ប្រជាពលរដ្ឋដែលមានវិវាទដីធ្លីនៅខេត្តកោះកុងប្រមាណ១០០នាក់ បានមកជួបជុំគ្នានៅសាលាឧទ្ធរណ៍ខេត្តព្រះសីហនុដើម្បីស្នើសុំអោយតុលាការទម្លាក់ចោលគ្រប់បទចោទ និងដោះលែង តំណាងពលរដ្ឋដែលកំពង់ជាប់ឃុំ នៅព័ន្ធធនាគារខេត្តកោះកុង ចំនួន៩នាក់អោយមានសេរីភាពវិញ នៅថ្ងៃទី២៩ ខែសីហា ឆ្នាំ២០២៣។ លោក គីម ចាន់ចាវ រាយការណ៍
ការទាមទារនេះ គឺធ្វើឡើងភ្លាមៗបន្ទាប់ពីសាលាឧទ្ធរណ៍ខេត្តព្រះសីហនុ នៅថ្ងៃទី២៩ ខែសីហា សម្រេចក្ដីលើសកម្មជនដីធ្លី ខេត្តកោះកុងទាំង៩នាក់ ក្រោមបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ ក្នុងនោះសាលាឧទ្ធរណ៍ព្រះសីហនុសម្រេចឱ្យសកម្មជន៧នាក់ ត្រូវបានដោះលែងឲ្យនៅក្រៅឃុំ ចំណែកសកម្មជន២នាក់ផ្សេងទៀតជាស្ត្រី មិនត្រូវបានដោះលែងឡើយ ដោយហេតុថាអ្នកទាំង២ត្រូវបានតុលាការចោទប្រកាន់ពាក់ព័ន្ធនឹងបទបរិហាបង្កាច់កេរ្តិ៍មួយករណីទៀត។ សកម្មជនដែលត្រូវបានដោះលែង ទាំង៧នាក់នោះរួមមាន លោកស្រី យឿន ខ្មៅ លោកស្រី ដេត ហួរ លោកស្រី យី គន្ធា លោកស្រី ទីន តាំង លោកឡាំង ចៀវ លោក ហេង ជៃ និងលោកសុខ ជៃ។
ចំណែកសកម្មជន២នាក់ផ្សេងទៀតជាស្ត្រី រួមមានលោកស្រី ផាវ ញើង និងលោកស្រី សេង លីន ត្រូវបន្តឃុំខ្លួននៅពន្ធនាគារ ក្រោមបទចោទបរិហាបង្កាច់កេរ្តិ៍។ ប្រជាសហគមន៍ដែលមកតវ៉ាយល់ថា ការចោទប្រកាន់មួយនេះ គឺជាអយុត្តិធម៌សម្រាប់សកម្មជនដីធ្លីដែលខិតខំការពារដីសហគមន៍ និងដីអាស្រ័យផលរបស់ខ្លួន។
«សូមអំពាវនាវដល់ឯកឧត្តមនាយករដ្ឋមន្ត្រីថ្មីមេត្តា ទម្លាក់បទចោទប្រកាន់និងដោះលែងសកម្មជនពួកខ្ញុំទាំង៩ដែលគេចាប់តាំងថ្ងៃទី២៩ ខែ៦ គាត់រយៈពេល២ខែហើយគាត់នៅក្នុងគុកលំបាកវេទនាអត់បានអត់ទឹក ព្រមទាំងមានជម្ងឺ… សូម្បីអ្នកស្រីផាវ ញ៉ើង គាត់មានកូនង៉ែតយកគាត់ទៅដាក់ក្នុងគុកចឹង គាត់ឈឺផងអីផង។ ចាប់គាត់ដោយអត់មានបទចោទប្រកាន់អីច្បាស់លាស់..»
ពាក់ព័ន្ធបញ្ហានេះវិទ្យុស្ត្រីបានព្យាយាមទាក់ទងសុំការបំភ្លឺជាច្រើនសារពីលោក ជិន ម៉ាលីន អ្នកនាំពាក្យក្រសួងយុត្តិធម៌ ប៉ុន្តែលោកមិនឆ្លើយតបសំនួររបស់វិទ្យុស្ត្រីនោះទេ ។ ទោះយ៉ាងណា លោក អំ សំអាត នាយកកិច្ចការទូទៅអង្គការលីកាដូ បានលើកឡើងថា ដំណោះស្រាយដែលប្រើប្រព័ន្ធតុលាការចោទប្រកាន់សកម្មជនដីធ្លីនេះ គឺជារឿងអយុត្តិធម៌សម្រាប់ពួកគេដ្បិតលោកយល់ថា ការកាត់ទោស ឬការឃុំខ្លួនពួកគេនឹងធ្វើឱ្យប៉ះពាល់ដល់ប្រព័ន្ធយុត្តិធម៌ និងមុខមាត់រាជរដ្ឋាភិបាលទៅវិញទេ។
«បញ្ហាដីធ្លីរបស់ប្រជាពលរដ្ឋនេះវាកើតឡើងរ៉ាំរ៉ៃហើយយូរមកហើយអត់មានដំណោះស្រាយ ប៉ុន្តែត្រូវបានតុលាការធ្វើការចោទប្រកាន់ហើយនឹងកាត់ទោសពួកគាត់ទៅវិញណា។ អញ្ចឹងវាប៉ះពាល់ដល់ប្រព័ន្ធយុត្តិធម៌ ប៉ះពាល់ដល់មុខមាត់អាជ្ញាធរ មុខមាត់របស់រាជរដ្ឋាភិបាលទៅវិញ។ អញ្ចឹងយើងឃើញថាទោះបីជាប្រើប្រាស់ឬក៏តុលាការកាត់ទោសពួកគាត់យ៉ាងណាក៏ដោយក៏មិនអាចបំបិទសំឡេងពួកគាត់ មិនអាចបំបិទមិនឱ្យគាត់តវ៉ាបានទេ យើងឃើញហើយផ្ទុយទៅវិញកាន់តែមានការតវ៉ាទាមទារឱ្យមានការដោះលែងអីជាដើម…»។
លោក អំ សំអាត នាយកកិច្ចការទូទៅអង្គការលីកាដូ
ប្រជាសហគមន៍ដែលទៅចូលរួមគាំទ្រតំណាងរបស់ខ្លួននៅមុខសាលាឧទ្ធរណ៍ព្រះសីហនុទាំងអស់ បានស្នើសុំកិច្ចអន្តរាគមពីសម្តេចហ៊ុន សែន និងលោក ហ៊ុនម៉ាណែត ជានាយករដ្ឋមន្ត្រី នៃកម្ពុជា ជួយអន្តរាគមន៍ទម្លាក់ចោលគ្រប់បទចោទ និងដោះលែងពួកគាត់ទាំងអស់អោយមានសេរីភាពវិញ៕
