ប្រទេសហ្វីលីពីនចេញមុខព្រមានចិនសាជាថ្មី ជុំវិញការរារាំងទូកហ្វីលីពីនមិនឱ្យធ្វើដំណើរឆ្លងកាត់នៅក្នុងដែនសមុទ្រចិនខាងត្បូង។ ការព្រមានធ្វើឡើងបន្ទាប់ពីថ្មីៗនេះ ចិនបានបំផ្លាញទូកមួយគ្រឿងរបស់ហ្វីលីពីន។
(កញ្ញា កែវ សុជាតា រាយការណ៍)
ប្រទេសហ្វីលីពីនបានអំពាវនាវដល់ប្រទេសចិនសាជាថ្មីម្តងទៀត ជុំវិញបញ្ហានៅដែនសមុទ្រចិនខាងត្បូង។ នៅក្នុងនោះដែរ ប្រទេសហ្វីលីពីនបានព្រមានចំៗឱ្យចិនប្រញាប់បញ្ឈប់រាល់សកម្មភាពដែលបង្កជាភាពតានតឹងមកលើទំនាក់ទំនងរវាងប្រទេសទាំងពីរ។ នេះបើយោងតាមសារព័ត៌មាន CNA ចុះផ្សាយនៅថ្ងៃច័ន្ទ ទី២៣ ខែតុលា ឆ្នាំ២០២៣។
ទន្ទឹមគ្នានេះ អ្នកនាំពាក្យក្រុមប្រឹក្សាសន្តិសុខជាតិហ្វីលីពីន លោក Jonathan បាននិយាយនៅក្នុងសន្និសីទសារព័ត៌មាននៅថ្ងៃច័ន្ទ ទី២៣ ខែតុលានេះថា ប្រទេសចិនកំពុងមានចំណាត់ការ និងគោលនយោបាយក្នុងការជ្រៀតជ្រែកបេសកកម្មផ្គត់ផ្គង់ និងផ្តល់ជំនួយរបស់ហ្វីលីពីនទៅដល់កងកម្លាំងរបស់ខ្លួននៅលើដែនសមុទ្រ។ លោកបន្តទៀតថា ឆ្មាំសមុទ្រចិនបានបំផ្លាញទូកមួយគ្រឿងរបស់ហ្វីលីពីនកាលពីព្រឹកថ្ងៃអាទិត្យ ទី២២ ខែតុលា ឆ្នាំ២០២៣ ក៏ប៉ុន្តែពុំមាននរណាម្នាក់រងគ្រោះថ្នាក់អ្វីនោះទេ។
យ៉ាងណាមិញ នៅក្នុងឧបទ្ទវហេតុកាលពីព្រឹកថ្ងៃអាទិត្យនោះ ឆ្មាំឆ្នេរសមុទ្ររបស់ចិនបានឱ្យដឹងថា មានការប៉ះទង្គិចគ្នាបន្តិចបន្តួចរវាងកប៉ាល់ចិននិងទូកហ្វីលីពីនពិតប្រាកដមែន។ ឆ្មាំសមុទ្រចិនអះអាងថា នេះជាកាតព្វកិច្ច និងជាតួនាទីរបស់ឆ្មាំឆ្នេរសមុទ្រក្នុងការរារាំងទូកមិនឱ្យដឹកជញ្ជូនសម្ភារៈខុសច្បាប់ទៅផ្គត់ផ្គង់ឱ្យនាវាចម្បាំង។
ទោះបីជាយ៉ាងណាក៏ដោយ រដ្ឋាភិបាលទីក្រុងម៉ានីលបានឆ្លើយតបដោយថ្កោលទោសឆ្មាំសមុទ្រចិនថា ករណីនេះស្ថិតក្នុងកម្រិតគ្រោះថ្នាក់បំផុតចំពោះការរារាំងមិនឱ្យទូកហ្វីលីពីនធ្វើដំណើរឆ្លងកាត់។
សូមរំលឹកថា ប្រទេសទាំងពីរធ្លាប់មានការប៉ះទង្គិចគ្នាជាច្រើនលើករួចមកហើយនៅក្នុងតំបន់មួយចំនួននៃសមុទ្រចិនខាងត្បូងក្នុងរយៈពេលប៉ុន្មានខែថ្មីៗនេះ។ ជាពិសេសនៅតំបន់ជម្លោះ Second Thomas Shoal ដែលជាផ្នែកមួយនៃប្រជុំកោះ Spratly។
កន្លងមកប្រទេសហ្វីលីពីនបានបញ្ជូនគ្រឿងផ្គត់ផ្គង់ផ្សេងៗទៅឱ្យទាហានដែលឈរជើងនៅលើកប៉ាល់ដឹកជញ្ជូនសម័យសង្គ្រាមលោកលើកទីពីរដែលមានសភាពច្រេះចាប់មួយគ្រឿង ដែលត្រូវបានប្រើជាប៉ុស្តិ៍ជួរមុខនៅតំបន់ Second Thomas Shoal នោះ។ ករណីនេះបានធ្វើឱ្យឆ្មាំការពារដែនសមុទ្ររបស់ចិនបន្តបញ្ជូននាវាជារឿយៗទៅរារាំងបេសកកម្មរបស់ហ្វីលីពីន៕
ប្រភព៖ CNA ចុះថ្ងៃច័ន្ទ ទី២៣ ខែតុលា ឆ្នាំ២០២៣
