ភ្នំពេញ៖ សហគមន៍ចំនួន ៨ រស់នៅតាមបណ្តោយផ្លូវដែកក្នុងរាជធានីភ្នំពេញ ដែលមានប្រជាពលរដ្ឋប្រមាណ ១០០ នាក់ នៅថ្ងៃទី១១ ខែមករា ឆ្នាំ២០១៦ នេះ បានប្រមូលផ្តុំគ្នានៅមុខក្រសួងសាធារណការ និងដឹកជញ្ជូន បំណងទាមទារឱ្យក្រសួងមួយនេះ បើកវេទិកាសាធារណៈ ផ្តល់ព័ត៌មានលម្អិតស្តីពីគម្រោងអភវិឌ្ឍន៍ផ្លូវដែកនេះ ព្រោះពួកគេព្រួយបារម្ភថា ការអភិវឌ្ឍដោយមិនជូនដំណឹងដល់ជាមុន នឹងអាចបង្កឱ្យពួកគេរងផលប៉ះពាល់ពីគម្រោងអភិវឌ្ឍន៍មួយនេះ។
ការតវ៉ាដោយមានការលើកបដា និងស្រែកអំពាវនាវ ឱ្យក្រសួងបើកវេទិការសាធារណៈ ដើម្បីបំភ្លឺដល់ពួកគេអំពីគម្រោងអភិវឌ្ឍន៍ផ្លូវដែក ដែលក្រសួងគ្រោងនឹងធ្វើការសាងសង់នេះ បានធ្វើឡើងនៅព្រឹកថ្ងៃចន្ទ ទី១១ ខែមករា ឆ្នាំ២០១៦នេះ។
ក្រុមអ្នកតវ៉ាឱ្យដឹងប្រហាក់ប្រហែលគ្នាថា ការអំពាវនាវនេះគឺបន្ទាប់ពីប្រជាពលរដ្ឋបានទទួលដំណឹងតាមរយៈតាមព័ត៌មានក្នុងស្រុកមួយចំនួនថា ក្រសួងសាធារណការ និងដឹកជញ្ជូន ជាមួយនឹងវិទ្យាស្ថានគម្រោង ប្លង់របស់ខេត្តអឺណាន ប្រទេសចិន បានពិភាក្សាគ្នា អំពីគម្រោងសាងសង់ផ្លូវល្បឿនលឿនពីរាជាយស្ម័យយាន ទៅកាន់ព្រលានយន្តហោះអន្តរជាតិភ្នំពេញ។
អ្នកស្រី មាស ស្រីមុំ ប្រជាពលរដ្ឋមួយរូបមកពីសហគមន៍ដងផ្លូវរថភ្លើង និយាយថា ការដែលប្រជាពលរដ្ឋមកទាមទារឱ្យក្រសួងសាធារណការ និងដឹកជញ្ជូន បើកវេទិកាសាធារណៈនេះ ក៏ព្រោះតែប្រជាពលរដ្ឋដែលកំពុងរស់នៅតាមបណ្តោយផ្លូវរថភ្លើងទាំងអស់ ចង់ដឹងពីគម្រោងនៃការអភិវឌ្ឍផ្លូវដែកនេះជាមុនសិន ថាតើគម្រោងមួយនេះបង្កផលប៉ះពាល់ដល់ពលរដ្ឋប៉ុន្មានគ្រួសារ ហើយមានសំណងបែបណាដល់ប្រជាពលរដ្ឋវិញពីកម្រោងមួយនេះ។
អ្នកស្រីបន្តថា កាលពីពេលថ្មីៗនេះ មានក្រុមវិស្វករជនជាតិចិនបានចុះមកវាស់ផ្លូវរថភ្លើងនេះ និងបានកំណត់ព្រំចូលដីនិងផ្ទះប្រជាពលរដ្ឋ ដែលប្រការនេះធ្វើឱ្យប្រជាពលរដ្ឋកើតក្តីព្រួយបារម្ភថា អាចនឹងប្រឈមការបណ្ដេញចេញ។ អ្នកស្រី មាស ស្រីមុំ៖ «ខ្ញុំចង់ឱ្យគាត់ចុះសិក្សាសិន មុននឹងធ្វើអ្វីមួយចុះសិក្សាពីផលប៉ះពាល់របស់ប្រជាពលរដ្ឋសិន។ ប្រជាពលរដ្ឋមិនទាន់បានទទួលដំណឹងអ្វីផង ក៏ស្រាប់តែមានគម្រោងជាឯកសារមកទៅហើយ ប្រសិនបើគាត់ចុះមកទៅសម្របសម្រួល មកសិក្សាពីបញ្ហារបស់ប្រជាពលរដ្ឋរស់នៅ នោះប្រជាពលរដ្ឋអាចដោះស្រាយ ថាតើយើងគិតយ៉ាងណា រកវិធីសាស្ត្រណា តើសំណងយ៉ាងណា ឱ្យដឹងដល់ប្រជាពលរដ្ឋ»។
