បាងកក៖មេធាវីរបស់លោកថាក់ស៊ីន ស៊ីណាវ៉ាត្រា កាលពីថ្ងៃពុធ ទី៣០ ខែសីហា ឆ្នាំ២០២៣បានថ្លែងឱ្យដឹងថាកូនក្ដីរបស់ខ្លួនកំពុងរៀបចំឯកសារស្នើសុំការលើកលែងទោសពីព្រះមហាក្សត្រ។
លោក ថាក់ស៊ីន បានត្រឡប់ចូលប្រទេសថៃវិញ កាលពីសប្តាហ៍មុនបន្ទាប់ពីបាននិរទេសខ្លួនឯង១៥ឆ្នាំនៅបរទេស។ លោកបានប្រើយន្តហោះឯកជនផ្ទាល់ខ្លួនមកប្រទេសវិញ បន្ទាប់មកលោកត្រូវបាននាំខ្លួនទៅពន្ធនាគារដើម្បីដាក់ទោសប្រាំបីឆ្នាំពីបទរំលោភអំណាច និងទំនាស់ផលប្រយោជន៍នៅពេលលោកកាន់
អំណាច។ តែប៉ុន្មានម៉ោងបន្ទាប់ពីការមកដល់ស្រុកកំណើតវិញ បេក្ខជនមកពីគណបក្សភឿថៃដែលគាំទ្រដោយគ្រួសារ Shinawatra គឺលោក Srettha Thavisin ត្រូវបានសភាបោះឆ្នោតក្លាយជានាយករដ្ឋមន្ត្រី ដែលអ្នកវិភាគខ្លះគិតថាលោកថាក់ស៊ីនបានធ្វើកិច្ចព្រមព្រៀងជាមួយពួកយោធាអភិរក្សនិយម និងរាជានិយមថៃ ដែលបានទម្លាក់រដ្ឋាភិបាលលោកនៅក្នុង ឆ្នាំ ២០០៦ និង ២០១៤ ។ទោះយ៉ាងណាលោកថាក់ស៊ីន និងគណបក្សភឿថៃ បានបដិសេធចំពោះរឿងនេះ។
នៅយប់ដំបូងពេលមកដល់ប្រទេសថៃ លោកថាក់ស៊ីនត្រូវបានបញ្ជូនទៅមន្ទីរពេទ្យប៉ូលិសដោយសារលោកចុកក្នុងទ្រូង និងលើសសម្ពាធឈាម។កាលពីថ្ងៃពុធទី៣០ ខែសីហា ឆ្នាំ២០២៣ មេធាវីរបស់លោកដាក់ស៊ីនគឺលោក Winyat Chartmontri បានប្រាប់អ្នកសារព័ត៌មានថា អតីតនាយករដ្ឋមន្ត្រីកំពុងរៀបចំសំណើសុំការលើកលែងទោសពីព្រះមហាក្សត្រ។លោកមេធាវី Winyat បាននិយាយថា “លោកថាក់ស៊ីនកំពុងរៀបចំឯកសារនេះដោយខ្លួនឯង ហើយបច្ចុប្បន្នកំពុងស្ថិតក្នុងដំណាក់កាលរៀបចំ” ដោយបន្ថែមថាក្រុមអ្នកច្បាប់មិនទាន់ឃើញសំណើនេះទេ។លោកមេធាវី Winyat បាននិយាយថា ពេលវេលាដាក់ថ្វាយព្រះមហាក្សត្រគឺអាស្រ័យលើការសម្រេចចិត្តរបស់លោកថាក់ស៊ីន។
បើទោះជាបានឃ្លាតឆ្ងាយស្រុកអស់រយៈពេល១៥ឆ្នាំក៏ដោយ ក៏លោក ថាក់ស៊ីន នៅតែបន្តប្រកាន់យកនយោបាយថៃ ផ្តោតលើការយកចិត្តទុកដាក់លើប្រជាពលរដ្ឋ ដូចជាការថែទាំសុខភាព និងការផ្តល់ទុនជាដើម។ គណបក្សដែលស្មោះត្រង់នឹងលោកថាក់ស៊ីនបានឈ្នះរាល់ការបោះឆ្នោតក្នុងរយៈពេល២០ឆ្នាំចុងក្រោយនេះរហូតដល់ឆ្នាំ២០២៣។
ទោះបីយ៉ាងនេះក៍ដោយក្រុមប្រឆាំងលោកថាក់ស៊ីនបានដាក់ញត្តិតវ៉ារារាំងរាល់ការប៉ុនប៉ងដើម្បីសុំការលើកលែងទោសដោយលើកឡើងថាករណីពុករលួយរបស់លោកថាក់ស៊ីនមិនគួរទទួលបានការលើកលែងទោសនោះទេ៕
ប្រភព៖ C N A ថ្ងៃទី ៣១ ខែ សីហា ឆ្នាំ ២០២៣
