំងនៅទីតាំងមួយកន្លែងនៃភាគឦសាន ប្រទេសមីយ់ាន់ម៉ា ត្រូវបានជម្លៀសចេញពីស្រុកLaukkaing ទៅខេត្ត Kengtung នៃប្រទេសមីយ៉ាន់ម៉ា ដោយរង់ចាំការវិលត្រឡប់មកកាន់មាតុប្រទេសថៃវិញ។ យោងតាមរបាយការណ៍ពីកងកម្លាំង លោក Pha Muang យោធភូមិភាគទី៣បាននិយាយថា ជនជាតិថៃចំនួន ៤១នាក់ក្នុងនោះមានបុរស ២៣នាក់ និងស្ត្រី ១៨នាក់បានមកដល់ខេត្ត Kengtung ប្រទេសមីយ៉ាន់ម៉ា នៅវេលាម៉ោង ១០ និង ៣០ នាទីយប់នាថ្ងៃពុធ ទី១៥ ខែសីហា ឆ្នាំ២០២៣។ យ៉ាងណាមិញ ជនជាតិថៃទាំងនោះនឹងត្រូវវិលត្រឡប់មកកាន់មាតុប្រទេសវិញតាមច្រកព្រំដែន Ta chi lek នៃប្រទេសមីយ៉ាន់ម៉ា ទៅកាន់ស្រុក Mae Sai ភាគខាងជើងនៃខេត្តឈៀងរ៉ៃ ប្រទេសថៃ។
បើយោងតាមនាយករដ្ឋមន្ត្រីថៃ លោក សេដ្ឋា ថាវីស៊ីន បានប្រាប់អ្នកសារព័ត៌មាននៅទីក្រុង San Francisco កាលពីថ្ងៃអង្គារ ទី១៤ ខែវិច្ឆិកា ឆ្នាំ២០២៣ ថា ក្រសួងការពារជាតិគ្រោងនឹងបញ្ចប់ការវិលត្រឡប់មកមាតុប្រទេសរបស់ជនជាតិថៃទាំង ៤១នាក់ ពីច្រកព្រំដែន Ta chi lek វិញនៅថ្ងៃព្រហស្ប ទី១៦ ខែវិច្ឆិកា ឆ្នាំ២០២៣នេះ។ អ្នកនាំពាក្យរដ្ឋាភិបាលថៃ លោក Chai Wacharongke បាននិយាយកាលពីថ្ងៃពុធ ទី១៥ ខែវិច្ឆិកា ឆ្នាំ២០២៣ថា កងទ័ពថៃបានសម្របសម្រួលជាមួយកងទ័ពរដ្ឋ United Wa ដើម្បីជួយសម្រួលដល់ការជម្លៀសជនជាតិថៃទាំង ៤១នាក់នោះទៅកាន់ខេត្ត Kengtung ប្រទេសមីយ៉ាន់ម៉ា។
សូមជម្រាបផងដែរថាក្រុមជនជាតិថៃទាំង ៤១នាក់នេះ គឺជាផ្នែកមួយនៃជនជាតិថៃជាង ១៦២នាក់ដែលត្រូវបានក្រុមឆបោក បោកឱ្យទៅធ្វើការខុសច្បាប់នៅក្នុងប្រទេសមិយ៉ាន់ម៉ា និងទើបតែត្រូវបានជួយសង្គ្រោះដោយអាជ្ញាធរមីយ៉ាន់ម៉ា និងបញ្ចូនមកទីក្រុង Linchang ក្នុងខេត្ត Yunanរបស់ប្រទេសចិនកាលពីថ្ងៃទី៧ ខែវិច្ឆិកា ឆ្នាំ២០២៣កន្លងទៅ៕
ប្រភព៖ Bangkok post ចុះថ្ងៃព្រហស្បត្តិ៍ ទី១៦ ខែវិច្ឆិកា ឆ្នាំ២០២៣
