នៅប៉ុន្មានថ្ងៃចុងក្រោយនេះ ពលរដ្ឋរស់នៅភ្នំពេញ បានសម្ដែងការមិនពេញចិត្តទៅលើភាពមិនប្រក្រតី ដែលបានកើតឡើងពាក់ព័ន្ធនឹងការប្រើប្រាស់ភ្លើង ដោយសារតែការបង់ប្រាក់ថ្លៃភ្លើងនៅក្នុងខែនេះច្រើនជាងខែមុនៗ ខណៈការប្រើប្រាស់ភ្លើងនៅដដែល។
រាយការណ៍ព័ត៌មានលម្អិតដោយ កញ្ញា ប៉ូ សាគុន ៖
ប្រជាពលរដ្ឋរស់នៅទីក្រុងភ្នំពេញ បានសម្ដែងការមិនពេញចិត្ត និងក្តីព្រួយបារម្មណ៍ទៅលើសេដ្ឋកិច្ចគ្រួសារខ្លួន នៅពេលដែលកុងទ័រភ្លើងមានភាពមិនប្រក្រតី ហើយពួកគេបានសំណូមពរដល់អគ្គិសនីជាតិកម្ពុជា ត្រូវត្រួតពិនិត្យកុងទ័រភ្លើងឱ្យបានច្បាស់លាស់។
ពលរដ្ឋរស់នៅសង្កាត់បឹងកេងកង៣ ក្នុងរាជធានីភ្នំពេញ អ្នកស្រី មាស មាជ បានឱ្យដឹងថា អ្នកស្រីបានប្រើប្រាស់ភ្លើង កាលពីខែមុនអស់ ១៥ ម៉ឺនរៀល តែខែនេះអស់ ១៨ ម៉ឺរៀល។
អ្នកស្រីបន្តថា អ្នកស្រីប្រើភ្លើងនេះដូចខែមុនៗដែរ តែបែរជាអស់ប្រាក់ច្រើនជាងខែមុនៗទៅវិញ។ អ្នកស្រីបាននិយាយថា អ្នកស្រីមិនសប្បាយចិត្តទេ នៅពេលកុងទ័រភ្លើងដើរខុសប្រក្រតី ដោយមិនដឹងមូលហេតុបែបនេះ។
អ្នកស្រីបានសំណូមពរដល់អាជ្ញាធរអគ្គិសនីជាតិកម្ពុជាថា សូមឱ្យត្រួតពិនិត្យកុងទ័រភ្លើងឱ្យបានច្បាស់លាស់។
ពលរដ្ឋម្នាក់ទៀតរស់នៅសង្កាត់ទួលទំពូង ក្នុងរាជធានីភ្នំពេញដែរ អ្នកស្រី ដួង ងួន បានប្រាប់ថា អ្នកស្រីប្រើភ្លើងកាលពីខែមុនអស់ជាង ១លាន ១សែន រៀល ចំណែកខែនេះអស់ ជាង ១លាន ៣សែន ៥ម៉ឺនរៀល។ អ្នកស្រីបន្តថា អ្នកស្រីមិនបានដឹងថាការឡើងគីឡូភ្លើងនេះមកពីមូលហេតុអ្វីនោះទេ។
សូមបញ្ជាក់ថា វិទ្យុស្ត្រី FM 102 នៃមណ្ឌលព័ត៌មានស្ត្រីកម្ពុជា មិនអាចសុំការបំភ្លឺពី អគ្គនាយក អគ្គិសនីជាតិកម្ពុជា លោក កែវ រតនៈ បានទេនៅថ្ងៃព្រហស្បតិ៍ ទី៣១ ខែធ្នូ ឆ្នាំ២០១៥នេះ ដោយសារលេខទូរស័ព្ទមិនអាចទំនាក់ទំនងបាន។
សូមរំឭកផងដែរថា ករណីប្រជាពលរដ្ឋសម្ដែងការមិនពេញចិត្ត ពាក់ព័ន្ធនឹងបញ្ហាកុងទ័រភ្លើងមានភាពមិនប្រក្រតីនេះ ធ្វើឡើងក្រោយពេលដែលសម្តេច ហ៊ុន សែន បានផ្តល់អនុសាសន៍ ៣ ចំណុច ដល់មន្ត្រីអាជ្ញាធរអគ្គិសនីកម្ពុជា (EDC) ក្នុងការគ្រប់គ្រងអគ្គិសនីកម្ពុជា។ ការផ្តល់អនុសាសន៍របស់សម្តេច ហ៊ុន សែន នេះ ធ្វើឡើងនៅក្នុងពិធីសម្ពោធវារីអគ្គិសនីតាតៃ ស្ថិតនៅក្នុងឃុំ ឫស្សីជ្រុំ និងឃុំតាតៃ ស្រុកថ្មបាំង ខេត្តកោះកុង ការពីព្រឹកថ្ងៃទី២៣ ធ្នូ។
អនុសាសន៍ ៣ ចំណុចនោះរួមមាន ទី១ ការពង្រីកអគ្គិសនីឱ្យដល់ទីជនបទ ទី២ ត្រូវពង្រឹងបណ្តាញអគ្គិសនីជាតិ និងទី៣ អាជ្ញាធរអគ្គិសនីកម្ពុជា ត្រូវតែធ្វើការបញ្ចុះតម្លៃអគ្គិសនី ជាបន្តបន្ទាប់ដល់ប្រជាពលរដ្ឋ៕
