ខេត្តកំពង់ស្ពឺ៖ មន្ត្រីនគរបាលនៃស្នងការដ្ឋានខេត្តកំពង់ស្ពឺឱ្យដឹង នៅថ្ងៃពុធនេះថា ចំនួនអ្នកស្លាប់ និងអ្នករងរបួស ដោយសាររថយន្តកៀរគ្នាកាលពីថ្ងៃម្សិលមិញមិនមានការប្រែប្រួលទេ។
បើតាមស្នងការរងខេត្ដកំពង់ស្ពឺ លោក មៀច សាមឿន បានឱ្យដឹងនៅព្រឹកថ្ងៃពុធ ទី១៣ ខែមករា ឆ្នាំ២០១៦នេះ ថាចំនួនអ្នកស្លាប់ និងរបួស នៅក្នុងគ្រោះថ្នាក់ចរាចរណ៍កាលពីទី១២ ខែមករា ម្សិលមិញនៅដដែល គឺស្លាប់ ៥នាក់ របួសធ្ងន់ ១២នាក់។ លោកបានបញ្ជាក់ថា សមត្ថកិច្ចនៅមិនទាន់បានចាប់ខ្លួនជនល្មើសដែលបង្កគ្រោះថ្នាក់ចរាចរណ៍បាននៅឡើយទេនៅព្រឹកនេះ។
សូមជម្រាបថា កាលពីថ្ងៃទី១២ ខែមករា ឆ្នាំ២០១៦ ម្សិលមិញរថយន្តដឹកកម្មករពីរគ្រឿងបានកៀរគ្នាក្រឡាប់ បណ្ដាលឱ្យកម្មករ ៥នាក់ស្លាប់ របួសធ្ងន់ ១២នាក់ និងមានកម្មករជាច្រើនផ្សេងទៀតរងរបួសផងដែរ។
ករណីគ្រោះថ្នាក់ចរាចរណ៍នេះកើតឡើង នៅម៉ោង៦ និង៤០នាទីព្រឹក នៅលើកំណាត់ផ្លូវជាតិ លេខ ៤១ ចន្លោះគីឡូម៉ែតលេខ ៩ និងលេខ ១០ នៅក្នុងភូមិជ្រៃតាគង់ ឃុំរកាកោះ ស្រុកគងពិសី ខេត្តកំពង់ស្ពឺ៕
