លោក សម រង្ស៊ី ប្រធានគណបក្សសង្គ្រោះជាតិបានថ្លែងប្រាប់អ្នកកាសែតនៅមុខច្រកចេញព្រលានយន្តហោះអន្តរជាតិ ភ្នំពេញ នៅព្រឹកថ្ងៃទី ១០ ខែ មថុនា នេះថាលោករីករាយនឹងចូលស្បថតាមការបបួលរបស់ លោកនាយករដ្ឋមន្រ្តី ហ៊ុន សែន ពាក់ព័ន្ធ នឹងបញ្ហាលួចបន្លំសន្លឹកឆ្នោត។ ប៉ុន្តែលោកចាត់ទុកថាការស្បថស្បែនេះគ្រាន់តែជារឿងអបិយជំនឿ ប៉ុណ្ណោះ។
ក្រោយពីដាក់ជើងជាន់ដីកម្ពុជា នៅម៉ោង ៩ ព្រឹក ថ្ងៃពុធនេះ លោក សម រង្ស៊ី ប្រធានគណបក្សសង្គ្រោះជាតិបានថ្លែងប្រាប់អ្នក សារព័ត៌មានថា រូបលោកមិនខ្លាចនឹងចូលខ្លួនទៅស្បថនៅមុខវត្ថុស័ក្តិសិទ្ធិតាមការបបួលរបស់លោក នាយករដ្ឋមន្រ្តី ហ៊ុន សែន ពាក់ព័ន្ធ នឹងបញ្ហាលួចបន្លំ សន្លឹកឆ្នោតនោះឡើយ។ «បើចង់បញ្ជាក់ថាការបោះឆ្នោតកន្លងទៅមានភាពសុក្រឹត…គួរណាស់ យើងរាប់សន្លឹកឆ្នោតឡើងវិញទៅ យើងបើកហិបឆ្នោត យើងបើកបាវដែលដាក់សន្លឹកឆ្នោត ហើយរាប់ឡើងវិញ តាមបច្ចេកទេស ត្រឹមត្រូវ។ រឿងស្បថមិនអីទេ ចង់ស្បថពេលណាក៏បានដែរ…»។ តែទោះជាយ៉ាងនេះក្តី ក៏ប្រធាន គណបក្សសង្គ្រោះជាតិ រូបនេះ មិនបានបញ្ជាក់ពី ពេលវេលា ថានឹង ទៅស្បថ នៅពេលណា នោះទេ។
សារឆ្លើយតបរបស់ ប្រធានបក្សប្រឆំាងបែបនេះធ្វើឡើងបន្ទាប់ពី លោកនាយករដ្ឋមន្រ្តី ហ៊ុន សែន មានប្រសាសន៍នៅវិមាន រដ្ឋសភា កាលពីថ្ងៃទី ០៨ ខែ មិថុនា ថាបានបបួលអ្នកដែលនិយាយថា គណបក្សប្រជាជនលួចសន្លឹកឆ្នោត ឲ្យស្បថនៅមុខ ព្រះអង្គដងកើ ឲ្យរន្ទះបាញ់ដើម្បីជម្រះមន្ទិលចោទថា គណរបស់លោកជាអ្នកលួចបន្លំសន្លឹកឆ្នោត។ «តើគណបក្សមួយៗហ៊ាន ស្បថទេជាមួយនឹងគណបក្សប្រជាជននៅព្រះអង្គដងកើ ?…បើគណបក្សប្រជាជនលួចសន្លឹកឆ្នោតឲ្យគណបក្សប្រជាជនស្លាប់ ទាំងអស់ដោយត្រូវគ្រាប់ រន្ទះបាញ់ ប៉ុន្តែបើអ្នកណាភូត ចោទគេខុស អ្នកហ្នឹងក៏ត្រូវដូចគ្នាវិញដែរ រន្ទះបាញ់ទាំងអស់»។
ជុំវិញការបបួលគ្នាស្បថរបស់អ្នកនយោបាយនេះ អ្នកតាមដានបញ្ហាសង្គម លោក កែម ឡី បានចាត់ទុកថាការបបួលគ្នាស្បថនៅពេលនេះ ប្រៀបដូចជាល្បែងក្មេងលេង និងជាភាពអាមាសមួយ សម្រាប់ប្រមុខរដ្ឋាភិបាល ចំពោះយុវជនខ្មែរ ជំនាន់ក្រោយប៉ុណ្ណោះ ។ លោកថា រដ្ឋាភិបាលគួរតែយក ផ្នែកសិក្សាស្រាវជ្រាវតាមបែបវិទ្យាសាស្រ្ត មកបញ្ជាក់ពីភាពស្អាតស្អំនោះ ទើបជាការ ប្រសើរជាង។
ចំណែកអ្នកវិទ្យាសាស្រ្តនយោបាយ លោក សុខ ទូច វិញយល់ឃើញថា «បើសិនជា អ្នកនយោបាយស្បថវាជារឿងថ្មីសម្រាប់ សង្គមពិភពលោក ។ ប៉ុន្តែប្រហែលជា អ្នកនយោបាយ មិនដឹងថារកអ្វីបង្ហាញ ភាពស្មោះត្រង់ រវាងគ្នានឹងគ្នា ទើបយកការស្បថ ធ្វើជាកំណត់…»។ មិនខុសគ្នា ប៉ុន្មានពីលោក កែម ឡី អ្នកវិទ្យាសាស្រ្តនយោបាយរូបនេះបន្ថែមថា អ្នកនយោបាយទាំងពីរគួរតែ ដោះស្រាយគ្នា តាមរយៈ ផ្នែកបច្ចេកទេសរដ្ឋបាលវិញ ប្រសើរជាង បបួលគ្នា ទៅស្បថដូច្នេះ ។
ទាក់ទងនឹង បញ្ហាបបួលមេបក្សប្រឆំាងស្បថ របស់ លោកនាយករដ្ឋមន្រ្តី ហ៊ុន សែន នេះសហព័ន្ធនិស្សិតបញ្ញវន្តកម្ពុជាក៏បាន ឲ្យលោក ហ៊ុន សែន កំណត់ថ្ងៃស្បថ នៅព្រះអង្គដងកើ ដើម្បីបញ្ជាក់ពីភាពស្អាតស្អំរបស់គណបក្សប្រជាជន ជុំវិញលទ្ធផល បោះឆ្នោត ជ្រើសតាំង តំណាងរាស្ត្រ អាណត្តិទី៥ ។ នៅក្នុងលិខិតចុះ ថ្ងៃទី៩មិថុនា របស់ លោក ម៉ៅ ពិសេស ជាប្រធានសហព័ន្ធនិស្សិតបញ្ញវន្តកម្ពុជា ក៏បានប្រកាសចេញមុខស្បថ តទល់ ជាមួយលោក នាយករដ្ឋមន្ត្រី ហ៊ុន សែន នៅមុខព្រះអង្គដងកើ ផងដែរ រឿងបញ្ហាបន្លំសន្លឹកឆ្នោតនេះ៕
