តាមសេចក្ដីប្រកាសព័ត៌មានរបស់ គ.ជ.ប ឱ្យដឹងថា មានស្ត្រីមួយរូប បានជាប់វគ្គជម្រុះ សម្រាប់តំណែងអគ្គលេខាធិការរង
គ.ជ.ប។ ស្ត្រីរូបនេះបញ្ជាក់ថា គាត់មានសង្ឃឹម ៨០% ថានឹងបានជាប់ជាតំណែងអគ្គលេខាធិការរងនៃ គ.ជ.ប នៅវគ្គផ្ដាច់ព្រ័ត្រ ប្រសិនបើគណៈកម្មាធិការជាតិរៀបចំការបោះឆ្នោត បានគិតគូរពីការលើកស្ទួយសមភាពយេនឌ័រ។
យោងសេចក្ដីប្រកាសព័ត៌មានរបស់ គ.ជ.ប នៅថ្ងៃទី០៦ ខែមករា ឆ្នាំ២០១៦ នេះ ឱ្យដឹងថា អ្នកដែលបានជាប់វគ្គជម្រុះសម្រាប់តំណែងអគ្គលេខាធិការ គ.ជ.ប មាន ៣រូប និងតំណែងអគ្គលេខាធិការរងមាន១២រូប ដោយក្នុងអ្នកជាប់តំណែងអគ្គលេខាធិការរងទាំងនោះ មានមួយរូបជាបេក្ខនារី។
បេក្ខនារី ដែលបានជាប់វគ្គជម្រុះសម្រាប់តំណែងអគ្គលេខាធិការរង គ.ជ.ប រូបនោះ មានឈ្មោះថា លឹម ច័ន្ទលីដា ដែលសព្វថ្ងៃអ្នកស្រីបម្រើការនៅក្រុមប្រឹក្សាគណៈមេធាវី។
អ្នកស្រី លឹម ច័ន្ទលីដា បានប្រាប់វិទ្យុស្ត្រី FM 102 នៃ WMC ដោយក្តីរីករាយថា អ្នកស្រីសប្បាយដែលបានជាប់ជាអគ្គលេខាធិការរងនៅវគ្គជម្រុះនេះ ហើយអ្នកស្រីមានសង្ឃឹមរហូតដល់ ៨០% ថានឹងបានជាប់តំណែងអគ្គលេខាធិការរងនៅវគ្គផ្ដាច់ព្រ័ត្របន្តទៀត ប្រសិន គ.ជ.ប ពិតជាបានគិតគូរពីការលើកស្ទួយដល់សមភាពយេនឌ័រមែននោះ។
អ្នកស្រី លឹម ច័ន្ទលីដា បន្តថា ប្រសិនមានសមាសភាពស្ត្រីក្នុងតំណែងអគ្គលេខាធិការ និងតំណែងអគ្គលេខាធិការរងច្រើន នោះនឹងបង្កភាពងាយស្រួយ និងជំរុញដល់ស្ត្រីហ៊ានឈរឈ្មោះជាក្រុមប្រឹក្សា ឬជាសមាជិករដ្ឋសភា ព្រឹទ្ធសភាបានច្រើនផងដែរ។
អ្នកស្រី លឹម ច័ន្ទលីដា៖ «នាងខ្ញុំគិតថា បើសិនជាស្ត្រីបានកាន់តំណែងនៅ គ.ជ.ប ច្រើននោះ ស្ត្រីហ្នឹងគិតគូរពីស្ត្រីគ្នាឯងដែល ពាក់ព័ន្ធទៅនឹងការឈរឈ្មោះជាក្រុមព្រឹក្សា ឬក៏ជាសមាជិករដ្ឋសភា ព្រឹទ្ធសភា និងក្នុងជួររដ្ឋាភិបាល»។អ្នកស្រី លឹម ច័ន្ទលីដា បានបញ្ជាក់បន្ថែមថា គាត់មានបទពិសោធការងារជាមួយអង្គការសង្គមស៊ីវិលរយៈពេល ១២ឆ្នាំ មិនមែន ៥ឆ្នាំ ដូចព័ត៌មាននានាបានចុះផ្សាយនោះទេ។
