ខេត្ដកំពង់ស្ពឺ៖ កាលពីព្រឹកម្សិលមិញតំណាងសហជីពប្រាំនាក់ ត្រូវអាជ្ញាធរខេត្ដកំពង់ស្ពឺ ឃាត់ខ្លួនក្រោមបទចោទថា បានបង្ករបួសស្នាម លើកម្មកររោងចក្រ ដែលភាគីរោងចក្របានប្ដឹង។ ដោយឡែកនៅព្រឹកថ្ងៃពុធនេះ តំណាងសហជីព រួមជាមួកម្មករ ប្រមាណ ៣០០នាក់ បានលើកគ្នាទៅតវ៉ានៅមុខសាលាដំបូងខេត្ដកំពង់ស្ពឺ ទាមទារឱ្យតុលាការដោះលែងតំណាងរបស់ពួកគេមកវិញ។
កម្មកររោងចក្រ អ៊ែជ្យាយស៍ ស្វេតធ័រ ប្រមាណជាង ៣០០ នាក់ នៅព្រឹកថ្ងៃពុធនេះ បានប្រមូលផ្ដុំគ្នានៅមុខសាលាដំបូង ខេត្ដកំពង់ស្ពឺ ទាមទារឱ្យដោះលែង តំណាងសជីពរបស់ពួកដែលត្រូវឃាត់ខ្លួនកាលពីព្រឹកម្សិលមិញ។
ប្រធានសហព័ន្ធសហជីពចលនាកម្មករ លោក ប៉ាវ ស៊ីណា បានប្រាប់វិទ្យុស្ដ្រី FM 102 នៃមណ្ឌលព័ត៌មានស្ដ្រីកម្ពុជា នៅថ្ងៃពុធ ទី១៣ ខែមករា ឆ្នាំ២០១៦ នេះថា នៅព្រឹកនេះ កម្មករប្រមាណ ៣០០ នាក់ បានប្រមូលផ្ដុំរបស់កម្មករនៅមុខសាលាដំបូងខេត្តកំពង់ស្ពឺ ដើម្បីទាមទារឱ្យព្រមដោះលែងតំណាងសហជីពទាំង ៥ ដែលសមត្ថកិច្ចបានចាប់ខ្លួនកាលពីម្សិលមិញ។
លោក ប៉ាវ ស៊ីណា បានបន្ដថា ក្រុមកម្មករតវ៉ារហូតទាល់តែមានការដោះលែង តំណាងសហជីពទាំងប្រាំនោះត្រឡប់វិញ។ លោកថា ក្រុមកម្មករក្រៅពីស្រែកទាមទារ ក៏បានសរសេរលើបដាហើយ នៅមានធ្វើពិធីសាសនា ដាក់បណ្ដាសា ដល់ក្រុមអាជ្ញាធរពាក់ព័ន្ធទាំងអស់ ដែលបានចាប់ខ្លួនតំណាងរបស់ពួគគេ។
លោក ប៉ាវ ស៊ីណា បញ្ជាក់ថា កាលពីម្សិលមិញ ក្រោយពីឃាត់ខ្លួនមន្ដ្រីតំណាងសហជីព ទាំងប្រាំ នាក់ របស់សហព័ន្ធសហជីពចលនាកម្មករនោះហើយ ក៏មាន ព្រះរាជអាជ្ញាមួយរូប ឈ្មោះ កែវ ធា បានហៅតំណាងសហជីពចំនួនប្រាំនាក់ផ្សេងទៀតចូលជួបចរចារ តែលោក ប៉ាវ ស៊ីណា ថាការហៅចរចានោះ ពុំមែនជាការចរចាទេ ផ្ទុយទៅវិញ វាជាការគំរាមក្រុមតំណាងសហជីព ឱ្យឈប់តវ៉ាទៅវិញ។
