ក្រុមសហជីព សមាគម និងអង្គការមិនមែនរដ្ឋាភិបាល បានចេញសេចក្តីថ្លែងការណ៍រួមមួយ ថ្កោលទោលចំពោះ ហេតុការណ៍គ្រោះថ្នាក់ចរាចរណ៍នៅខេត្តកំពង់ស្ពឺកាលពីម្សិលមិញ បានបណ្តាលឱ្យកម្មកររោងចក្រ ៥ស្លាប់ និងរងរបួស៦៨នាក់។
យោងតាមសេចក្តីថ្លែងការណ៍រួមចេញនៅថ្ងៃទី១៣ ខែ មករា ឆ្នាំ ២០១៦នេះបានឱ្យដឹងថា ក្រុមសហជីព និងអង្គការចំនួន ២០ នេះ ចូលរួមរំលែកទុកដ៏ក្រៀមក្រំជាមួយក្រុមគ្រួសារនៃសព និងបួងសួងឲ្យកម្មករ កម្មការនី ដែលកំពុងតែរងរបួសទាំង៦៨នាក់ឆាប់ជាសះស្បើយ។
តាមសេចក្តីថ្លែងការណ៍ដដែល បានបញ្ជាក់ថា ចំនួនអ្នកស្លាប់ និងរងរបួសច្រើនបែបនេះ ក្រុមសហជីព និងអង្គការចំនួន ២០ នេះ មិនអាចទទួលយកបានឡើយ។ សេចក្តីថ្លែងការណ៍បានបញ្ជាក់ថា កម្មករកាត់ដេរទាំងអស់ មិនគួរទទួលភាពខ្លាចចំពោះកាតបាត់បង់ជីវិត ដោយសារការធ្វើដំណើរទៅធ្វើការងារនោះទេ។
ក្រុមសហជីព និងអង្គការទាំង ២០ នេះ បានស្នើឱ្យរដ្ឋាភិបាលត្រូវរៀបចំពិគ្រោះយល់ភ្លាមៗ ជាមួយសហជីពឯករាជ្យ ដើម្បីដោះស្រាយមធ្យោបាយធ្វើដំណើរទៅ និងមក និងស្នើឱ្យបេឡាជាតិរបបសន្តិសុខសង្គម និងភាគីរោងចក្រ ត្រូវធានាសំណងផ្លូវច្បាប់ឱ្យទាន់ពេលវេលាដល់ជនរងគ្រោះ ពិសេសអាជ្ញាធរ ត្រូវតែដោះលែងសមាជិកសហជីពចំនួន៥នាក់ ដែលឃាត់ខ្លួនកាលពីម្សិលមិញ៕