ប្រជាពលរដ្ឋមួយរូបទៀត លោក នូ សារិន និយាយថា ការដែលពលរដ្ឋទាមទារឱ្យអាជ្ញាធរពាក់ព័ន្ធផ្តល់ព័ត៌មានជាមុន មុននឹងចាប់ផ្តើមធ្វើការអភិវឌ្ឍដូច្នេះ ក៏ព្រោះតែបទពិសោធការអភិវឌ្ឍក្នុងរាជធានីភ្នំពេញកន្លងមក គឺតែងតែបង្កផលលំបាកដល់ប្រជាជន និងធ្វើឱ្យប្រជាពលរដ្ឋកាន់តែជីវភាពក្រីក្រថែមទៀត។
លោកបន្តថា លោកមិនជំទាស់នឹងការអភិវឌ្ឍរបស់រដ្ឋាភិបាលនោះទេ តែសូមឱ្យរដ្ឋាភិបាលធ្វើការអភិវឌ្ឍយ៉ាងណាឱ្យមានការរីកចម្រើនទាំងរដ្ឋ ទាំងរាស្ត្រ មិនមែនធ្វើការអភិវឌ្ឍដោយឲ្យប្រជាពលរដ្ឋទឹកភ្នែកនោះទេ។
លោក នូ សារិន៖ «ប្រជាពលរដ្ឋប្រទេសគេបន់ឱ្យតែរដ្ឋាភិបាល ឬក្រុមហ៊ុនណាមួយមកអភិវឌ្ឍ គេសប្បាយចិត្តជាទីបំផុត តែប្រទេសខ្មែរយើងអភិវឌ្ឍន៍កន្លែងណាថាដោះស្រាយងាយស្រួលតែវាមិនអញ្ចឹង។ មេរៀនប្រជាពលរដ្ឋមានច្រើនណាស់ហើយ ដីបឹងកក់ដោះស្រាយមិនទាន់សព្វជ្រុងជ្រោយបែបជាបូមដីចាក់ ដីក្រហម សំបុកចាប ប៊ូឌីង គ្រប់កន្លែងជាដើម ដូច្នេះប្រជាពលរដ្ឋផ្លូវដែកខ្ញុំរស់នៅស្របច្បាប់ កុំថាសំណង់អាណាធិបតេយ្យឬរស់នៅលើដីរស់ឱ្យសោះ»។
ពាក់ព័ន្ធការស្នើរបស់ប្រជាពលរដ្ឋទាំងនេះ លោក ពៅ ឡាធី ប្រធាននាយកដ្ឋានរដ្ឋបាលនៃក្រសួងសាធារណការ និងដឹកជញ្ជូន បានចេញមកពន្យល់ប្រជាពលរដ្ឋថា ការបើកវេទិកាសាធារណៈ គឺជាដែនសមត្ថកិច្ចរបស់អាជ្ញាធរដែនដី ដូច្នេះលោកសូមឱ្យពលរដ្ឋដាក់ញត្តិ ស្នើសូមអាជ្ញាធរដែនដីវិញ ហើយក្រសួងសាធារណការ និងដឹកជញ្ជូនទៅចូលរួមតាមការស្នើសុំ ដើម្បីពន្យល់ពីគោលនយោបាយអភិវឌ្ឍន៍ និងគោលការណ៍សំណងនានាជូនពលរដ្ឋ។
លោក ពៅ ឡាធី៖ «ខ្ញុំបានជម្រាបជូនបងប្អូនរួចវិញហើយថា រឿងវេទិកាសាធារណៈ គឺជារឿងរបស់អាជ្ញាធរដែនដី។ បងមានការអីបងពិភាក្សាជាមួយចៅសង្កាត់ អភិបាលខណ្ឌ គណៈអភិបាលរាជាធានីភ្នំពេញទៅ លោកនឹងរៀបចំវេទិកាសាធារណៈ ពេលហ្នឹងគាត់នឹងអញ្ចើញក្រសួងជំនាញ ដែលមានក្រសួងខ្ញុំផ្ទាល់ ហើយក៏មានថ្នាក់ដឹងនាំដែលជាក្រុមការងារត្រួតពិនិត្យតាមដានគោលនិយោបាយរបស់រដ្ឋាភិបាល ហើយក៏ចុះទៅជួបបងប្អូន និងពន្យល់អំពីផលប៉ះពាល់ឬមិនប៉ះពាល់យ៉ាងម៉េច ហើយនិងដំណោះស្រាយយ៉ាងម៉េចរបស់រាជរដ្ឋាភិបាល»។
ទាក់ទងនឹងការអភិវឌ្ឍកន្លងមក សង្គមស៊ីវិលតែងតែរិះគន់ថា រដ្ឋាភិបាលមិនបានសិក្សាពីផលប៉ះពាល់ឱ្យបានច្បាស់លាស់ជាមុន ដើម្បីផ្តល់សំណងសមរម្យដល់ពលរដ្ឋដែលរស់នៅក្នុងតំបន់អភិវឌ្ឍន៍នោះទេ។ សង្គមស៊ីវិលក៏បានលើកឡើងដែរថា គម្រោងភាគច្រើនបានភ្ជាប់នឹងអំពើពុករលួយ ដែលជាកត្តាជំរុញឱ្យពេលចុះអនុវត្តគម្រោង បង្កឱ្យមានការបណ្តេញចេញនិងរំលោភសិទ្ធិមនុស្ស៕