លោកបន្ថែមថា៖ «ឥឡូវនេះមិនទាន់មាន មន្ដ្រីណាមួយចេញមកជួបដោះស្រាយទេ តែម្សិលមិញ មានព្រះរាជអាជ្ញា ឈ្មោះ កែវ ធា គាត់បានហៅក្រុមការងារ ចំនួនប្រាំនាក់ចូលទៅពិភាក្សាជុំវិញបញ្ហារឿងហ្នឹង តែគាត់បាន បង្ហាញសញ្ញាឫកពារ ឈ្លើយ មិនមានសីលធម៌ គំរាមកំហែង មកលើតំណាងសហជីពទាំងប្រាំដែលចូលទៅចរចា ហើយគាត់ បានប្រើពាក្យថា ខេត្ដកំពង់ស្ពឺ គាត់ចង់បញ្ជាឲ្យចាប់អ្នកណា ចាប់អ្នកហ្នឹង ហើយចាប់ឱ្យអស់ពួក អាសហជីព ហើយគាត់ការពារតែថៅកែទេ គាត់អត់ខ្វល់ពីកម្មករ ឬសហជីពណាទេ គាត់ថាថៅកែមកស្រុកខ្មែរត្រូវវេចលុយទៅវិញ»។
វិទ្យុស្ត្រី មិនអាចទាក់ទងលោក កែវ ធា ដើម្បីសុំការបំភ្លឺជុំវិញរឿងនេះបានទេ។ ប៉ុន្តែ ប្រធានតុលាការខេត្ដកំពង់ស្ពឺ លោក ខ្លូត ពេជ្រ បានមានប្រសាសន៍ថា នៅព្រឹកនេះពិតជាមានការតវ៉ារបស់ក្រុមកម្មករនៅមុខសាលាដំបូងខេត្តមែន។ លោកថា នៅព្រឹកនេះ ខាងព្រះរាជអាជ្ញា បានហៅតំណាងសហជីពមួយចំនួនទៅជួបពិភាក្សាពីបញ្ហានេះដែរ ប៉ុន្ដែលោកមិនបានដឹងចំនួនថាមានប៉ុន្មាននាក់នោះទេ។
លោក ខ្លូត ពេជ្រ បានបញ្ជាក់ថា ចំពោះចំណាត់ការទៅលើតំណាងសហជីពទាំងប្រាំនាក់ ដែលសមត្ថកិច្ច បានឃាត់ខ្លួនកាលពីម្សិលមិញនោះលោកមិនអាចបញ្ជាក់បានទេ ព្រោះសុំណុំរឿងនេះស្ថិតនៅក្នុងដៃព្រះរាជអាជ្ញានៅឡើយ។
លោកបន្ថែមថា៖ «បាទ រឿងហ្នឹងខ្ញុំមិនទាន់បានដឹងទេ ព្រោះអីនៅខាងព្រះរាជអាជ្ញានៅឡើយទេ ចាំមើលខ្ញុំសួរព្រះរាជអាជ្ញាសិន ព្រោះអីម្សិលមិញឮថាមានការចាប់ខ្លួនមែន»។
សូមជម្រាបថា កម្មករ-កម្មការនីដែលធ្វើការនៅ រោងចក្រ អ៊ែជ្យាយស៍ ស្វេតធ័រ ស្ថិតនៅក្រុង ច្បារមន ខេត្ដកំពង់ស្ពឺ ធ្លាប់បានឡើងមកតវ៉ានៅមុខក្រសួងការងារ និង បណ្ដុះបណ្ដាលវិជ្ជាជីវៈចំនួនបីលើកមកហើយ ពោលគឺកាលពីចុងឆ្នាំ២០១៥ មួយលើក និងពីរ លើកទៀត នៅដើមខែមករា ឆ្នាំ២០១៦នេះ ក្នុងគោលបំណងទាមទារ លក្ខខណ្ឌការងារទាំង ០៩ ចំណុច ពីរោងចក្រ។ ក៏ប៉ុន្ដែ ក្រុមកម្មករមិនទាន់ទាំងទទួលបានដំណោះស្រាយពីក្រសួងផង តំណាងសហជីព ចំនួនប្រាំនាក់ត្រូវបានសមត្ថកិច្ច ខេត្ដកំពង់ស្ពឺ ឃាត់ខ្លួនក្រោមបទចោទថាបានបង្កហិង្សារទៅលើកម្មករក្នុងរោងចក្រទៅវិញ៕