ទាក់ទងទៅនឹងលទ្ធផលនេះ លោក ហង្ស ពុទ្ធា អ្នកនាំពាក្យ គ.ជ.ប ប្រាប់ថា លោកមិនអាចធានាថា បេក្ខនារីគឺ អ្នកស្រី លឹម ច័ន្ទលីដា បានជាប់នៅវគ្គផ្ដាច់ព្រ័ត្រនោះទេ ព្រោះគណៈកម្មាធិការជាតិរៀបចំការបោះឆ្នោត មិនបានកំណត់សមភាព ឬកូតាស្ត្រីក្នុងតំណែងអគ្គលេខាធិការ និងអគ្គលេខាធិការរង ដោយ គ.ជ.ប ចម្រាញ់យកអ្នកមានសមត្ថភាពពិតប្រាដកមកបម្រើការងារ។
លោក ហង្ស ពុទ្ធា បន្តថា កន្លងមកសង្គមស៊ីវិលដែលធ្វើការងារលើកស្ទួយសិទ្ធិស្ត្រី ក៏បានរិះគន់ពីបញ្ហាមិនកំណត់សមភាពស្ត្រីក្នុងតំណែងនេះដែរ តែលោក ហង្ស ពុទ្ធា ពន្យល់ថា គឺដោយសារតែ គ.ជ.ប មានការទទួលខុសត្រូវខ្ពស់ចំពោះការរៀបចំការបោះឆ្នោត ដែលមានរយៈពេលតែមួយថ្ងៃ ដូច្នេះ គ.ជ.ប ត្រូវតែចម្រាញ់យកអ្នកមានសមត្ថភាពមកទទួលខុសត្រូវចំពោះការងារឱ្យបានល្អប្រសើរ។
លោក ហង្ស ពុទ្ធា ៖ «ការដែលមិនបានកំណត់កូតានេះ ដោយសារ គ.ជ.ប ត្រូវទទួលខុសត្រង់ធ្ញន់ធ្ងន់ណាស់សម្រាប់ប្រតិបត្តិការបោះឆ្នោតមួយថ្ងៃ ប្រសិនបើជា គ.ជ.ប មិនអនុវត្តបានទេនោះ អាចនឹងសភាពការណ៍នយោបាយប្រែប្រួល អាចហ្នឹងមានអ្វីកើតឡើងមិនល្អទេសម្រាប់កម្ពុជា អញ្ចឹងបានជា គ.ជ.ប កំណត់យកសមត្ថភាពជាចម្បង»។
សូមជម្រាបថា នៅក្នុងវគ្គចម្រុះនេះ តំណែងអគ្គលេខាធិការមានសមាភាព ៣រូប គឺលោក ហេង មណីចិន្ដា ជាប្រធានអង្គការពុទ្ធសាសនាដើម្បីអភិវឌ្ឍន៍ លោក ទេព នីថា បច្ចុប្បន្នអគ្គលេខាធិការចាស់ គ.ជ.ប និងលោក យ៉ា ណាវុធ នាយកអង្គការខារ៉ាមកម្ពុជា។ ចំណែក តំណែងអគ្គលេខាធិការរង មានសមាភាព ១២រូប រួមមាន លោក នី ចរិយា លោក ម៉ៅ សុភារិទ្ធិ លោក សំ សុគង់ លោក គឹម ឈន លោក សោម សូរីដា លោក ម៉ុក ដារ៉ា លោក តាន់ ប៊ុនវីរៈ លោក ណេ ហ្សូនី លោក សុកុលៈ ទីប៉ោ លោក រស់ សួ លោក យ៉ត ប៊ុននី និងអ្នកស្រី លឹម ច័ន្ទលីដា។
បើតាមលោក ហង្ស ពុទ្ធា អ្នកនាំពាក្យ គ.ជ.ប បេក្ខជនដែលដាក់ពាក្យប្រឡងកាន់តំណែងអគ្គលេខាធិការ និងអគ្គលេខាធិការរង គ.ជ.ប នេះ គឺត្រូវអនុវត្តតាមរយៈការបោះឆ្នោតសម្រេចពីសមាជិក គ.ជ.ប ដោយសំឡេង ៥០ ភាគរយបូក ១។ នៅថ្ងៃទី១៥ មករា នេះ គ.ជ.ប នឹងប្រកាសឈ្មោះបេក្ខជន ដែលប្រឡងជាប់តំណែងអគ្គលេខាធិការ និងអគ្គលេខាធិការរង គ.ជ.ប។ គួរបញ្ជាក់ថា គ.ជ.ប ជ្រើសរើសអគ្គលេខាធិការ ១រូប និងអគ្គលេខាធិការរងចំនួន៤រូប៕
